Janë objektet më të lakmuara të luksit në Tiranë. Por që mund të blihen edhe për një qëllim fisnik, siç është shpëtimi i pandave. Po t’i shtosh kësaj edhe 10-vjetorin e dyqanit në Shqipëri, atëherë e kupton se pse mbrëmja e Swarovski-t ka qenë kaq e veçantë

Swarovski, prodhuesi gjigant i kristaleve më të famshëm në botë, festoi në Shqipëri 10-vjetorin. Një dekadë më parë, tring-tringu i këndshëm i kristaleve Swarovski u dëgjua për herë të parë edhe në një dyqan të kryeqytetit tonë.

E për të festuar të parin 10-vjetor të kristaleve të çmuara, Dasha Frashëri (e cila ka edhe ekskluzivitetin e Swarovski-t në Shqipëri) organizoi një festë po aq të shndritshme sa edhe produktet e dyqanit të saj.

Viktoria Beckham, Kate Moss, Naomi Campbell apo Donatella Versace, miq të mirë të Swarovsk-ëve, nuk ishin të pranishëm në festën e organizuar në Tiranë (me siguri kanë qenë të zënë me aktivitete të ngjashme që organizohen në të gjithë botën). Gjithsesi, festës nuk i mungoi shkëlqimi, sepse atë ia dhuruan klientët VIP të jetës politike dhe artistike në Shqipëri. Sepse klientët më të mirë të dyqanit janë edhe anëtarët e të parit klub të sapothemeluar “Swarovski” në Tiranë. Klubi mirëpret dhe të tjerë anëtarë, të cilët – duke u bërë pjesë e tij – përfitojnë ulje çmimi në blerjen e kristaleve të famshme.

Por, nëse festa pati dhjetëra të ftuar, kjo nuk ishte vetëm për të përfituar nga skontot bujare që ofron dyqani. Sepse organizimi pati edhe një qëllim fisnik dhe bamirës: shitjen e një seti pandash, të ardhurat e të cilit do të shkojnë për mbrojtjen e kësaj specieje të rrallë, që është në zhdukje. E jo më kot dyqani Swarovski u mbush me dhjetëra vizitorë.

Sepse të shpenzosh për “Swarovski”-n nuk është as shpenzim i tepruar dhe as bamirësi e kotë.