Një bionde e dashuruar me xhinset

Për sa kohë të jetë ende një gjimnaziste, duket se për Miss Albania-n, Egla Harxhi, gardëroba do të vazhdojë të ngelet po ajo: xhinse, atlete, të brendshme të rehatshme, fustane casual. Për t’u transformuar në një femme fatale... ka kohë

Ke ndryshuar shumë që nga koha kur u shfaqe për herë të parë në ekran?

Në qoftë se do flisja për karakterin tim, do thosha që nuk kam ndryshuar shumë, vetëm se sa po vjen e po maturohem më shumë dhe po bëhem gjithashtu më e përgjegjshme për veprimet e mia. Dalja në ekran ka qenë një privilegj i madh që m’u dha dhe që më ka ndryshuar për mirë, sigurisht.

Çfarë lexon përgjithësisht?

Romane, novela; preferoj shumë autorë, si: Balzak, Remark, Cvajg, Hygo, Heminguej... e shumë të tjerë.

Bukurinë e përjetshme në shkëmbim të shpirtit. A do ta bëje këtë zgjedhje? 

Thonë që njeriu humbet 21 gramë pas vdekjes dhe është pikërisht shpirti që largohet nga trupi... në qoftë se do ta besoja që ka një jetë të dytë mbas vdekjes, ku prehet shpirti i njeriut, atëherë kurioziteti se çfarë fshihet pas saj nuk do më linte të tundohesha nga bukuria e përjetshme.

Le ta lëmë mënjanë paktin me djallin. Si do ta ruash bukurinë tënde? 

Duke u kujdesur për çfarë duhet të ha gjatë ditës, duke përdorur sa më pak produkte që dëmtojnë lëkurën. Ka lloje të ndryshme mënyrash për të ruajtur bukurinë... nuk mund të them diçka fikse, pasi shkenca është në evoluim e sipër dhe çdo ditë dalin gjëra të reja, që ndihmojnë në ruajtjen e bukurisë.

Një pikë të dobët dhe një sekret të pamjes tënde. 

Pikë të dobët kam shpatullat. Kam dashur të kem më shumë se kaq dhe sekrete të pamjes do thosha që janë flokët dhe buzëqeshja.

Ç’trajtim bën në sallonet e bukurisë apo tek parukieri? 

Manikyr, pedikyr, pastrim fytyre, krehje flokësh etj.; gjëra që janë të domosdoshme për çdo vajzë.

Ka një moshë për gjithçka. Për ty ka mbaruar periudha e...

Kalimit të orëve pa mbarim para pasqyrës. Dikur, para se të dilja nga shtëpia, duhet të llogarisja gati një orë për t’u bërë gati. Tani më mjaftojnë më pak se 15-20 minuta. Ndoshta ngaqë, kur fillon e rritet, njeriu e kupton se duhet të jetë sa më praktik.

Cila do të ishte veshja e preferuar për mbrëmje? 

Një fustan i ndërthurur mes klasikes dhe të përditshmes... diçka shumë elegante dhe e veçantë, gati-gati si stili i Versace-s, pa ekzagjerime dhe ekstravagancë. Me një fustan tregon format e trupit dhe dukesh shumë sharmante.

“Uniforma” e përditshme për në shkollë?

Është thjesht një uniformë të cilën na e kërkojnë ta veshim përditë... gjë që më kursen kohë para dollapit çdo mëngjes.

Kur nuk je në shkollë, xhinse dhe atlete? 

Jashtë shkollës xhinset dhe atletet janë veshja më komode. E adhuroj ndjesinë që të japin jo vetëm atletet, por në përgjithësi këpucët pa takë, sepse je e lirshme kur ecën... ndihesh shumë rehat.

Të brendshmet e preferuara?

Preferoj shumë të rehatshmet. Përdor markat LovelyGirl, Luna, Pompea.

Çfarë mban zakonisht në çantë? 

Portofolin, celularin, parfumin, një shkëlqyes buzësh, një rimel, çelësat e shtëpisë...

Muzika që nuk mungon kurrë në iPod-in apo në makinën tënde? 

Përgjithësisht atë muzikë që është e bukur dhe që nuk vdes kurrë. Në qoftë se do kontrollonit iPod-in tim, do gjenit një shumëllojshmëri muzike, që nga këngët italiane, franceze, amerikane, angleze, shqiptare...

Nëse do të zgjidhje, në ç’qytet do të doje të jetoje? 

Në Paris: më mrekullon ai qytet.

Zgjedhjet për stinën e pranverës?  

Xhinset, të cilat i kam të pandashme në çdo stinë dhe besoj se duhet të shtoj bluzat me ngjyra të hapura, shumë të ëmbla, që janë tendencë e modës pranverë-verë 2008.

Parfumi i preferuar: Chanel nr.5

Celulari që mban: Samsung U-700

Çanta e preferuar: Luis Vuitton, me dizenjo me figura me ngjyra dhe me sfond të bardhë 

Këpucët e preferuara: Zara, takë e hollë, majë e rrumbullakët, e hapur te gishti i madh i këmbës, gri

Linja e produkteve të flokëve: Wella