Për të ecur në rrugë ose mbi tapetin e kuq, të veshura me rroba banje ose fustan nusërie, kur nuk duan t’i shohë njeri ose kur pozojnë. Një shami, shall apo tyl i lidhur në kokë, por dhe një rreth elegant ndez tërë performancën ose e bën thjesht unike. Femrat e suksesshme tregojnë si...

Shamia që mbulon kokën e femrave është karakteristike për kulturën islamike. Por dhe emblemë e qytetit  perëndimor Saint Tropez. Në plazh, në formë trekëndëshe, është alternativa e kapelës. Së fundmi sajohen me shalle, me shami të mëdha që lidhen mbi kokë apo në ballë. Të qëndisura apo me dizenjo shumëngjyrëshe. Fjongo e dukshme mbi flokë apo nyje pas. Me flokë të kapura apo të lëshuara. Një aleat i mirë i look-ut hipi. Por mund të jetë dhe një detaj elegance, kur copa shkëlqen apo një zgjedhje fashion e përforcuar me aksesorë. Përveç tyre të rikthyer në modë janë dhe rrathët, të cilët kur vënë në pah tiparet ose markën origjinale nuk harrohen në sirtar. Bota e artit nga Shtetet e Bashkuara deri në Tiranë ofron një katalog të tërë ofertash ku secila mund të gjejë një ide. Kujdes mos zgjidhni ato që nuk duhen...

Halle Barry

Është një nga aktoret më sensuale e elegante të Hollyëood-it, por që, si koleget e saj, dhe ajo do t’i shijojë ditët pushimit: me xhins, shapka me gisht, kanotiere të bardhë, syze e një shami e bërë nyje pas kokës. Tani që flokët e saj janë rritur shumë, duket se kjo shërben në vend të stilimit, në ato ditë kur nuk do t’ia dish për asgjë.  

Britney Spears

Këngëtarja që provoi gjithë parabolën e karaktereve e imazheve të një personazhi të njohur, nuk çudit më askënd. Megjithatë kjo nuk do të thotë që fotografët do heqin ndonjëherë dorë prej saj. Ja ku e shohim sërish: veshje e rëndomtë, syze dhe një shirit i trashë në kokë. Pasi preu flokët zero, i ka bërë pjesë  të look-ut të saj.

Ingrid Gjoni

Me këtë foto muajin e kaluar modelja dhe këngëtarja shqiptare u shfaq në kopertinën e revistës “One”. Sigurisht që ka rol dhe feksja e ngjyrës së verdhë me nuanca portokalli që të merr sytë me të cilën ka luajtur Ingriti. Këto nuanca në pareon e saj, në thonj dhe në shiritin prej dantelle të lidhur mbi ballë. Zgjedhje që godet!

Jeniffer Lopez

Një cigane chic. Ky është efekti që lë Lopez e veshur e tëra në këtë ngjyrë metalike shkëlqyese e këtë material të thurur, i cili përveç veshjes i është dashur edhe për shaminë që mbulon gjithë kokën. E lidhur fjongo nga pas, ajo lë zbuluar vetëm fundin e veshëve ku spikasin vëthë të së njëjtës ngjyrë. Sigurisht jo alla ciganë.

Kate Hudson

Aktorja bionde po u largohet fotografëve. Me sa duket as vetë nuk është bindur për paraqitjen e saj. Duket se ka dashur të fshehë identitetin pas syzeve të errëta e shallit shndërruar në një shirit mbi flokët  e kapur pas. Madje dhe dora e mbërthyer në trikon e gjatë duket se ajo, shamikuqja moderne, pikërisht nuk do të ekspozojë asgjë.

Enada Hoxha

Nuk është shami si gjithë të tjerat. Nuk është as vello. Një kombinim  i klasikes me modernen. Por jo thjesht kaq. Një zgjedhje  që mund të dukej e guximshme, por s‘ka qenë e gabuar. Një produkt fantazie nga Geraldina Sposa, e cila e ka bërë dhe më të veçantë ditën e martesës së dy balerinëve e më të hijshme e fine nusen. 

Lindsay Lohan

Më fakt më tepër ngjan me liderin e grupit Guns’n’roses, Axel Rose sesa me aktoren e lakuar shpesh në rubrikat e thashethemeve. Shalli i lidhur në ballë si kurorë në flokët e stërgjatë të lënë në rritje të lirë, plus forma e syzeve të diellit, nuk ta ndalojnë dot fantazinë që të çon në ngjashmërinë e qukëses me këngëtarin.  

Majlinda Bregu

Një rreth i hollë gati i padukshëm, por që bën të duket efekti i tij te flokët dhe te tërë fytyra me formë të gjatë, është një zgjedhje e përsëritur e Majlinda  Bregut. Jo më kot! Sepse vërtet i shkon. Në të kundërt zëdhënësja e qeverisë, njëkohësisht ministre e Integrimit, që aq shumë kujdeset për performancat e saj, nuk do ta mbante as një minutë më tepër.

Nicole Richie

Një pamje e vërtetë prej hipije për Nicole me këtë shall të thurur të lidhur në ballë. Ndoshta mëkatet që i kanë kushtuar ca ditë burg, e kanë bërë më rebele, fanse të jetës pa rregulla. E veshur sikur të ishte në pikë të hallit, edhe flokëve nuk u ka kushtuar asnjë rëndësi. Ata i valëviten mbi supe bashkë me rripat e stërgjatë të shallit.

Jonida Maliqi

Një tendencë s’ka nga shkon pa u provuar nga Jonida. Sigurisht e përshtatur me stilin e saj. Shamia në këtë mes nuk është ndjerë e tepërt. Lidhur fort pas kokës, me ngjyrë metalike, nxjerr më shumë pah tiparet e këngëtares. Vëthët rrathë kompletojnë idenë e një vajzë që dhe pse profesioniste në fushën e këngës, di të jetë po aq mirë një fashion girl.  

Mischa Barton

Shami e qëndisur e palosur gjerë dhe e lidhur në kokë duke fshehur vijën që ndan ballin nga flokët. ngjyra e kaltër e shamisë shkrihet me atë të syve të aktores që qukat rreth hundës e bëjnë akoma më fëminore. Është një dalje zyrtare në publik që përkthehet shamia mund të mbart stil, sidomos kur shkon.

Paris Hilton

Hilton këtë herë nuk ka bërë asnjë çmenduri. E veshur thjesht, qëndrim normal, madje dhe e kombinuar. Roza dhe portokallia e shiritit kombinohet me ngjyrat e kanotieres dhe skeletin e syzeve të diellit. I gjithë imazhi i biondes me ngjyrat solare, që zakonisht ajo përdor, nuk ka si të mos jetë i qeshur. Por kësaj here nuk të shkrin gazit!

Rihanna

Zgjedhje me  përmasa të mëdha. Si suksesi! Çantë e madhe, vëthë të mëdhenj si dhe shami e madhe. E ka lidhur fjongo në një anë mbi flokët pis të zinj të cilët bëjnë që ngjyrat ndezura të shamisë të kontrastojnë dhe më shumë e të duken qartas një nga një. E po të analizosh më hollësisht ato kombinohen dhe me ngjyrën e manikyrit e të çantës.

Zonjat Burberry

Monika Kryemadhi

Që VIP-at jokëngëtarë të spektaklit “C’est la vie” më tepër se gjithçka tjetër ishin aty për të dhuruar spektakël kjo kuptohej lehtë. Performanca është sigurisht pjesë e spektaklit  dhe zonjat nuk mund ta neglizhonin: çdo javë nga një veshje sa më shumë të qe mundur mbresëlënëse: një rreth Burberry mbi kokën e Monikës sigurisht qe një zgjedhje e tillë.

Arlinda Dudaj

Duket që bestseller-at janë një fiksim i përkthyeses që zotëron shtëpinë botuese Dudaj, jo vetëm në fushën e botimeve por dhe në atë të veshjes. Çdo veshje e saj është produkt i një firme të mirënjohur botërore në fushën e modës. As askesorët nuk lihen mënjanë, sidomos kur aksesorët e kokës kthehen në një “must” të sezonit. Një rreth Burberry në kushte të tilla  nuk kishte si të mungonte.

Mimi Kodheli

Gjithmonë e më shumë Mimi Kodheli, në konferencat për shtyp të PS-së ka filluar të spikasë edhe për “look”-un. E duket se një nga armët  e forta të përdorura nga zëdhënëdsja e kryesisë janë bërë aksesorët, ndër të cilët rrethi, kuadratat e pagabueshëm të të cilit të çojnë menjëherë tek marka “Burberry”. Kombinimi i ngjyrave karakteristike me veshjen, e kanë bërë edhe më chic performancën.