Nëse fotot do të ishin bardhezi e nëse protagonistet nuk do t’i njihnim kaq mirë, me siguri do t’i ngatërronim për foto të prera nga revista të zverdhura të viteve ‘40-‘50. E ka fajin modeli i flokëve. Një “faj” aspak i dënueshëm, sepse i ka bërë të duken edhe më sharmante, si të ardhura nga kohët e dikurshme  

Jennifer Lopez

Mami e re, jetë e re. Duket se pas këtij rregulli ka shkuar latinia Jennifer Lopez. Pas lindjes së binjakëve, duket se ajo hija prej zonje e ka pushtuar pakuptueshëm. Në fakt, jo dhe aq pakuptueshëm. Po të shohësh modelin e flokëve alla Marlene Dietrich, nuk është e vështirë për të kuptuar se ky ka qenë qëllimi, të duket pikërisht ashtu.

Claudia Schiffer

Sikur të mos ishte për emrin, vështirë të dallohej se është pikërisht top modelja e famshme, që ka pozuar për numrin e qershorit të revistës “Vogue”. Me atë model flokësh si Rita Hayworth, duket tamam si divet e dikurshme.

Albana Osmani

Çmenduritë ekstravagante me flokët dhe grimin, që kemi parë në paskuintat e edicioneve e shkuara të Top Fest-it, janë histori e shkuar. Sepse këtë vit që ka qenë ajo prezantuese, Albana ka ndërruar tërësisht pamje me një model të ri flokësh, krehur me onde të mëdha. Duket kaq ndryshe... dhe kaq bukur.

Christina Aguilera

Ky model në flokët e këngëtares nuk fiksohet për herë të parë. Në disa nga videoklipet e saj, i ka krehur pikërisht kështu. Duket se është e prerë për një look “vintage”, që e bën edhe më interesante sesa kur shfaqet si brune trendy.

Eva Longoria

Maniakja e modës nuk mund të linte pa e provuar edhe këtë stilin e ri që ka shpërthyer mes të famshmeve. Ka nxituar t’i kërkojë parukieres së saj personale pikërisht këtë stilin e ri, frymëzuar nga vitet e shkuara.

Alketa Vejsiu

Që në edicionin e parë të “Më shumë dashuri” e deri më tani është shfaqur veçse kështu: e veshur me kostume e këmisha dhe flokët biondë në model “të vjetër”. Nuk janë dhe aq rregullat serioze të formatit të emisionit sa mund të jetë fakti që Alketës po i pëlqen shumë stili i ri prej zonje.

Katherine Heigl

A nuk ngjan tamam ai Marilyn Monroe? Fytyrë rrumbullake, buzë të kuqe, buzëqeshje vesh më vesh, flokë biondë dhe krehje me onde të mëdha, të ndara në anë. Një dive e shkuar dhe një që shkel tapetin e kuq të ditëve tona.

Monica Bellucci

Provoi vetëm një herë të bëhej bionde. Shumë thanë se dukej seksi. Ajo nuk vonoi të kthehej në realitet, me ngjyrën e përjetshme gështenjë dhe gjatësi deri te supet. Lojërat nuk janë për të. Është mjaft e bukur edhe pa to. Ama s’mund të mos infektohet edhe Monica nga modeli i ri.

Natalie Portman

Ëmbëlsia e fytyrës dhe e tipareve të buta duket se shkon për bukuri me kurorën e flokëve që janë ndarë nga e djathta, për t’u derdhur mbi supe. Nuk i japin hijen e një zonje të rëndë, por sharmin e një femre me klas.