Ngjyrat diellore e verdhë dhe portokalli këtë stinë do sundojnë gardërobat. Edhe të personazheve VIP. Ja disa nga zgjedhjet e tyre

Eva Longoria

Eva ka vënë në dukje tërë elegancën dhe ngjyrën çokollatë të trupit me fustanin e saj të shkurtër të verdhë. Ka veshur këpucë të gjelbra për të hedhur hapin e modës së kësaj pranvere dhe vere e sigurt.

 Jennifer Lopez

Është fotografuar duke dalë nga një restorant me bashkëshortin. Ka zgjedhur një fustan të përshtatshëm: të gjerë, për të mos lënë të duket asnjë gjurmë nga lindja e binjakëve, dhe ngjyrë të verdhë, siç e do moda.

Paris Hilton

Është e veshur me një fustan me lule portokalli në një sfond të verdhë të shkëlqyeshëm, që i zbret poshtë gjurit duke i dhënë një pamje të ëmbël dhe si rrallë ndodh me të... normale.

 
Victoria Beckham

Sandale dhe fustan të së njëjtës ngjyrë. Ka humbur siluetën elegante me këtë fustan të ngjashëm me atë të grekeve, por ky shkon deri në gju dhe ngjyra e bardhë e dikurshme është portokalli.

 
Arta Dade

Kur bëhet fjalë për të veshurat me portokalli, nuk mund të mos kujtohet Arta Dade me zgjedhjen e saj njëngjyrëshe nga koka te këmbët (kostum, aksesorë, këpucë) ku vetëm nuancat ndryshojnë.

Sonila Meço

Det, abronxaturë dhe veshje ngjyrë portokalli. Si bluza e Sonila Meços apo lulet në fundin e saj. Duket se fotoja është bërë për të treguar se këto të treja kombinohen.

Soni Malaj

Nëse po e imagjinonim portokallinë thjesht mbi copa të lehta, ja ku na vjen një propozim me peshë: xixa që shndrisin në një copë portokalli të ndezur. Përfundim verbues!

Vesa Luma

Këngëtarja kosovare në finalen e Top Fest-it kishte zgjedhur një fustan tub ngjyrë pjepri në portokalli. Sepse kur ngjitesh në skenë nuk duhet të pëlqehet vetëm kënga.

 
Eneda Tarifa

 
Stil tejet i thjeshtë për Enedën, fotografuar duke shkuar si spektatore në një sfilatë mode. Një sarafan xhins, balerina të gjelbra dhe një bluzë pambuku e verdhë. Duket që ka zgjedhur thjesht të jetë komode, ndërsa të tjerët bëjnë modën.

 
Inis Gjoni

Në stilin e saj të ri të veshjes, një këmishë është thuajse gjithmonë e pranishme: një vjeshtë nën pulovër, ndërsa tani nën fustanin me rripa, që dikur do vishej pa pikë problemi vetëm. Gjithsesi, dhe pse mungon dekolteja, këmisha e verdhë ka forcën e vet tërheqëse.

Mariza Ikonomi

Ajo, kësaj here, ka zgjedhur një fustan të zi të shkurtër me një xhaketë të verdhë me mëngë të gjata për të mbuluar supet. Kështu, nuk rrezikon të duket shumë klasike.

 Rosamund Pike

Ka zgjedhur për ceremoninë e ndarjes së statujave të famshme, një veshje me dy pjesë, bust dhe fund të gjatë: prerje elegante dhe një ngjyrë e verdhë e ëmbël, që e bën të duket shumë skenike mbi tapetin e kuq.
 
Julianne Moore

Është veshur me një fustan në ngjyrë të verdhë kremoze në Festivalin e Filmit në Kanë, organizuar në maj të këtij viti, në nuancat e të cilit ka zgjedhur dhe aksesorët. Kuleta e zezë dhe pjesët dekoruese në supe thyejnë këtë performancë kremoze të kuqaloshes.