Të thinjur e gjithsesi të pashëm e seksi. Sepse për disa meshkuj ngjyra e bardhë e flokëve është ajo që u shkon më tepër. Në kohë ose më parë, thinjat janë thjesht një bekim për ata që me ca thinja më shumë janë edhe më sharmantë

Dy situata paralele. Një femër sheh veten në pasqyrë. Tek rregullon flokët dallon një fije të bardhë shumë të dukshme. E sheh pastaj me vëmendje, filozofon për jetën, plakjen. E këput ose mundohet ta fshehë mes fijeve të tjera. Gjithsesi, kur del nga tualeti nuk është po ajo. Duhet të sforcohet për të qenë në humor.

Dikush tjetër kalon gishtat tërë krenari mes flokëve plot thinja, e i lëshon pasqyrës përballë shikime seksi pa fund, krejtësisht i kënaqur me pamjen e vet. Por kjo, nëse para se të shihej në pasqyrë ka hyrë në një derë me simbol këpucë mashkullore apo një figurë pa fustan. Dy situata paralele sepse vërtet nuk takohen kurrë në një pikë. Mund të kenë ama dhe një takim surprizues. Ai dhe ajo që shihen në korridor. Nuk është për t’u habitur që me një vështrim, një mashkull i thinjur seksi, t’i rikthejë humorin e prishur nga një thinjë. Të papranuarat tona, nuk i shqetësojnë gjithmonë ata.

Duket se thinjat i barazojmë me problem vetëm ne. Ose të paktën ne e bëjmë përherë.

Vërtet ti deri dje i ke lyer flokët, shumë- shumë tani do të kesh kujdes të zgjedhësh ato bojërat që duket se mundësojnë, ose më saktë reklamojnë, mbulimin 100 për qind të thinjave, por kjo nuk është një detaj. Sepse më parë lyerja ishte një etapë estetike e bërë thjesht për qejf, kurse kur ti ndihesh e detyruar për ta bërë, urdhëruesin, si dikur fëmijë, prindërit, apo mësuesit, nis t’i marrësh inat. E ndonjë arsye për t’i pasur qejf thinjat nuk e gjejmë dot. Ndërsa seksi tjetër duket se relatat me to i ka më të mira.

Po t’i lënë flokët e thinjur, si pjesa dërrmuese e meshkujve bëjnë, nuk duken fare si të lënë pas dore. Madje shumë ia kanë gjetur batutën shpëtimtare, problemit të thinjave,  që i nxjerr ato shenjë fisnikërie.

Por një femër me flokë të thinjur veç si një me kokë mendimtare, që nuk do komentohej. Të gjithë do ndaleshin te neglizhenca e saj. Ndërsa për pjesën dërrmuese të femrave, thinjat mbeten një çështje private, një sekret i ndarë me parukieren, për zonjat e spektaklit apo kinemasë thinjat janë një kuriozitet që nuk e shuajmë dot. Krejt ndryshe nga ç’ndodh me meshkujt. Të gjithë i njohim disa ikona seksi të Hollyëoodit, të cilët ose nuk i mbajmë mend pa thinja, ose nuk kemi pse kërkojmë t’i mbajmë mend sepse thinjat i kanë dhënë sharmin që nuk ka pse të lëvizë një fije.  E pra këtë garë duken se e kanë fituar. Po ne nuk kemi humbur asgjë. Sepse nuk ke çfarë humbet kur poli që të tërheq, bëhet më tërheqës me ca thinja në flokë.  Disa thinjen herët pa shkelur të 30-at, disa nisen pas kësaj moshe t’i binden një ligjësie, që nuk është gjithsesi universale, sipas së cilës pas moshës 30 vjeç, thinjat shtohen çdo dhjetëvjeçar afërsisht 10-20 për qind.

Si rezultat i moshës, gjeneve, ndryshimeve hormonale, fizike, ose faktorëve të klimës, veprimi i melaninës, që i jep ngjyrë flokëve, ndryshon. Pigmenti prodhohet në sasi më të vogël ose më të madhe, ndërsa ngjyra natyrale përkatësisht hapet ose errësohet. Për sa i përket thinjave ato shkaktohen nga minimizimi i melaninës si shkak i moshës apo gjeneve. Aktiviteti i saj nis të zbehet, bashkë me ngjyrën e flokëve sepse prej asaj flokët marrin ngjyrë. Vetë fija është e bardhë, por kombinimi i pigmentit të errët (eumelanin) dhe të hapur (phaeomelanin) në raporte të caktuara formojnë gamën e ngjyrave natyrale që kanë flokët e njerëzve. Melanina prodhohet në shtresën mesme të lëkurës së kokës. Me moshën melanina fillon e reduktohet. Flokët bëhen gri dhe  më pas zbardhen. Një sugjerim është se në rrënjë e flokëve ka një “orë melanogjenetike” që ngadalëson ose ndalon aktivitetin prodhues të melaninës duke ulur kështu pigmentin që marrin flokët. Kjo ndodh në shkallë të ndryshme në folikula të ndryshme. Për disa, kjo ndodh menjëherë, te të tjerë ngadalë në dekada të ndryshme. Është pak a shumë si ka ndodhur me Richard Gere dhe George Clooney. Sigurisht nuk janë të gjithë aq të sukseshëm e të pashëm me thinjat e tyre, por ama të gjithë e njohin dikë që ashtu si themi për femrat, që u shkon kjo apo një tjetër ngjyrë flokësh, thinjat u shkojnë shumë. Po mos u lodhni duke u menduar për t’i gjetur (se thinjeni). Ne po ju propozojmë më të spikaturit.

Richard Gere

Është hapur një lojë: Kush e mban mend të pathinjur, fiton çmimin… “kujtesa më e fortë e gjërave pa vlerë”. Një nga aktorët më të parezistueshëm të Hollyëoodit, i thinjur fare shpejt, sa kushdo e identifikon pamjen e tij me thinjat e pandara prej vitesh. Sot afërsisht 60 vjeç dhe mund të pretendohet që thinjat kanë takuar moshën e tyre, por deri më tash ai e ka pritur moshën me flokë të bardhë: ngjyra që i shkon më shumë se çdo tjetër. E pamohueshme!

George Clooney 

Dikë që nuk e pëlqen nuk e kemi takuar ende. Ashtu si dhe një tjetër që të thotë për të: “sa keq që është thinjur”. Flokë gri prej kohësh që sa vijnë e hapen dhe më shumë, ndërsa ai mbetet i njëjti: ikona e mashkullit që pëlqehet nga të gjitha. Ndoshta se pse është i pa ekzagjeruar dhe në pikën që nuk ka flokë pis të zinj, kur mosha nuk do ia lejonte.

Michele Zarillo

Mund të ngjajë si një i thinjur i parakohshëm. Por nuk është dhe aq. Dhe pse i ka thënë lamtumirë para kohe ngjyrës së errët të flokëve të tij me kaçurrela, (një pamje për mos t’u pasur zili, krahasuar me të tanishmen) ai është në një moshë ku thinjat nuk do habisnin askënd, plot 50 vjeç. Po ja që vajzat shqiptare në Pallatin e Kongreseve, dimrin e kaluar thërrisnin për të ftuarin: “Sei bellissimo!” . E thonë pastaj që thinjat të tregojnë më të plakur!

Alessandro Saffina

I talentuar, i pashëm, elegant, i thinjur. Duket se këtë të fundit e kemi ngatërruar në vrullin për të bërë komplimenta për të. Por në fakt një foto e shkrepur në çfarëdo skene do i jepte kuptim shkallëzimit komplimentues. Ai në të vërtetë është 44 vjeç, jo më një djalosh, por pamja është prej një të tilli. E thinjat s’kanë bërë tjetër, por i kanë shtuar sharm joshës. 

Leslie Nielsen & Neritan Ceka

Leslie Nielsen

Aktori komik amerikano-kanadez prej vitesh është po i njëjti: e njëjta energji, e njëjta pamje ku spikat koka e bardhë, po totalisht e bardhë ama. Për ne shqiptarët, është sigurisht dhe versioni komik i Neritan Cekës. Vitet nuk lexohen me raport fijesh floku, sepse fijet e errëta nuk kanë përfaqësues. Në moshën 81 vjeçare kjo as nuk do pretendohej, por kur ai është krejtësisht i thinjur prej dekadash, nuk mund t’i vinim mungesë në të thinjurit e famshëm. 

Neritan Ceka 

Historiani që të gjithë e njohin si politikan që në fillim të viteve ’90, për një amerikan sigurisht do ishte më shumë: sozia e Leslie Nielsen. Patjetër që një peshë të konsiderueshme në këtë ngjashmëri kanë flokët e bardhë dëborë. Është një tipar gjenetik i trashëguar që e ka bërë Cekën jo vetëm një të thinjur të parakohshëm, por një të thinjur total deri në përsosmërinë që nuk gabon asnjë fije floku.   

Helidon Fino

Aktori i talentuar i Teatrit Kombëtar  është një nga ata që po ta shohësh nga afër të habit me thinjat që kanë nisur t’i dallohen. Nga larg, kur është në skenë, pak mund të vihet re ose aspak duke qenë  plotësisht të mbërthyer pas rolit, por dhe idesë se ai është i ri në moshë. Por ja që lidhja e thinjave me moshën nuk është absolute. Me Elidonin si rast nuk të vjen aspak keq për këtë, se i shkojnë me të vërtetë.

Dhimitër Gjoka

Një ikonë e folësve  të lajmeve. Një imazh dhe zë që mbetet i pëlqyer në vite. Më shumë përvojë e më shumë thinja vetëm mirë që bëjnë tek Dhimitër Gjoka, i cili ndoshta është alternativa më e lehtë që të kujtohet kur kërkon burra shqiptarë të pashëm të brezit të tij. Moshës nuk ke çfarë i bën, por ndonjëherë ajo të bën edhe më të pashëm.

Edi Rama

Fizikisht ai është fillimisht një mashkull shumë i gjatë. Për një sy më të kujdesshëm është një mashkull me duar të bukura. Prej ca kohësh ama, është dhe një nga ata që thinjat e një 40 e ca vjeçari i duken përherë e më shumë. Fijet e bardha në tëmtha gjithsesi nuk flasin dot kundër energjisë së tij, madje as kundër pamjes së spikatur të politikanit.