Edhe nëse nuk i kishim ndër mend, ja ku na dalin përpara: atëherë kur look-u i tyre të shtie frikën. Të gjitha gabimet, e sidomos lajthitjet në stil të verës 2007, të disa nga femrave më të njohura. Dhe kur gabojnë edhe ato, ne të vdekshmet e thjeshta...!

Vishen me fustanka me lule, por nga ato shumë të shkurtrat dhe me supe të rrëzuara. Mbizotërojnë tutat e pambukut, kudo përveçse nëpër palestra. Zgjedhin aksesorët dimërorë për ngjyrat e ëmbla të verës. Apo çizme të rënda nën kanotieret e lehta në këmbët që po plasin nga i nxehti. Ndërsa veshje me prerje nga më të habitshmet mbyllen në mënyrën më të tmerrshme mbi trupat e shëndoshur të VIP-ave të keqkuptuar, të shëmtuar edhe më nga ca prerje flokësh të papara.

Nga Britney Spears tek Avril Lavigne, nga Eva Green tek Sharon Stone, nga Jozefina Topalli tek Hueyda El Sayed: asnjëra prej tyre, as rishtaret e kësaj rubrike dhe as ato që janë mësuar t’u lakohen tmerret e “look”-ut, nuk u ka shpëtuar objektivave të aparatit fotografik që ka sjellë kryeveprat e shijes së keqe.

Britney Spears

Sigurisht që për Britney-n kjo është një periudhë mjaft e vështirë: divorci nga Kevin Federline ishte i saposhpallur kur një tjetër shtatzëni e përfolur - kësaj radhe nga një baba i panjohur - ishte goditja e fundit mbi një fizik të shformuar për shkak të abuzimeve të këngëtares. Palè pastaj që paparacët nuk e lënë për asnjë çast të qetë: e megjithatë, Spears-i nuk është se nuk ka pikën e fajit, madje duket sikur i tërheq pas vetes si mjalti mizat. Faji pikërisht i këtoj look-u: i pranueshëm për adoleshentet, nuk i përshtatet aspak fizikut të Spears-it, me këmbët aspak të tonifikuara dhe me shenja të nxirash (fryt ndoshta i përplasjeve me paparacët), që kanë dalë në dritë në sajë të fustanit me lule shumë të shkurtër e me supe krejt të zbuluara me rripa që varen. Ndoshta Britney që në vend të rregullave të elegancës ka futur në kokë ca rregulla të tjera që e bëjnë të marrë pamjen e një shtëpiakeje të dëshpëruar.

Hilary Duff

Dhe të mendosh që deri në njëfarë pike është improvizuar edhe si stiliste mode. Por rruga është ende shumë e gjatë për të arritur, jo perfeksionin që jo e jo, por edhe njëfarë paraqitjeje të pranueshme. Duke nisur nga zgjedhja e këpucëve e duke vazhduar me shfaqjen e tutave në rrugët e qytetit. 

Avril Lavigne

Këngëtarja ka një koncept shumë të veçantë për bizhuteritë, aspak të ngjashëm  me atë të shumicës së njerëzve. Kjo e bën me sa duket të vendosë të kombinojë bizhunë e kuqe tronditëse me rrobat e banjës gati të tejdukshme që dallohen nga poshtë kanotierës së verdhë.

Për t’i vënë kapakun kësaj çorbe, xhinse të shformuara kaq të gjata( krahasuar me gjatësinë e Avril-it), sa përfundojnë bashkë me shijen e veshjes, poshtë shuallit të pantoflave të saj.

Jessica Simpson

Nuk mjafton një çantë e stërmadhe për të qenë në modë, po këtë Jessica Simpson duket se nuk e di.

Dhe kështu shfaqet rrotull plot krenari e veshur si për vrap, veshje krejtësisht e papërshtatshme, sa ajo nuk është duke ushtruar sportin e lodhshëm, me çantën e madhe firmato që bie goxha në sy. Ajo mund të jetë e kënaqur, por fanatikët e elegancës me siguri aspak. 

Eva Green

Të lë me gojë hapur, nga horrori ama, kompleti i veshur nga Eva Green, një nga aktoret më me sharm të panoramës kinematografike. Të paktën ishte, deri sa nuk u prezantua në publik e sajuar në këtë farë feje e me një model flokësh që t’i ngre qimet e kokës përpjetë nga frika.

Për ta shfajësuar pjesërisht mund të thuhet se fatkeqja duket si në siklet e katandisur ashtu, sikur dikush (një stilist sadist? Një sponsor që duhet kënaqur?) ta ketë detyruar,  me pistoletë në ballë, të flijohet në altarin e kush e di çfarë perëndie shëmtie.

Sharon Stone

"Sa më shumë isha e zhveshur, aq më shumë isha e kënaqur ", duket se ka thënë ajo rreth interpretimit në filmin Basic Instinct 2, për të cilin mori në vitin 2006 trofeun Razzie si aktorja më e keqe protagoniste.

Faktikisht, kohët e fundit Sharon Stone duket se ka një raport shumë të keq me veshjet: mjafton të shohësh në ç’gjendje është fotografuar (shihni imazhin afër). Po ta mendosh dy herë Stone ka të drejtë: më mirë pa rroba sesa të jetë e veshur kështu.

Sarah Jessica Parker

Deri tani protagonistja e “Seksi dhe qyteti” ishte ndër ikonat e elegancës  më të admiruara nga “fashion victim”- at e gjithë botës. Dhe aktorja nuk i ishte larguar kurrë identifikimit me protagonisten e telefilmit, gjithmonë në modën e fundit e pa asnjë detaj të pavend.

Por së fundmi diçka ka ndryshuar. Duket nga fustani me mëngë me topa plazhi (apo nëndetëse?)  që ia gllabërojnë krahët aktores, të cilën ishim mësuar ta shikonim të veshur me rroba më të përshtatshme për personalitetin e saj e sidomos fizikun.

Nëse Sarah ka dashur të distancohet nga look-u i pagabueshëm e seksi i Carrie-t, ia ka dalë shumë mirë.

Britney Spears (rikthimi)

Britney ka vënë shpirtin, e është angazhuar në maksimum për të kombinuar lulkat e fustanit me çantën, këpucët e ( ky është një fiksim i saj) me rripin në flokë. Mëkat që efekti final është një sforcim që e bën të duket si një provinciale me veshjen e festës,  në vend të një (ish) star-i të muzikës që kërkon të shfaqet chic.

Emma Watson

Kishte nisur të prezantohej mirë, aq sa disa zëra që ngjanin të mirinformuar, thoshin se ishin gati të bënin be që ajo do bëhej imazh i Chanel.

Dyshojmë se kjo “detyrë”, në rast se zërat nuk kanë gënjyer, do jetë shumë larg, duke parë që e ashtuquajtura  alter-ego-ja e  Hermione Granger-it është kapur në fragrancë nga fotografët e sajuar në këtë mënyrë. Më e keqja është se ajo edhe ka pozuar.

Fustani është aq për të ardhur turp sa e gjora Ema gati nuk njihet. E zhytur pastaj në atë palë çizmesh si me gungë të ngjall një ndjenjë mëshire sa menjëherë do ta këshillosh që herë tjetër të shkojë te stilisti e mos të vishet vetë. Kurrë!

Keira Knightley

Ku do jetë duke shkuar Knightley me këtë hap, me kapelen e rrasur në kokë e çizmet prej kauboj, që do ishin të përshtatshme në sallonin e setit të një filmi uestern? Po të ishte kështu në këtë pikë do mendonim një fund të gjerë me thekë në vend të streçeve të ngjitura pas trupit. E po kështu nuk pretendon dot as për një ide!

Sienna Miller

Ja dhe Miller si të ishte e pastrehë: me kapele, me një bluzë të rrudhosur, një varëse me rruaza me ngjyra prej hipi-je e, qershia mbi tortë, ca çizme me rripa të shtrënguar në kavilje me pjesën e mbetur të varur.

Diçka për të mbuluar mbathjet? As e çon nëpër mend! Kur martohesh, arsyet e atyre që mbeten trok duhen konsideruar.

Tori Spelling

Vërtet bëhej fjalë për verë, por fustanet me lule këtë periudhë u përhapën më shumë se duhet.

Nuk duhet harruar edhe se ka fustan e fustan: disa janë chic, të tjerë më pak. I përket kategorisë së dytë ai i Tori Spelling, ngjyrë e kaltër e mbyllur me lule, dukshëm jo maksimumi i rafinimit. Për t’i vënë shkelmin gjithçkaje shërben gjatësia: shumë i shkurtër për 35 vitet e mbajtura keq nga ajo e këmbët robuste që ka. Janë ca gjëra që duhet t’i kishin rënë në sy.

Jozefina Topalli

Politika shqiptare i pati ca evenimente këtë verë. E Jozefina Topalli mund të thuhet se u bë sërish protagoniste, jo si vitin e kaluar, ku qëndronte në fashën “alta tensione” për shkak të zhvillimeve në Parlament, por si kryetarja që me rastin e betimit të Presidentit kishte zgjedhur me kujdes dhe një veshje jo si të seancave të zakonshme: kostum i kaltër, material i fortë që siguronte shkëlqimin metalik, një trëndafil i stërmadh montuar në xhaketë, e mbi të gjitha fundi deri në fund të këmbëve që vazhdonte me një bisht të gjatë që e ndiqte nga pas tek shoqëronte Presidentin e ri në sallë. Seancë si kjo Parlamenti vërtet nuk kishte parë!

Hueyda Elsaied

Secila nga ne i rikthehet shpesh gardërobës së saj, ditët vetëm rrjedhin, e kuptohet që veshjet nuk mund t’i ndjekin me të njëjtin hap. Por kjo kur flitet për veshjet e përditshme e për ne njerëzit që blicet që na shkrepen në fytyrë janë ato të aparateve fotografikë të miqve apo familjes. Sepse kur je e njohur e kur imazhi e performancat të mbeten jo vetëm në albumin personal ca gjëra duhet t’i mbash parasysh. Si për shembull mos t’i kthehesh fustanit të veshur në prezantimin e Festivalit të Dhjetorit para disa vitesh, për të shkuar në  ndarjen e çmimeve “Kult” në një mbrëmje vere. Habitemi pse ka synuar pikërisht këtë përsëritje, ku as tymnaja e tyltë as modeli i stërgjatë e voluminoz i fustanit nuk ishin një kërkesë e kësaj vere.

Rona Nishliu                    

Po ku shkon o Rona me atë hap ushtarak aq të rëndë e të madh (sigurisht kjo meritë e këpucëve që ke mbathur)? Këpucët janë surpriza e radhës mbi të cilën shkel këngëtarja kosovare në Top Fest-in e fundit. Mungojnë lidhëzat me ngjyra të ndezura e forma prej këpuce klouni me të cilat është shfaqur më parë, por çudia që të lënë në sy është po ajo. Pastaj streçe, një pseudo fustan i shkurtër, që ngjan si një balonë e shpuar që e ka zënë brenda e padyshim flokët xhamajkan, të cilët në këtë stil të hallakatur duken pjesa më

normale.

Zanfina Ismajli

Zanfina dypolare: në veri verë e në jug dimër. Është veshur në një model dy pjesësh: lart në vend të bluzës një varëse me shumë fije të shndritshme e reçipeta që dallohen nga rripat e përdredhur. Poshtë nuk i dallohet një centimetër lëkurë sepse streçet e ngushta të zeza i rrëshqasin poshtë ca çizmeve dimërore që prekin gjunjët. Nuk arrin dot as të fshehë kilogramët që ka marrë këto kohë, po me sa duket këtë Top Fest “s’do t’ia dijë” për asgjë.