Ndahen sot trofetë e "Apollon '08"

17.05.2008 11:37 Kulture - Burimi: Balkanweb Kulture

Rrugëtimi i edicionit të shtatë të Festivalit barëkombëtar të Aktrimit "Apollon '08" mbyllet sot në mbrëmje në Parkun Arkeologjik të Apollonisë. Një ceremoni çmimesh do të kurorëzojë aktorin më të mirë të këtij edicioni, të mbështetur nga Bashkia e qytetit të Fierit dhe Ministria e Kulturës, Rinisë dhe Spo-rteve. Përgjatë një jave, shtatë trupa janë ngjitur në konkurrim në skenën e teatrit "Bylis" dhe në destinacione të tjera jashtë qytetit. E fundit që është ngjitur në skenë ka qenë shfaqja "Pamje nga ura", e Artur Miller nën regjinë e Albert Mingës. Ndërsa ende pritet vlerësimi i jurisë, përbërë nga aktorët Tinka Kurti, Bujar Asqeriu dhe Niko Kanxheri, është vënë re se publiku ka qenë shumë afër festivalit të sivjetshëm. "Në lëmin e aktrimit do të veçoja lojën e Çun Lajçit, Blerta Sylajt dhe Vedat Haxhiismalit, me dramën "Përplasja" të Ekrem Kryeziut. Ishin në unitet të jashtëzakonshëm të fjalës dhe lëvizjes. Realizuan një përshtatje dhe një interesim të spektatorit të përzgjedhur e që është njohës i teatrit. Edhe shfaqja e Durrësit, "Të gjitha të njëjtën histori" vënë në skenë nga Driada Dervishi, dha elemente shumë interesante të aktrimit me monologë të vazhdueshme. Ndërsa një tjetër shfaqje kompetitive ka qenë "Pamje nga ura", me interpretimin e aktorit të njohur Timo Flloko. E reja e këtij edicioni kanë qenë dhe takimet e aktorëve dhe regjisorëve në tri shkolla të kualifikuara të Fierit, që japin dimensionin e së ardhmes dhe janë kthyer në takime dhe festa të vërteta", - shprehet kritiku i teatrit Adriatik Kallulli, i cili ka ndjekur gjatë gjithë kohës festivalin. Ka qenë trupa teatrale e Fierit ajo që ka çelur këtë festival me "Fqinjët", e Rruzhdi Pulahës dhe regji të Dhimitër Orgockës. Drama e Ekrem Kryeziut "Përplasja", vendosur po me regji të tij, dhe interpretim të Çun Lajçit, Blerta Sylajt dhe Vedat Haxhiismali kanë qenë të dytët në konkurrim. Vlerësimet për këtë dramë kanë shkuar edhe nga Josif Papagjoni. "Nga shfaqjet më mb-resëlënëse ishte drama "Përplasja", e Ekrem Kryeziut, nën interpretimin pasional dhe brenda një kahe të thukët psikosociale prej aktorit të mirënjohur Çun Lajçi. Shfaqja përcolli me ndjeshmëri makthin e njeriut shqiptar nën burgjet e tmerrshme serbomadhe, tjetërsimin dhe deformimin e tij si pasojë e dhunës dhe pajtimin e delirin në rrethanat çnjerëzore. Tutje kësaj shfaqjeje erdhi një nga arritjet e shquara të Teatrit Kombëtar të këtyre viteve drama e njohur e Artur Milerit, "Pamje nga ura", ku spektatori fierak, voli kënaqësi të thella estetike nga loja plot pasion e aktorit të mirënjohur të kinemasë, por edhe teatrit Timo Flloko, në rolin e protagonistit Edi Karbone. Sikundër edhe nga interpretimi i fortë dramatik i Bujar Asqeriut, në rolin e Markos, Yllka Mujos, në rolin e Beatris apo dy të rinjve të talentuar, si Indrit Çobani dhe Ota Gixhari. Kjo shfaqje na dëshmoi dhe njëherë se kur puqen në një, prekja e një realiteti të dhimbshëm me cilësinë teatrore, impakti i realizuar mbërrin sipërinë e vet", - shprehet Papagjoni. Ai ka vënë fokusin edhe në shfaqje të tjera të festivalit, që sipas tij kishin edhe elementë të diskutueshëm. Pjesëmarrjen si përshëndetëse të trupës së Teatrit Shtetëror të Korfuzit me shfaqjen "Baçhae" e ka konsideruar një pjesëmarrje të veçantë, ndërsa thekson se "do të ishte e dëshi-rueshme që të bëheshin trajtime më serioze lidhur me mendimin estetik mbi aktrimin, kahu dhe trendi i të cilit është dhe ky festival, ballafaqimin e përvoja të më të vjetërve me më të rinjtë, pa humbur shumë kohë në analiza të komponentëve të tjerë teatrorë që janë objekte të festivaleve të tjerë", - shprehet ai.

Artikullin origjinal mund ta lexoni ketu

lajme.parajsa.com