"Një thirrje e humbur" - vdekja pret në linjë

15.08.2008 18:15 Kulture - Burimi: SHQIP Kulture

Imagjinoni sikur të merrni në celularin tuaj një mesazh zanor, që ju predikon vdekjen. Në filmin "One missed call", në shqip "Një thirrje e humbur", Bett Rejmond (interpretuar nga Shannyn Sossamon) ka parë të vdesin dy nga miqtë e saj më të mirë dhe dyshon se pas telefonatave ka diçka të errët, por askush nuk e beson. Jo tamam askush, pasi është detektivi Jack Andrews (interpretuar nga Edward Burns), i cili ka humbur motrën e tij në rrethana të ngjashme dhe që bashkë me Betin vendosin të zbulojnë misterin. Ndonëse kohët përparojnë, duket se jehona e horrorit nuk mund të vijë pa marrë hua ambiente dhe histori nga Orienti. Kështu, pas versionit amerikan të filmit "The eye", vepër e David Moreau dhe Xavier Palud, është radha e regjisorit francez Eric Valette, që të realizojë drejtimin e versionit të një horrori aziatik. Regjisorin e bindi skenari i firmosur nga Andrew Klavan, një skenarist i njohur në botën e kinemasë, që ka inspiruar Klint Istvud për të sjellë në ekranin e madh romanin "Mrs. White and True Crime". "Ajo që më pëlqeu nga skenari amerikan, thotë Valette, ishte forca e ritmit dhe e personazheve". Ndonëse është një fans i madh i regjisorit japonez Takashi Miike, autori i filmit origjinal, Valette, deklaron se nuk e ka parë "The Call". "Në Francë doli në kinema kur unë isha duke menduar çfarë të bëja me skenarin e versionit të ri dhe mendova se do të ishte më mirë të mos e shikoja dhe të mos kushtëzohesha gjatë punës sime". Të njëjtin qëndrim regjisori ua ka imponuar edhe aktorëve, duke u kërkuar që të mos e shikojnë filmin. Sipas regjisorit, "One missed call" ka atmosferën tipike të filmave të viteve ‘70. "Është sikur të kthehesh në rrënjët e horrorit, kur dhuna nuk tregohet me litra gjaku, por është më e rafinuar, më e pjekur përkundrejt filmave të tjerë hollivudianë", përfundon regjisori. Me regji të Eric Valette, e aktorët Shannyn Sossamon, Edward Burns, Azura Skye, "One missed Call", pasi ka bërë xhiron në shumë kinema të botës ka nisur të shfaqet edhe në kinema "Millenium".

Nga telefonata japoneze, te telefonata hollivudiane

Padyshim që "telefonata japoneze" ka qenë mjaft e suksesshme, përderisa ka nxitur "Warner Bross" që ta financojë, ndonëse me buxhet të vogël. Takashi Miike me filmin e tij arriti të hynte në një harmoni aq të përkryer me spektatorin, saqë në momente të caktuara, gjatë shfaqjes së filmit, të gjithëve u dukej sikur do t‘u binte telefoni dhe do t‘u paralajmëronte vdekjen. Megjithatë, edhe versioni amerikan i këtij filmi ka filluar të shfaqet të enjten në "Millenium 2" dhe nuk është më poshtë origjinalit. Filmi ka marrë dy nominime për dy protagonistët e tij. Në "Teen Choice Award" janë kandiduar si aktori dhe aktorja më e mirë horror Edward Burns dhe Shannyn Sossamon. Ndërkohë, mes dy filmave, ka disa pika të përbashkëta. "One missed call" përfshin disa skena që janë në filmin origjinal. Ai përfshin gjithashtu disa skena ekzorcizmi, ku një nga personazhet vritet, ndërsa është duke xhiruar shoun "American Miracles". Ngjashmëri të tjera vihen re në të gjitha personazhet e Beth Raymond, Leann Cole, Taylor Anthony, Jack Andrews dhe Brian Sousa, të gjithë të bazuar në personazhet origjinale.

Artikullin origjinal mund ta lexoni ketu

lajme.parajsa.com