Porti antik i Durrësit, së shpejti do të nisin kërkimet nënujore

10.05.2008 03:10 Kulture - Burimi: SOT Kulture

Për të katërtën herë zona nënujore e Durrësit do ti nënshtrohet kërkimeve. Shefi i sektorit të arkeologjisë nënujore Adrian Anastasi ka thënë se për momentin kanë mbaruar me përgatitjet e hartave arkeologjike nënujore dixhitale tredimensionale, për të vijuar më pas punën në terrenin nënujor. Në periudhën korik - gusht 2007, Instituti Shqiptar i Arkeologjisë në bashkëpunim me fondacionin detar RPM dhe Institutin Amerikan të Arkeologjisë Navale INA, zhvilluan për herë të parë projektin kërkimor shkencor ndërkombëtar, atë të bërjes së hartave arkeologjike nënujore dixhitale tredimensionale. Sipas shefit të sektorit të arkeologjisë nënujore, ky projekt ndahet në dy drejtime. Aspekti i parë përmbledh skanimin dhe bërjen e hatave dixhitale tredimensionale, ndërsa aspekti i dytë përmbledh skanimin, verifikimin e të gjitha anomalive të relievit dhe evidentimin apo inventarizimin e të gjithë trashëgimisë kulturore nënujore. Përdorimi i kësaj teknologjie të avancuar bën që me mbarimin e projektit të krijohen mundësitë për të hedhur të dhëna të reja duke pasuruar hartën në mënyrë të vazhdueshme. Kërkim studimi ka filluar në jug të bregdetit në kufi me Greqinë, nga Kepi i Stillos, për të vijuar më tej në veri të gjirit të Sarandës deri në jug të Kakomesë. Në këtë mënyrë është bërë skanimi gjithë fundit të detit të zonës, ku janë evidentuar një numër shumë i madh anomalish të relievit. Në jug të gjirit të Sarandës u evidentua siti i një anije transporti amforash, të cilat i përkasin shekullit të IV para erës sonë. Në veri të gjirit të Sarandës, një sit i cili përket qeramikës së periudhës bizantine, ndërsa në të gjithë zonën e skanuar u evidentuan 14 relite të cilat mund të klasifikohen nga shekulli XVIII deri në ditët e sotme.
Kërkimet arkeologjike
Bregdeti shqiptar do te jete edhe këtë vit arena e vëzhgimeve arkeologjike me synim nxjerrjen në dritë të fakteve që vërtetojnë qytetërimin mesdhetar në shekuj. Ekspeditat dhe vëzhgimet nënujore arkeologjike të viteve të fundit, të kryera në bashkëpunim me partnerët e huaj, do të vazhdojnë edhe përgjatë këtij sezoni veror në disa nga pikat me interes të bregdetit jugor dhe qendror. Dr. Adrian Anastasi, shef i sektorit te arkeologjisë nënujore pranë Institutit të Arkeologjisë, ka thënë se “në bregdetin e Durrësit vëzhgimet do të vazhdojnë për portin antik të Durrësi. Pasuria arkeologjike nënujore shqiptare ka nisur tashmë të inventarizohet. Dr. Anastasi tregon se puna për këtë qëllim nisi një vit më parë në bashkëpunim me dr. Jeffrey Royal të Fondacionit RPM Nautical nga SHBA. Më tej, Anastasi ka thënë se gjatë kësaj vere, ekspedita synon fillimin e një gërmimi arkeologjik nënujor në një thellësi mesatare, i pari i këtij lloji në vendin tonë. Gjithashtu ai konfirmon se gjatë këtij viti këto objekte do të ekspozohen për specialistët dhe publikun në Durrës, ndërsa synimi i largët është krijimi i një muzeu të arkeologjisë nënujore në kalanë e Ali Pashait në Porto Palermo në Vlorë. Gjatë verës së vitit 2008 janë parashikuar edhe vëzhgime nënujore në zonën e Triportit, në të cilën përmes objekteve qeramike janë konfirmuar kontaktet e para me detarinë mikenase, ndërsa në zonën e Orikumit shpresohet të njihen të dhënat e para për përplasjen e madhe detare mes Cezarit dhe Pompeut, mbi 2 mijë vjet më parë.

Artikullin origjinal mund ta lexoni ketu

lajme.parajsa.com