Mbrëmë nisi edicioni i 9-të i Festivalit Ndërkombëtar të Teatrove në Butrint. Prej datës 18-22 korrik do të ngjiten në skenën antike katër trupa teatrore

Festivali Ndërkombëtar i Teatrove në Butrint do të mbahet nga data 18 korrik deri më 22 korrik. Nga gjashtë trupa teatrore, me të cilat ishte lidhur kontratë për të ardhur në Butrint, vetëm katër prej tyre u prezantuan në festival. Shkaku i përgjysmimit të trupave pjesëmarrëse tashmë është bërë i njohur nga organizatorët e Festivalit, të cilët kanë pohuar se ishte përgjysimi i buxhetit nga Ministria e Kulturës. “Donim që në edicionin e 10- të kapnim standardet e festivaleve evropiane, duke hyrë në garë me to, por donatori ynë që është Ministria e Kulturës na ndaloi papritur, dhe nuk e prisnim këtë përgjysmim të fondeve”, është shprehur drejtori i festivalit Alfred Bualoti. Festivalin e çeli mbrëmë trupa shqiptare me ngjitjen në skenë të tragjedisë “Trojanët”, të cilën e ka përgatitur regjisori grek Vangjelis Theodoropulos dhe me asistent regjizor aktorin shqiptar Laert Vasili që karrierën e tij e zhvillon në Greqi. Theodoropulos është drejtor artistik i teatrit “Neo Kosmos” (Bota e Re) në Athinë dhe për gati 10 vjet ai bën projekte me aktorë profesionistë shqiptarë dhe të huaj. I pyetur për nismën e tij për të ngjitur me trupën shqiptare në skenë pjesën “Trojanët”, Vangjelis Theodoropulos është shprehur se “kisha një dëshirë të madhe për të njohur nga afër shqiptarët dhe Shqipërinë dhe ndërkohë kjo njohje ka ardhur e natyrshme, sepse më parë unë kam njohur aktorin e talentuar shqiptar Laert Vasilin dhe aktoren e karrierës Margarita Xhepa të cilën e vlerësoj për talentin që ajo ka treguar gjatë interpretimit të rolit”. Ndër të tjera ai tha se “Kështu unë punova në sallën e Teatrit Kombëtar në Tiranë dhe besoj se nuk do të kishte njohje më të mirë me Shqipërinë sesa duke punuar me artistët shqiptarë për të ngjitur në skenë historinë tragjike të Trojës. Unë jam shumë i kënaqur që po e bëj këtë, sepse “Trojanët” është një lloj vepre që i rri shumë mirë skenës antike të Butrintit. Ato rrënoja të kujtojnë pikërisht tragjeditë e shkuara dhe të sotme si barbarizmin e luftës, emigrimin, tragjedinë”. Regjisori grek Vangjelis Theodoropulos është shprehur se me mënyrën si ka punuar për këtë vepër ka dashur të bëj një lloj paralelizmi midis periudhës së antikitetit me tragjeditë që po ndodhin në ditët e sotme si gjenocidi serb në Kososvë, torturat e Guatanamos dhe luftra e Gjirit. Regjizori grek Vangjelis Theodoropulos me ngjitjen e “Trojanët” në skenë ka punuar me synimin që kjo vepër klasike të sillet shumë afër realitetit të sotëm. Trupa e aktorëve shqiptarë dhe kori gjatë interpretimit e kanë shoqëruar shfaqjen me këngë, vaje dhe ligje karakteristike shqiptare e ballkanike. Me lojën e tyre secili ka nxjerrë në pah emocionet për problemet e ndryshme sociale që po përjetojnë vendet e Ballkanit. “Me anë të këtyre veprave mund të ketë një komunikim shumë emocional, sepse kemi ne popujt e Ballkanit kemi shumë gjëra të përbashkëta”, tha regjizori. Regjisori grek Vangjelis Theodoropulos nuk e ka zgjedhur rastësisht skenën e Butrintit, historia e kësaj vepre e ka çuar drejt gjurmëve të qytetërimit të vjetër. Neoptolemeu, i biri Andromakës, sipas mitologjisë e dërgua në Butrint. “Emigrantët e parë grekë janë vendosur pikërisht këtu, në këtë vend të mrekullueshëm. Kjo lidhje nuk është rastësi, është pikërisht ky shkaku që pasqyrimi i kësaj vepre do bëhet në vendin më adapt të zgjedhur”, tha Theodoropulos

”Më gëzon prezenca ime këtu. Kemi një lidhje të gjatë historike, komunikimi im me aktorët në skenë vjen natyrshëm dhe edhe pse nuk di mirë shqip num më është dukur se po flasim në gjuhë të huaja”, thotë zoti Theodoropulos. Gjithashtu ai ka vlerësuar edhe aktorët shqiptarë. “Shqipëria ka aktorë shumë të mirë, por duhet shumë investim në teatër, pasi teatri është ai që luan një rol mjaft të rëndësishëm në edukimin e një individi”. Pjesa ''Trojanët " pasi mbaroi performancën e saj në Butrint do të vazhdojë turin e saj në teatrin e Vironasit për "Festivalin e Athinës" më datë 21 korrik, në një nga festivalet më të vjetra të këtij vendi. Për këtë shfaqje është treguar një interes i jashtëzakonshëm, si nga publiku i huaj dhe nga shtypi grek, që e ka titulluar si një nga evenimentet kryesore dhe më të rëndësishme për këtë fund sezoni artistik. Në gazetat e ndryshme greke janë shkruar artikuj prej 2 faqesh. Një shfaqje e rëndësishme që po pritet me padurim. Në Greqi shfaqja do jepet në gjuhën shqipe dhe me titra greqisht.