Sajmir Strati për të tretën herë në “Guines”

05.09.2008 12:04 Kulture - Burimi: Metropol Kulture

Një portret djali me kitarë në dorë. Diell dhe Mesdhe. Një vepër arti prej 300 mijë tapa vere mbi një sipërfaqe 100 metra katrorë. Pikërisht ky është mozaiku me të cilin artisti shqiptar Sajmir Strati u fut mbrëmjen e djeshme për të tretin vit në rekordet “Guines”, pas gjykimit nga Carlos Martinez, përfaqësues i jurisë së Londrës për “Guinness World Record”.

“Mesdheu”, i pari mozaik i këtij lloji në botë u vlerësua jo vetëm për dimensionin e tij, por edhe për mënyrën e krijimit. “Janë tapa të cilat njerëzit i mbajnë gjatë në dorë edhe pasi kanë mbaruar pijen, që ndoshta bartin edhe një histori. Vetëm ajo e ka dëgjuar se ç’është thënë në tavolinë. Kam përdorur edhe tapa individuale që i kanë sjellë njerëzit, diku kam gjetur edhe ndonjë të kafshuar”, - rrëfen Strati, duke pohuar se çdo krijim ka një ndjesi të vetën.

Kështu, edhe pse dy herë fitues i rekordit botëror, Strati vendoset përballë emocioneve të reja. “Është një punë që duhet ta prezantohesh në lartësi, t’i qëndrosh shumë afër dhe nuk e kontrollon dot vetëm me një hap të tërhequr. Herë pas herë në mendjen time them se më shumë punë duhet kur e vëzhgon se kur e vendos, sepse duhet të përcaktosh saktë se çdo të bësh. Nuk ka vend për gabime”, - pohon artisti, ndërsa mendon se ajo që e nxit së tepërmi drejt punës është dëshira për të provuar, sfida për t’iu dhënë jetë ideve. “Nëse braktis pjesën kreative, ke braktisur veten dhe ky nxitim i imi është për të mos i lënë të më ikin idetë.”

Siç shpjegon vetë artisti, subjekti i kushtohet Mesdheut dhe vepra është kompozuar me elemente që i përkasin këtij rajoni, si: dielli, deti, muzika, portreti i një djali me tipare mesdhetare. Jo më kot është gjetur dhe një element i tillë për të krijuar këto: tapat e verës, që këtij mozaiku “i shtojnë” edhe pijen. “Jam munduar të ndërtoj një imazh që t’i ketë gjithë këto elemente në harmoni të plotë. Këto përfshijnë edhe tipare shpirtërore brenda Mesdheut, në të cilin futet edhe Shqipëria”, - do të pohonte Strati në një intervistë të para pak ditëve, ndërsa shtoi se ka tentuar të shfaqë pjesën e butë, dinamike dhe alegro, prandaj edhe kompozimi është bërë në një mënyrë ujore e të lëvizshme.

Për realizimin e mozaikut Sajmir Strati punoi 27 ditë në një nga ambientet e hapura të hotel “Sheraton”. “Mesdheu” ka një dimension rreth 96 metra katrorë, 13.5 x 7 metra.

Rekordi i ardhshëm, një figurë femre

Pas gjykimit nga juria e “Guinesit” dhe qenies pjesë e librit të rekordeve, mozaiku i Stratit duket se ka shumë për të treguar, për të përmbushur plotësisht misionin e vet. Kjo për shqetësimin e natyrshëm të artistit që kërkon që veç dimensioneve të mëdha, vepra të jetë një vepër arti.

Nga një pamje e ftohtë e Da Vinçit te një kalë me kunja dhëmbësh, në një “Mesdhe” me tapa shishesh, Strati nuk i jep fund me kaq. Atë e pret rekordi i ardhshëm, që ka shumë mundësi të jetë një figurë femërore. Madje, që tani ka menduar edhe për materialin që do të përdorë. “Figura femërore është një frymëzim për gjithë artistët. Por gjithmonë materiali i ashpër ose i fortë është përdorur për të bërë mozaik me tema epike. Unë kam përdorur një material të fortë për të bërë një subjekt të butë, figurën femërore”.

I ftuar në Dubai dhe në Kaliforni për të performuar live një mozaik me gozhdë (Da Vinçi i Stratit ka bërë përshtypje dhe akoma asnjë nuk ka tentuar në gozhdë), Sajmir Strati është i pari shqiptar i futur në librin e “Guines” dhe ndër të paktët artistë që paraqet një figurë me të vërtetë origjinale dhe dinjitoze të Shqipërisë në botë.

Të dhëna

96 metra katrorë, 13.5 x 7 metra - dimensioni i mozaikut

300 mijë - tapat e shisheve të verës që përbëjnë mozaikun

Kjo është certifikata e tretë e “Ginesit” për Stratin pas mozaikut “Leonardo da Vinçit” të krijuar me gozhdë (2006) dhe “Shpirt i lirë” (2007), të krijuar me kunja dhëmbësh

27 ditë - koha e realizimit të mozaikut

Artikullin origjinal mund ta lexoni ketu

lajme.parajsa.com