Fotografitë dhe mbresat e udhëtimit të një grupi studentësh shqiptarë që jetojnë në Itali nëpër vise të Shqipërisë, përfshirë këtu Alpet, Thethin, Valbonën dhe një pjesë të mirë të bregdetit, do të hidhen në një site trigjuhësh shqip-italisht-anglisht. Ky është projekti i "Të rinjve të Rrugës Egnatia", të cilët janë takuar dje në Tiranë me zv/ministria e Turizmit, Kulturës, Rinisë dhe Sporteve, Znj. Suzana Turku. Ata janë shprehur se kështu do të mund të promovojnë dhe prezantojnë një imazh ndryshe të Shqipërisë me gjithë bukuritë turistike.
Ndërsa një prej koordinatorëve të projektit Benko Gjata, u shpreh se në janar do të konkretizohet dhe guida e parë turistike në italisht. "Jemi në tratativa për transmetimin e një materiali filmik të zonave Turistike në mediat italiane", ka vazhduar më tej Gjata. Duke i falenderuar për inisiativën e tyre, Turku ka theksuar se "është një projekt i rëndësishëm për të dyja palët për të njohur Shqipërinë dhe ndryshimet që kanë ndodhur vitet e fundit dhe shpresoj që ky projekt të vazhdojë edhe në të ardhmen". "Të rinjtë e Rrugës Egnatia" është një inisiativë e nisur në janar të këtij viti dhe përfundon në janar të 2009.

(s.g/GazetaShqiptare/BalkanWeb)