Skena nga një martesë?

Pas një pauze prej katër vjetësh, beqaret më të famshme të Nju Jorkut kthehen me një film rrethuar nga misteri (ai i një “po”-je të thënë vendosmërisht). Nga ato që thonë me Carrie, Samantha, Miranda, Charlote, kemi zbuluar se...

“Botoksi funksionon, martesa jo!” (Samantha Carrie-t, që sapo ka shpallur ditën e dasmës).

Katër protagonistet janë ulur buzë një pishine në Los Angeles, ku është transferuar Samantha.

Samantha: “Shih si të janë bërë qimet e këmbës!”.

Miranda: “Jam martuar tani, kam të tjera përparësi”.

Samantha (duke treguar me kokë Charlotte-ën): “Edhe ajo është martuar, por nuk po rrit National Forest”.

Charlotte: “Jam shtatzënë!!!!”.

Carrie, që sapo ka mbaruar së lexuari “Hirushen” për vajzën e birësuar të Charlotte-ës, katër vjeçe: “Dhe jetuan të lumtur. Megjithatë në jetë nuk ndodh kështu. Është e rëndësishme që ti ta dish që tani”.

Janë fragmente nga traileri i “Sex and the City: the Movie”, thonë dhe nuk thonë një mal me gjëra. Filmi, që është realizuar i gjithi në mënyrë shumë sekrete, do të dalë në gjithë botën në fund të majit. Fushata publicitare është bazuar ndërkaq e gjitha mbi një lojë misteresh krejtësisht të fshehura dhe/ose të zbuluara. Sarah Jessica Parker “ankohet” se çdo ditë në sheshxhirim humbej shumë kohë për shkak të invazionit të vazhdueshëm të fotografëve e paparacëve. Në fakt, është mëse e ligjshme të mendosh se paparacët janë ftuar rregullisht nga vetë producentët. Në fakt, të njëjtat imazhe të përhapura në mënyrë “pirate” në internet, gjatë kësaj kohe janë pjesë e trailerit, që është prezantuar pak kohë më parë në Nju-Jork, në prani të gazetareve (pa përjashtim femra) të shumë vendeve të botës, përshirë edhe një kolege nga Stambolli. Do t’ju duket ndoshta e çuditshme, por edhe atje kanë pasur sukses të paparë bisedat mondane dhe seksi të të katër vajzave (vajza u thënçin!): Samantha (Kim Cattrall) e ditëlindjes ’56, Carrie (Sarah Jessica Parker) e Charlotte (Kristin Davis) të ’65-ës dhe Miranda (Cynthia Nixon) e ’66-ës.

Të para nga afër

Ja ku mbërrijnë njëra pas tjetrës në një suitë në Hotel Ritz. Të këndshme, simpatike dhe fjalëshumë, ashtu si dhe alter-egot që i kanë bërë të famshme në gjashtë sezonet e telefilmit që ka përfunduar katër vjet më parë, por që vijon të “jetojë” nëpërmjet shitjeve të DVD-ve.

Kim/Samantha është mjaft e gjatë, më e bukura. E gjatë, bionde dhe e stërmadhe, por jo pa klas, përkundrazi. Ka një veshje të bardhë sublime Balenciaga, në dorë ka byzylykë të artë. Cynthia/Miranda nuk ka më flokë të kuq (“ngjyra ime natyrale për një film që do filloj me aktorët Alec Baldwin dhe Emma Roberts, mbesa e Julia-s”), ka një fustan blu të Theory-t, që rrëfen se nuk ia kanë lënë ta vishte në një nga skenat e “Sex and the City: the Movie”.

Sarah Jessica/Carrie është tamam si çerr: duket si balerinë e kërcimit klasik. Shenjat e veçanta janë sytë, grija Armani me të cilën televizioni nuk është treguar dhe aq i drejtë. Ndërrohet dy herë gjatë intervistës: në fillim Versace plus një xhaketë Halson dhe pastaj një mini-fustan i dizenjuar nga ish-topmodelja Mila Jovovich. Specifikon: të gjitha rroba borxh.

Kristin/Charlotte ka një kanotierë Prada, efekt akuarel, koleksioni i fundit dhe një palë pantallona të zeza Max Mara, që ia hollojnë vithet e gjera. Marka të ndryshme, dëshira të ndryshme për të rënë në sy. “Kam mësuar të zgjedh gjërat që më rrinë mirë. Por vitet e para në sheshxhirim qaja në çdo provë rrobash. Më dukej se stilistët punonin vetëm për vajzat shumë të gjata dhe shumë të dobëta. Patricia Field (kostumierja) më mësoi të jem e lirë, të mos vesh ato që janë nëpër revista, por të gjej veten”.

Të ngatërrohesh me personazhin

Rrëfen Kim-i: “Meshkujt! Një tip gjatë një darke më pëshpëriti në vesh: Jepi shpirt, më trego çfarë di të bësh…”.

Kristin: “Po xhironim sezonin e dytë a të tretë. Një ditë, gjatë një pushimi, unë dhe Sarah menduam se do bënim mirë të kalonim pak nga Barney’s (magazinë e madhe luksoze në Madison Avenue) dhe hyjmë tek reparti i këpucëve. Nuk e di se ku e kishim trurin! Të gjitha gratë na u hodhën sipër. Jo se qahem, ishte tepër e bukur, por natyrisht që nuk ia dolëm të provonim qoftë edhe një palë sandale!”.

Cynthia: “Kam provuar dhe unë disa herë t’u përgjigjem testeve nëpër revista: cili personazh “Sex and the City” je? Dhe gjithmonë, me çdo lloj mënyre, përgjigjja ka qenë Miranda. Rëndë!”.

Sarah Jessica: “Unë me mikeshat e mia nuk flas për seksin në atë mënyrë dhe nuk jam e fiksuar pas veshjeve si Carrie. Mua më pëlqen të flas për fëmijët, se si ma heq trurin James-i im gjashtëvjeçar e që kohët e fundit ankohet se e përkëdhel shumë, se i jap shumë puthje… E si mos ta puth!! Ah, e pastaj më pëlqen shumë të flas për ushqimin. Nuk jam ndonjë kuzhiniere e madhe, por do të më pëlqente shumë të isha”.

Mbi jetën private

Kim Catrall është martuar tre herë. Martesa e fundit u shkatërrua pikërisht në fund të sezonit të gjashtë të “Sex and the City”. “Kanë shkruar se e kisha kundërshtuar idenë e filmit për çështje parash, por e vërteta është se kam kaluar vite të vështira. Im atë ka qenë i sëmurë, më duhej të kujdesesha për të, të gjeja një qendër të specializuar për ta trajtuar. Tani jam dorëzuar, por jam më e qetë. Jo, nuk jam vetëm, kam një të fejuar”.

E vetmja që ka mbetur single është Kristen Davis. Nuk mohon edhe tek pyetjet për të shkuarën e saj alkooliste “Jam esëll prej njëzetë vitesh. Kam rrezikuar shumë, por tanimë bëj jetë të shëndetshme: pa duhan dhe pa kokteje në sheshxhirim”. Ashtu si Kim Cattrall, edhe ajo nuk ka fëmijë. “Tani për tani, mirë jam kështu, por nëse nuk do të arrija të mbetesha shtatzënë në çastin kur do dëshiroja një fëmijë, do të bëja gjithçka. Ashtu si Charlotte, personazhi im. Kura hormonale, mijëra tentativa. Është e vështirë që një grua ta pranojë se nuk ia del dot”.

Cynthia Nixon ka dy fëmijë (Samantha, 10 vjeç, Charles 6), të lindur nga një lidhje me një profesor universiteti, që ka mbaruar aty nga viti 2004. Që nga ajo kohë, ka një partnere me emrin Christine Marinoni dhe ka bërë coming out. “Parashikoheshin shumë thashetheme kështu që shkova të këshillohesha me nja dy specialistë të shtypit. E para më tha që të përgjigjesha që nuk doja të flisja, por nuk më bindi. Si do ta justifikoja prezencën e këtij personi në jetën time, në shtëpinë time? E dyta, lesbike e deklaruar, më këshilloi ta pohoja dhe kaq. Kështu bëra, duke i dhënë fund një vale llafesh”.

Sarah Jessica Parker, ajo që po e jeton jetën familjare në formën më tradicionale, lë të kuptosh se me të shoqin, Mathew, gjithçka shkon mirë. Rrëfen se fle me këmisha nate prej pambuku, aspak seksi. Nuk ka frikë se plaket, por sapo dëgjon se ka dalë një krem i ri antirrudhë, nxiton ta blerë.

Mbi feminizmin e Sex and the City

Sarah Jessica Parker, personazh kryesor dhe producente e sezoneve më të fundit televizive, por edhe e filmit në ekran të madh: “Është ende shpejt për të thënë nëse filmi ynë ka dhënë ndonjë kontribut për lirinë e femrave. Por ajo që është e sigurt, është se kemi interferuar në një moment të ndryshimeve sociale. Hillary Clinton, që unë e mbështes, është personifikim i gjithë kësaj.
Dhe sa u takon telefilmave të rinj që kanë zëvendësuar të tyrin, Kristin thotë se nuk i ka parë kurrë, aq më pak Cynthia (as që ka televizor!) ndërsa Kim-i ndershmërisht pohon “kam dëgjuar se nuk kanë shikueshmëri dhe nuk më vjen aspak keq”.

Si do përfundojë?!

Nga traileri mund të kuptojmë se Carrie është duke u martuar. Pastaj, për një arsye të papritur dhe tragjike, dasma ndërpritet. Këtu janë ngritur dhe shumë zëra në bloge: ka nga ata që thonë se Big mund të vdesë (po a jemi të sigurt që është pikërisht ai dhëndri?). Të tjerë mendojnë se ajo që vdes është Samantha. Të tjerë akoma thonë se është e pamundur që ndokush të vdesë dhe se producentët i kanë ngritur enkas këto zhurma për të na ngatërruar idetë. Por ajo që thuhet më së shumti është se mund të ketë një të dytë “Sex and the City: the Movie”, një vazhdim i vazhdimit, gjë që përjashton çdo mbyllje tragjike shekspiriane. Ta shohim: mbetemi në kontakt.