SHKODER- Teatri "Migjeni" hap sezonin e ri artistik "Vjeshtë 2008". Drejtori Lorenc Mosi dje ka bërë publike ambiciet e stafit që ai drejton prej disa vitesh. Megjithëse Teatri "Migjeni" ende nuk ka hapur ende dyert për publikun shkodran, puna e trupës së teatrit ka nisur prej disa ditësh. "Tashmë kemi nisur punën për sezonin e ri artistik. Kemi ambiciet tona. Puna jonë lidhet dhe me faktin se këtë periudhë kemi dhe 50-vjetorin e teatrit. Në fakt, është përvjetori i godinës ku ndodhet teatri", - ka pohuar Lorenc Mosi. Sipas tij, ky sezon vjeshte do të ketë tre premiera; një dramë, një komedi dhe një variete. Mësohet se për komedinë janë përfshirë emrat më të njohur të skenës në Shkodër. Komedia titullohet "Kollovari", e autorit Qazim Çela, ndërsa regjisor për të gjitha shfaqjet që do të vihen në skenë do të jetë Fatbardh Smaja. E ndërsa ka nisur puna, për aktorët shkodranë mbetet i pazgjidhur problemi i pagave të tyre të ulëta. Po kështu, shqetësim është dhe mungesa e emrave të rinj që i bashkohen skenës së Teatrit "Migjeni". Prej 17 vitesh, asnjë aktor i ri që diplomohet në Akademinë e Arteve në Tiranë nuk preferon të punojë si aktor në teatrin e mirënjohur të qytetit verior.

(s.g/BalkanWeb)