TIRANE-  Sallat muzeale të Galerisë Kombëtare të Arteve pothuajse janë të zbrazura. Veprat e ekspozuara më parë janë hequr, ndërsa prej dy javësh ka filluar puna për rinovimin tërësor të linjës muzeale. Në katin e dytë, dje po punohej për të zhvendosur edhe pjesën e mbetur të ikonostasit. Shihen vetëm disa tablo të vendosura njëra pas tjetrës dhe pjesa tjetër është hapësirë boshe. Sipas drejtorit të GKA-së, Rubens Shima, me këtë projekt po bëhet kthimi në origjinë i godinës. Kjo ndërhyrje është projektuar që hapsirat të komunikojnë me njëra-tjetrën duke ndjekur ritmin origjinal të godinës, i cili sipas tij ishte deformuar rëndë. Aktualisht janë lëvizur salla ku ka qenë e ekspozuar një pjesë e realizmit socialist dhe skulpturat. Në emër të kthimit në origjinë, Shima ka prishur edhe muret artificiale të ndërtuara gjatë viteve, të cilat sipas tij janë realizuar sipas shijeve arkitekturore të drejtorëve dhe për qëllime afatshkurtra. "Galeria ishte transformuar në një godinë që nuk kishte ritëm dhe dhomat e ekspozimit qenë kthyer në një lloj makthi hapësinor", - shprehet Shima. Kështu, nga një sistem drejtues në tjetrin asgjë nuk vazhdohet aty ku është lënë, por ecet sipas një filozofie personale. Ndërsa për sa i përket rinovimit tërësor të linjës së ekspozimit, për drejtorin aktual ishte e nevojshme, pasi ajo nuk paraqiste për vizitorin historinë e artit shqiptar. Shima tregon se "pasi të përfundojë gjithë procesi i ndërhyrjeve rregulluese, grupi që po punon me selektimin e gjithë fondit të Galerisë do të vendosë për veprat e koleksionit që do të jenë për ekspozim. Është menduar të ketë një proces didaktik muzeal, ku dikush hyn të kuptojë në mënyrë kronologjike ç'ka ndodhur me artin shqiptar". Projekti pritet të përfundojë në tetor dhe më pas linja e Galerisë së Arteve do të jetë e ndërtuar me tre pavione kryesore. "Në sallën e parë" - thotë Shima - "do të jetë ekspozuar periudha arti i fillimshekullit të 20 dhe arti i ndërmjet dy lufrave botërore, që mund të konsiderohet si periudha e romanticizmit në artin shqiptar në elementë dhe në tematikë. Në sallën ku ndodhej deri më sot ikonostasi do të ekspozohet arti i periudhës së realizmit socialist, i cili do të zërë pjesën më të madhe të katit të dytë. Sipas Shimës, kjo është e kuptueshme, kur 80 % e fondit të GKA-së është pjesë e kësaj trashëgime. Më tej linja do të vazhdojë dhe mbyllet me periudhën moderniste e cila zhvillohet dhe merr trajta të plota pas viteve '90. Nga veprat që kanë qenë të ekspozuara deri më tani do të ketë shumë pak. Gjithccka që do të vendoset do të jetë pjesë e fondit të paekspozuar më parë ose që ka dekada mbuluar nga pluhuri, - thekson Shima. Deri kur gjithccka të rregullohet Galeria e Arteve ka të mbyllur pjesën e saj muzeale për vizitorët, por salla e ekspozitave është e hapur si zakonisht. Ndonëse gushti ende shënon një periudhë frekuentimi, drejtori mendon se në këtë kohë ka më pak intensitet se periudha e vjeshtës, e për këtë arsye e sheh më të përshtatshme për të punuar.
Arti bashkëkohor
Galeria e Arteve nuk do të ketë një pavijon të trendeve më të fundit të artit bashkëkohor. Sipas drejtorit Rubens Shima, ai që quhej pavijon i artit bashkëkohor, e që ishte mbyllur më parë këtij projekti, ishte i pastudiuar në atë çka përfaqësonte dhe nuk kishte asnjë lloj historiku. "Nuk ka muze që të trajtojë cdo periudhë të artit dhe mundësisht të perfundojë dje. Duhet të kalojë një kohë maturimi, të paktën 2-3 dhjetëvjeccarë deri sa artisti dhe vlerat e tij të pranohen, të ekspozohen dhe të koleksionohen nga një muze. Ne do ta mbyllim linjën e Galerisë deri në periudhën moderniste. Ndoshta pas përfundimit të rikonstruksionit të Piramidës, do të kemi një muze të dytë që do të trajtojë gjithë problematikat e artit bashkëkohor, - thekson ai. Ndërsa fati i ikonostasit, si një objekt me përmbajte religjioze, do të vendoset vetëm në vitin 2009. Atëherë kur në një fazë të dytë të projektit do të studiohet gjithë kati i parë dhe holli. Sipas Shimës, do të shihet mundësia që në sallën ku ndodhet sot biblioteka, të ketë një vend të veçantë për ikonografinë. "Ai është një art religjioz dhe nuk mund të jetë në vazhdimësi të pikturës shqiptare. Pjesë të selektuara do të tregojnë një kulturë që dominoi gjithë Ballkanin në atë kohë, si mbetje e jehonës bizantine.

(s.g/GazetaShqiptare/Balkanweb)