Kullat në Kosovë janë objekte monumentale që paraqesin një pjesë të trashëgimisë kulturore të tyre. Ndërtimi i shumë kullave në Kosovë daton qysh nga shekulli i XVIII. Kullat e ndërtuara me lartësi dy apo tri kate kohë më parë janë shfrytëzuar për banim, por  gjithashtu janë përdorur si objekte mbrojtëse nga sulmet e mundshme nga jashtë. Këto kulla thuhet të jenë të ndërtuara me një mjeshtri dhe me një pamje të mrekullueshme me gurë të gdhendur dhe me tjegulla. Lufta e fundit në Kosovë bëri që shumë kulla të  shkatërrohen dhe të digjen nga ushtria dhe paramilitarët serbë, kështu që janë dëmtuar 826 kulla në gjithë territorin e Kosovës, ndërsa ato të cilat i mbijetuan janë të pakta. Sipas zëdhënëses dhe këshilltares për media në Ministrinë e Kulturës, Rinisë dhe Sportit, Arbërore Riza, për sa i përket restaurimit dhe konservimit të kullave të mbetura, ajo tha se ky është prioritet i MKRS-së për vitin 2010. "Promovimi, restaurimi dhe konservimi i tërësive, objekteve dhe i monumenteve të trashëgimisë kulturore është ndër prioritetet e MKRS-së për vitin 2010"�, tha Riza. Ndërsa për investimin kapital të paraparë, Riza për "Kosova Sot"� tha se për vitin 2010, në kuadër të politikave programore të MKRS-së, si investim kapital janë paraparë të konservohen Kulla e Demë Ali Pozharit dhe Kulla e Mehmet Demush Çekajt. Pra, këto dy kulla pritet të konservohen gjatë këtij viti. Lidhur me mbrojtjen e kullave, zëdhënësja Riza tha se Ministria e Kulturës ka ndihmuar autorin e librit për kullat shqiptare, Flamur Doli, në mënyrë që kjo trashëgimi me vlerë të ruhet dhe të mbetet dokument i shkruar. "Vlen të theksohet se MKRS-ja ka mbështetur edhe botimin dhe promovimin e librit të autorit Flamur Doli "Arkitektura Vernakulare"�, në të cilin libër ngërthehet edhe historiku, përshkrimi i kullave në Rrafshin e Dukagjinit"�, pohoi Riza. Kulla percepton një kulturë dhe një trashëgimi tonën autoktone, e cila është punuar kryesisht prej mjeshtërve tanë shqiptarë dhe për këtë arsye është e njohur me çardak prek guri dhe druri. Ato prej druri datojnë më herët, kurse ato prej guri më vonë. Funksioni i tyre kryesor ka qenë banimi dhe mbrojtja, kuptohet në kohët e mëhershme. Në kullat që kanë shpëtuar deri tani zhvillohet jeta ende, kurse një numër i madh i tyre ka filluar të shkatërrohet për shkak të mundësive shumë të vogla të investimeve për mirëmbajtjen apo rindërtimin e tyre. Sa i përket investimeve për restaurimin, konservimin dhe ruajtjen e një kulle, restaurimi nuk është dhe aq i lirë dhe mund të arrijë deri në 100 mijë euro.  A. Berisha