Poetë, shkrimtarë, muzikantë, artistë dhe adhurues të kulturës do të qëndrojnë për tri net me radhë në liqenin e Batllavës për të mbajtur edicionin e dytë të Festivalit Ndërkombëtar të Letërsisë. Gjatë kësaj kohe autorë vendas e ndërkombëtarë do të ndajnë krijimet e tyre me adhuruesit e kulturës në një mjedis piktoresk, por të pashfrytëzuar për tubime të këtij lloji. Ky festival u mbajt për herë të parë vitin e kaluar për të vazhduar këtë vit me edicionin e dytë dhe kështu me synimin që kanë organizatorët për të vazhduar edhe në të ardhmen dhe për t'u bërë një festival tradicional me begatime të reja për çdo vit.

Çlodhja nga vapa

Festivali i letërsisë, që mbahet në Orllan, ka marrë emrin edhe Festivali i Letërsisë Orllan (FLO) e që ka nisur të mërkurën mbrëma. Ky vend është qendër e takimit të poetëve të botës. Numri i poetëve vendorë dhe nga rajoni është më i madh, kurse festivali ka krijuar një atmosferë impozante për shkak se po mbahet pranë liqenit të bukur të Batllavës. Edhe organizatorët kur shohin se artdashësit po ndahen të kënaqur me atë që u ofron festivali thonë se nuk ndiejnë lodhje dhe shohin se njerëzit në mbrëmje të festivalit po çlodhen nga punët e ditës dhe nga vapa e madhe që po mbretëron këto ditë. Vlen të ceket se edhe vendi ku mbahet dhe ambienti piktoresk përreth bëjnë që të gjithë të ndihen të kënaqur kur dëgjojnë poezi nga poetë të njohur, që shumë nga të pranishmit veç i kanë dëgjuar si emra e nuk kanë pasur rastin t'i shohin më afër.

Festival i veçantë

Gjatë tri ditëve të festivalit artdashësit kanë rastin të përcjellin nga afër krijimet e poetëve të njohur si Bardhyl Londo, Ramiz Kelmendi, Ali Podrimja, Zarghuna Kargar, Adem Gashi, Halil Matoshi, Moikom Zeqo, Primo Shllaku, Naime Beqiraj e shumë të tjerë. Adhuruesit e muzikës do të kenë rast të dëgjojnë bendet si "Bloody Foreigners", "Public Service Broadcasting", Genc Salihu, Shpat Deda, Reyna Lauren e "Pinkmetal" etj.

Ajo që i kishte mahnitur të pranishmit në natën e parë dhe që bisedonin edhe gjatë ditës së enjte ishte zëri i një këngëtari shqiptar të moçëm plot 107 vjet (1905) që u dëgjua në Orllan, në FLO. Ndonëse incizimi i kësaj kënge nuk dëgjohej aq mirë, dallohej se ishte këngë folklorike shqiptare. Meqë shumë nga të pranishmit shprehën interesim të dinë për këtë, u bë me dije se ky zë ishte nxjerrë nga arkivat e Bibliotekës Britanike në Londër, gjatë vizitës së udhëpërshkrueses Edit Durham (1863 – 1944), e cila një shekull më parë e kishte vizituar Ballkanin. Andaj në fokus të këtij edicioni do të jetë artistja dhe shkrimtarja britanike Edit Durham për kontributin e saj të dhënë në fillim të shekullit 20-të për shqiptarët dhe Shqipërinë.

Edhe shkrimtarët pjesëmarrës në këtë festival janë të kënaqur që marrin pjesë sepse, siç e vlerësojnë ata, është një festival i veçantë.

Milzaim K.