Për të marrë një bursë studimi, të gjithë studentët dhe nxënësit duhet të plotësojnë plot 13 kritere, ku përfshihen ato ekonomike dhe sipas rezultateve te arritura në mësime. Këtë të drejtë e përfitojnë studentët që ndjekin studimet në institucione arsimore publike me kohë të plotë kanë të drejtën e përfitimit të bursave. Këto bursa përfitohen nga ata nxënës ose studentë të cilët jetojnë më larg se 5 km nga vendbanimi i tyre dhe që janë në gjendje jo të mirë ekonomike. Qeveria ka miratuar dje vendimin ku përcakton kategoritë dhe kushtet që duhen për të përfituar një bursë shtetërore. Ndarja e bursave bëhet sipas kriterit ekonomik, rezultateve të arritura në mësime, degëve që kanë përparësi për zhvillimin ekonomik të vendit si edhe për nxënësit apo studentët që janë fëmijë të policëve, të cilët kanë humbur jetën në krye të detyrës.
Përfitimi
Ndarja e bursave hartohet nga Ministria e Arsimit  në bashkëpunim me këshillin e bashkisë apo të komunës ku jetojnë nxënësit. Të gjithë studentët apo nxënësit që kanë përfituar bursë në vitin e parë të shkollës kanë të drejtë ta marrin këtë bursë deri në fund të shkollimit, nëse nuk rezultojnë mbetës dhe nuk u ndryshojnë kriteret ekonomike. Nxënësit dhe studentët që kanë përfituar statusin e jetimit, nxënësit e Institutit të Fëmijëve që Nuk Dëgjojnë dhe Nuk Shikojnë, përfitojnë falas veshmbathje, libra, fletore, etj. Kjo kategori përjashtohet edhe nga detyrimet e tarifave të shërbimeve të ndryshme që ofrojnë shkollat. Nxënësit jetimë e përfitojnë bursën edhe gjatë pushimeve verore, si dhe vetëm një vit, kur humbasin vitin shkollor, për rezultate jo kaluese. Ndërsa fëmijët dhe mësuesit e institucioneve të arsimit special, pa konvikt, trajtohen falas nga shteti, me një vakt ushqimi në drekë, me vlerë deri në 150 lekë në ditë.
Bursat
190 është numri total i bursave që do të shpërndahen për nxënësit nga viti i dytë e lart, të cilët studiojnë në shkolla profesionale në degët bujqësore, veterinare, pyjore, ndërtim, dhe që kanë mbaruar me mesatare mbi notën 8. Ky numër bursash është parashikuar vetëm për vitin shkollor 2008-2009. Ndërkohë janë akorduar rreth 130 të tjera për të gjithë studentët e viteve të dyta e lartë në shkallë vendi, të cilët nuk kanë përfituar më parë bursë dhe që plotësojnë kriterin ekonomik. Nga plani i bursave, të miratuara për vitin shkollor 2008-2009, bashkisë së Tiranës i jepen 15 bursa të larta për studentët që vijnë nga familjet dhe shtresat sociale në nevojë, invalidët, paraplegjikë dhe tetraplegjikë, duke i përjashtuar nga kriteri, që të vazhdojnë studimet jashtë vendbanimit të tyre. Ministrisë së Arsimit dhe Shkencës, për vitin shkollor 2008-2009 i jepen 190 bursa për nxënësit dhe 1 600 bursa për studentët për të gjitha kategoritë e parashikuara në këtë vendim. Ndërkohë që afati përfundimtar për shqyrtimin dhe miratimin e bursave për vitet e para është data 15 dhjetor 2008 për të gjitha kategoritë e shkollave, ndërsa për vitet e dyta e lart është data 30 nëntor 2008.

Sipas rezultateve të arritura (nxënës/studentë)

1. Nxënësit e arsimit të mesëm profesional që kanë mbaruar vitin shkollor pararendës me të gjitha notat 10-ta.
2. Studentët që regjistrohen në vitin e parë të shkollës së lartë e që kanë mbaruar shkollën e mesme me medalje ari.
3. Studentët që regjistrohen në vitin e parë të shkollës së lartë e që janë shpallur nga Ministria e Arsimit dhe Shkencës më të mirët e Maturës Shtetërore. Për vitin 2008 janë gjithsej 30 veta. Kjo kategori studentësh përfiton bursë vetëm për vitin shkollor 2008-2009.
4. Studentët që kanë mbaruar vitin akademik pararendës me të gjitha notat 10-ta.
5. Studentët që vazhdojnë studimet në degët matematikë dhe fizikë në vitet e dyta e lartë dhe që e kanë përfunduar vitin akademik pararendës me notën mesatare mbi 8-të.
 
Jashtë kriterit ekonomik (nxënës/studentë)
Fëmija, nxënës apo student i punonjësit të policisë që ka humbur jetën në krye e për shkak të detyrës. Në fillim të çdo viti akademik, Ministria e Brendshme dërgon në Ministrinë e Arsimit dhe Shkencës listën për këtë kategori.

Përfitimi i bursës sipas kriterit ekonomik (nxënës/studentë)
 
1. Nxënësit/studentët që vazhdojnë studimet larg vendbanimit të tyre në largësinë mbi 5 km dhe plotësojnë kriterin ekonomik.
2. Nxënësit, që banojnë në fshat, pa shkollë 9-vjeçare, brenda rrezes prej 5 km e që vendosen në konvikt publik.
3. Nxënësit/studentët që kanë përfituar statusin e jetimit dhe që plotësojnë kriterin ekonomik.
4. Nxënësit/studentët, të cilët kanë humbur kujdestarinë prindërore me vendim gjykate të formës së prerë dhe që plotësojnë kriterin ekonomik.
5. Secili nga studentët bashkëshort, me fëmijë, që plotëson kriterin ekonomik e që vendoset në konvikt publik.
6. Fëmija, nxënës apo student që ka statusin e invalidit, paraplegjik dhe tetraplegjik dhe që plotëson kriterin ekonomik.

Sipas degëve përparësore për zhvillimin e ekonomisë (nxënës)
 
1. Nxënësit që vazhdojnë studimet në shkollat profesionale, në degët bujqësore, veterinare, pyjore dhe në ndërtim në vitet e dyta e lart dhe që kanë mbaruar vitin akademik pararendës me notën mesatare mbi 8-të.
2. Nxënësit dhe studentët nuk e përfitojnë ose/dhe e humbasin të drejtën e përfitimit të bursës, kur:
 
a. janë ndarë nga trungu familjar;
b. familjet e tyre ushtrojnë veprimtari private;
c. vazhdojnë studimet në një program të dytë studimi;
ç. shpallen mbetës dhe humbasin vitin shkollor për arsye të rezultateve jo kaluese.