Kreu i qeverisë vizitoi dje pesë fshatra të bregdetit, ku inauguroi një sërë veprash publike. Duke komentuar debatin për pronat, Berisha u shpreh se nuk mund të abrogohet ligji Nr.7501. "Nuk mund të kemi një ligj për fshatrat e bregdetit dhe një ligj për zonat e tjera të Shqipërisë", tha ai.
Urimi i Bollanos
Në takimin e zhvilluar dje në Palermo, kreu i qeverisë u takua dhe me kryetarin e Bashkisë së Himarës. Edhe pse debatet e fundit janë përqendruar në çështjen e pronave në këtë zonë dhe ndikimit që ka kryebashkiaku, mes tij dhe kreut të qeverisë nuk është diskutuar për këtë çështje. Kreu i Bashkisë së Himarës i uroi kryeministrit fitore në zgjedhjet e ardhshme parlamentare. Ndërkohë që kërkoi nga ky i fundit më shumë investime. "Mandatin tjetër qeveria duhet të bëjë më shumë investime në Himarë", tha Bollano. Gjatë fjalës së tij, kryeministri Berisha ka shmangur komentet mbi problemet në Himarë dhe kërkesat e minoritetit grek për futjen zyrtare të gjuhës greke në këtë zonë. Ndërkohë që një pjesë e partive politike kanë kërkuar shkarkimin e kryebashkiakut Vasil Bollano.
Turi i ri "Shqipëria po ndryshon"
Kreu i qeverise ka nisur dje turin e ri, "Shqipëria po ndryshon", në pesë fshatra të bregdetit. Ai inauguroi një sërë rrugësh në Borsh, ujësjellësin në fshatin Shën Vasil, si dhe inspektoi punimet e rrugës së bregdetit. I pyetur nga banorët e zonës për problemin e pronave, Berisha u shpreh se ligji Nr.7501 nuk mund të abrogohet. Sipas tij, nuk mund të ketë dy ligje, një për banorët e bregut dhe një për banorët e zonave të tjera. "Në të gjitha fshatrat e bregut has ankimime të tilla dhe shumë serioze. Por, duhet të jeni të sigurt që ligji Nr.7501 nuk mund të abrogohet, sepse nuk mund të bëhen dy ligje, një ligj për bregun dhe tjetër për në zonat e tjera, për shembull për Gjirokastrën apo për Korçën. Ju duhet të dini se çdo padrejtësie të bërë duke keqpërdorur një ligj, i jepet përgjigje dhe zgjidhje me ligjin që sapo ka kaluar në Parlament. Të jeni të sigurt, se do të investohet dhe do të bëhet çdo përpjekje që ky proces të përfundojë në mënyrë sa më transparente dhe eficiente. Unë këtë shqetësim e ndjej në të gjitha fshatrat e bregut, por nuk më ndodh ta dëgjoj në fshatra të tjera ku unë shkoj. Po përpiqem të hetoj dhe të merrem me këtë çështje, por ligjin nuk e ndryshojmë dot", tha kryeministri Berisha.

Berisha, homazh në memorialin e 56 ushtarëve austriakë
Kreu i qeverisë ka bërë dje dhe një vizitë në memorialin e ushtarëve austriakë që kanë vdekur në Shqipëri gjatë Luftës së Parë Botërore. Memoriali u inaugurua dy ditë më parë dhe u nderua me fondet e një donatori anonim austriak. Ushtarët austriakë gjatë Luftës së Parë Botërore 1914 - 1918 kanë dhënë ndihmën e tyre për ndërtimin e rrugës së bregut nga Vlora në Sarandë. Ushtarët austriakë u zunë rob nga italianët në 1919-n, ku vdiqën nga gripi spanjoll dhe nga sëmundjet e tjera. Vetëm pas 100 vitesh u bënë varre dhe memorialë. Gjatë homazheve kryeministri Berisha u shpreh për banorët se, "keni bërë një vepër të lavdërueshme dhe një akt human që i keni krijuar mundësi të prehen në paqe, të gjithë atyre që kanë mbetur në këtë zonë".

Berisha: Bregdeti do jetë me standardet evropiane
Investimi në zonën bregdetare do të jetë një nga prioritetet e qeverisë. Kryeministri Berisha gjatë fjalës së tij në fshatrat e Bregdetit të Jonit u shpreh se qeveria do e ndërtojë këtë zonë sipas standardeve ndërkombëtare. "Trashëguam rrugë që dënojnë njerëzit, rrugë që pengojnë zhvillimin, rrugë që janë jashtë të gjitha standardeve, por e rëndësishme është që ne do t'i ndërtojmë, dhe jemi duke i ndërtuar. Sot janë rreth 800 kilometra rrugë kombëtare, autostrada dhe superstrada. Në këtë vit investohen rreth 1.2 miliardë dollarë në rrugë dhe unë ju siguroj se me këto ritme, pas 3-4 vitesh, Shqipëria do të ketë rrjetin rrugor më të ri dhe ndër më të mirët që meriton", tha Berisha.

LSI: Bollano mbështet latifondistët e rinj të Himarës
Dega lokale e Lëvizjes Socialiste për Integrim në Himarë ka akuzuar dje kryebashkiakun Vasil Bollano, se është pjesë e procesit të uzurpimit të pronave në këtë zonë. Në një deklaratë të bërë dje, përfaqësues të LSI-së i bënë thirrje partive të tjera politike që të reagojnë për çështjen e pronave. "Forca jonë politike po monitoron punën dhe gjithë aktet administrative që kryen bashkia e uzurpuar nga një klan njerëzish. Në këtë proces monitorimi ne ftojmë të gjithë forcat politike dhe mbështesim propozimin e zotit Neranxi dhe të zotit Ngjela, për ngritjen e një lobi parlamentar për Himarën", thuhet në deklaratën e LSI-së. Gjithashtu, dega e LSI-së së Himarës i ka bërë thirrje drejtuesve lokalë që përfaqësojnë partitë politike, të bashkohen në këtë nismën. "Ne si forcë politike denoncojmë heshtjen e krerëve të partive politike të Himarës, duke filluar nga Partia Demokratike, Partia Republikane, Partia Socialiste, Partia Demokracia Sociale, Partia Socialdemokratike, Partia Demokristiane, etj. Ne u bëjmë thirrje drejtuesve politikë lokalë të Himarës të reagojnë duke përfaqësuar spektrin e tyre politik dhe të dalin sa më parë nga "kapja" që kryebashkiaku u ka bërë atyre dhe misionit të tyre alternativ", thuhet në deklaratë.