“Drafti do të miratohet në shtator me mbështetjen e premtuar të opozitës”

29.08.2008 12:08 Politike - Burimi: Metropol Politike

Relatori Bumçi sqaron procedurat për miratimin e projektit për pastërtinë e figurave

Deputeti i Partisë Demokratike relator i projektligjit “Për pastërtinë e figurës së funksionarëve të lartë të administratës publike të të zgjedhurve”, Aldo Bumçi i kërkoi opozitës të mbajë fjalën e dhënë në fund të sesionit të kaluar, për të mbështetur draftin në fjalë. Sipas tij, ishte kërkesa e PS-së për të dhënë konsensus, që PD-ja shtyu miratimin e projektit për në shtator. Duke mbështetur arsyetimin e tij në dy faktorë, në atë se vendi ynë e ka pasur një ligj të tillë dhe se ai është aplikuar edhe nga vende të tjera të Evropës Lindore, Bumçi garantoi se Kuvendi që në fillim të sesionit do të finalizojë miratimin e draftit. Në fakt mosnxitimi i PD-së për ta miratuar këtë projekt, lidhet edhe me thirrjen që bëri kreu i OSBE-së në vendin tonë, ambasadori Robert Bosch, për miratimin e draftit pasi ai të jetë diskutuar më parë nga të gjithë aktorët politikë.

Konsensusi

Deputeti demokrat, anëtar i Komisionit parlamentar të Ligjeve, ka vlerësuar pozitiv vendimin e grupit parlamentar të PD-së për të pritur një muaj konsensusin e opozitës për draftin e spiunëve. “Ne deshëm ta kalonim që në sesionin e kaluar, por PS shprehu dëshirën që ligji të kalojë edhe me votën e tyre. Kjo bëri që ne ta shtynim miratimin me qëllim që projekti të mos kalonte vetëm me votën tonë në sesionin e kaluar, pasi projekte të tilla është mirë që marrin një mbështetje të gjerë nga të gjitha kahet politike. Pra, këto projekte të mos shikohen si instrument i një force, por si një kërkesë morale që të gjithë ne kemi ndaj të kaluarës. Shpresojmë që PS të mbajë fjalën që ka dhënë, pra që ligjin ta bëjmë bashkërisht”, theksoi Bumçi gjatë një prononcimi për mediat. Lidhur me miratimin e projektit deputeti i PD-së, tha se nuk gjen arsye për ta shtyrë më tej. “Nuk mendoj se ka arsye që ligji të vonohet. Projekti është diskutuar disa herë mes palëve në Komisionin e Ligjeve dhe mes krerëve të grupeve parlamentare. Mendoj se nuk ka vend për debate të shumta. Mbi të gjitha ne nuk po ecim në një rrugë të panjohur, pasi një ligj për pastërtinë e figurave ka ekzistuar më parë në Shqipëri dhe se vende të tjera të Evropës Lindore kanë aplikuar ligje të njëjta”, përfundoi ai.

Historiku

Mazhoranca dhe opozita nuk kanë gjetur gjuhën e përbashkët mes tyre për procedurat ligjore lidhur me verifikimin e pastërtisë së figurave. Përplasja për dy çështje parimore, që lidheshin me ndërprerjen ose jo të mandatit të zyrtarëve nëse subjektet e ligjit kishin papajtueshmëri me funksionet e renditura po në të dhe riverifikimin ose jo të zyrtarëve që kishin marrë certifikatën e pastërtisë nga komisioni “Mezani” dhe “Bezhani”, ka sjellë vendimin politik të opozitës për të braktisur mbledhjen e Komisionit të Ligjeve. Nga drafti janë votuar vetëm 2 nenet e para.

Drafti “Bumçi”, verifikimi dhe organi përgjegjës

Propozohet shkrirja e veprimtarisë së Autoritetit deri në 2014

Drafti i paraqitur në komision nga deputeti Aldo Bumçi është teksti i PD-së me reflektimet e amendamenteve të deputetëve të tjerë. Ligji ka si qëllim kontrollimin e figurës së çdo funksionari politik të zgjedhur apo të emëruar, lidhur me pjesëmarrjen e tyre në strukturat politikëbërëse dhe zbatuese të dhunës së diktaturës, si dhe strukturat e Sigurimit të Shtetit për periudhën 29 nëntor 1944 deri në 8 dhjetor 1990. Po ashtu, ai përcakton subjektet dhe funksionet e larta shtetërore që janë të papajtueshme me veprimtarinë publike të zyrtarit për shkak të qenies si drejtues, anëtarë ose bashkëpunëtor në strukturat e mësipërme gjatë të njëjtës periudhë. Për zbatimin e këtij ligji propozohet ngritja dhe funksionimi i Autoritetit të Kontrollit të Figurave i cili përbëhet nga 5 anëtarë, dy nga maxhoranca, dy nga opozita dhe një i zgjedhur me konsensus. Ky autoritet fillon procedurën për subjektet e ligjit, me kërkesë të titullarit të institucionit të emërtesës dhe me kërkesë të vetë subjektit. Procesit të verifikimit i nënshtrohen edhe kandidatët për emërimin në postet që i nënshtrohen sipas këtij ligji verifikimit. Kur subjekti i verifikuar ka figurë jo të pastër morale, sipas kuptimit të këtij ligji, atëherë ai duhet të paraqesë dorëheqjen nga detyra. Në këtë rast materialet verifikuese mbeten konfidenciale. Nëse ai refuzon të dorëhiqet nga funksioni, marrëdhëniet e tij të punës përfundojnë me motivacionin “padenjësi e figurës së funksionarit”. Autoriteti publik bën publike në faqen e vet zyrtare identitetin e të gjithë zyrtarëve të kualifikuar si të papajtueshëm për të vazhduar detyrën. Veprimtaria e këtij Autoriteti vazhdon deri në 31 dhjetor të vitit 2014.

Papajtueshmëria e funksioneve

“Anëtar ose kandidat i Byrosë politike, anëtar i Komitetit Qendror të PSSH-së; Kryetar i Gjykatës së Lartë, Prokuror i Përgjithshëm; zv/ministër i Brendshëm dhe çdo punonjës i Sigurimit të Shtetit i dënuar me vendim penal për krime kundër njerëzimit, ose shpifje, kallëzim të rremë në procese politike; bashkëpunëtor i Sigurimit të Shtetit me veprimtari të karakterit politik që lidhen me vepra penale politike të parashikuara nga ligji nr. 7514 datë 30.09.1991, “Për pafajësinë, amnistinë dhe rehabilitimin e ish-të dënuarve dhe të përndjekurve politikë (të ndryshuar), apo bashkëpunëtor vullnetar për vepra të tilla; anëtar i Komisionit të Dëbim-Internimeve; hetues, prokuror gjyqtar apo ndihmës respektivë në procese politike; denoncues apo dëshmitar i akuzës në procese gjyqësore politike.”

Artikullin origjinal mund ta lexoni ketu

lajme.parajsa.com