TIRANË- Lëvizja G99 konstaton me keqardhje se shkaku i ndërprerjeve të energjisë elektrike nuk janë remontet, por qëllimi i thjeshtë për të përmirësuar bilancin e Operatorit të Sistemit të Shpërndarjes së Energjisë (OSSH) në prag të privatizimit. ”Të gjithë shqiptarët e kuptojnë se këto ndërprerje janë krejtësisht të pajustifikuara dhe përbëjnë një barrë të paarsyeshme financiare që nuk mund të ngarkohet në mënyre të padrejte tek qytetarët. Sipas të dhënave më të fundit të INSTAT, FMN-së si dhe sipas deklaratave të Bankës Botërore rezulton se gjendja nuk është përmirësuar në krahasim me një vit më parë, ashtu siç është shpallur nga kjo qeveri. Humbjet e energjisë në rrjet vazhdojnë të jenë të njëjta me ato të vitit 2007, në nivelin e 1/3 së energjisë që shpërndahet, pavarësisht reformës në këtë sektor. Si rrjedhojë, reduktimi i pretenduar i humbjeve të OSSH nga muaji Prill nuk është rezultat i aksioneve të ndërmarra për të eliminuar energjinë e pafaturuar, siç është deklaruar më parë nga ky operator, por është rezultat i ndërprerjes së përditshme abuzive të energjisë në shtëpitë e qytetarëve nga Kukësi në Delvinë”, thuhet në deklaratën për shtyp të kësaj lëvizje. Sipas kësaj lëvizje, nëse problemi kryesor i OSSH janë humbjet në rrjet dhe arkëtimet, atëherë problemi i shqiptarëve është mungesa totale e transparencës nga një ndërmarrje publike kaq e rëndësishme për ekonominë e vendit. ”Sepse remonti, megjithëse tepër i nevojshëm, nuk mund të përdoret si një alibi për mungesën e përgjegjshmërisë, profesionalizmit dhe transparencës së drejtuesve të këtij sektori dhe qeverisë”,- thuhet në deklaratë.