KQZ, PS kërkon të ulet numri i anëtarëve

17.08.2008 07:17 Politike - Burimi: SHQIP Politike

Komisioni Qendror i Zgjedhjeve do të vijojë të ndërtohet mbi logjikën e balancave politike. Ndonëse ende nuk ka filluar të diskutohet në detaje, në muajin shtator kjo çështje do të marrë zgjidhje. Fati i institucionit të menaxhimit të zgjedhjeve aktualisht po përflitet vetëm në korridoret politike të dy forcave më të mëdha në vend. Ajo çka duket e sigurt ka të bëjë me mandatin e nëntë anëtarëve aktualë, që do të cilësohet i mbyllur.

Qëndrimi

Burime nga partia më e madhe e opozitës deklarojnë se ekziston një ide paraprakisht për Komisionin Qendror të Zgjedhjeve ndonëse nuk ka qëndrim zyrtar të Partisë Socialiste. Mësohet se do të vijojë të mbështetet logjika e balancës politike në institucionin e rëndësishëm të zgjedhjeve. Një element tjetër i rëndësishëm ka të bëjë me faktin se në vlerësimin e socialistëve përbërja e KQZ-së së re nuk do të shkojë drejt dypolaritetit. Opozitarët e majtë mendojnë se numri i anëtarëve, nga nëntë që është aktualisht duhet të zvogëlohet. Mendohet gjetja e një formule që nuk përjashton prezencën e partive të vogla, por e redukton atë ndjeshëm. Aktualisht, përfaqësim në këtë institucion, përveç dy partive të mëdha kanë edhe Lëvizja Socialiste për Integrim, Partia Republikane dhe Partia Demokristiane. Me siguri thuhet se me ndryshimet e reja në Kodin Zgjedhor dhe caktimin e rregullave të reja të ndërtimit të KQZ-së, anëtarët aktualë do të përfundojnë mandatin e tyre. Skema që do të propozohet zyrtarisht prej Partisë Socialiste paraprakisht do të diskutohet në grupin e punës për reformën zgjedhore. Strukturë, që është ngritur prej kohësh dhe që funksionon në selinë rozë. Më parë, në korridoret politike, qarkullonte ideja e një skeme me gjashtë anëtarë në Komisionin Qendror të Zgjedhjeve. Tre prej tyre mendohej t‘i propozonte partia kryesore e shumicës parlamentare, tre të tjerë partia kryesore e opozitës dhe një do të caktohej prej Presidentit. Kjo ide u shoqërua menjëherë me reagimin e Lëvizjes Socialiste për Integrim për shkak se prekej direkt.

Situata

Paketa e ndryshimeve kushtetuese e votuar më 21 prill të këtij viti vendosi që KQZ-ja të mos jetë më institucion kushtetues. Detajet e tjera rreth mënyrës së kompozimit dhe funksionimit të Komisionit Zgjedhor i janë lënë në dorë ligjit të zgjedhjeve, pra Kodit Elektoral. Puna për hartimin e këtij të fundit është në etapat e para dhe siç është thënë publikisht ai do të mbarojë në muajt e vjeshtës. Dhjetori është afati limit kur duhet të kryhet ndërhyrja, për shkak se gjashtë muaj pas kësaj kohe pritet të zhvillohen zgjedhjet parlamentare. Ndonëse i ka ndryshuar profili kushtetues, KQZ-ja ka vijuar të kryejë detyrën në rastin e organizimit të zgjedhjeve të Komunës së Kasharit dhe shpalljes së rezultatit të tyre. E ardhmja e profilit të institucionit mbetet në dorë të debatit politik në tryezën e Komisionit Parlamentar për Reformën Zgjedhore. Pasiguria e karrierës së tyre në një mënyrë apo një tjetër është pohuar prej vet anëtarëve të Komisionit Qendror të Zgjedhjeve. Duke pranuar fatin e të qenit "kurban" të mundshëm të pakteve politike, disa prej tyre kanë filluar të mendojnë për të ardhmen. Pak ditë më parë, këtë veprim e kryen anëtarët e Komisionit Qendror të Zgjedhjeve, Dëshira Subashi dhe Arben Ristani. Pasi kreu i shtetit hapi "konkursin" për anëtarë të rinj të Gjykatës së Lartë, reflektuan edhe juristët e KQZ-së. Ristani dhe Subashi depozituan jetëshkrimin dhe të dhënat e karrierës së tyre bashkë me kërkesën për t‘u zgjedhur anëtarët më të rinj të Gjykatës së Lartë.

Anëtarët

Nëntë juristët që menaxhojnë zgjedhjet

Pesë nga nëntë anëtarët aktualë të Komisionit Qendror të Zgjedhjeve rezulton të jenë zgjedhur dy vite më parë. Fatmir Kumbaro ishte një propozim i Presidentit të atëhershëm Alfred Moisiu, ndërsa Flamur Çato erdhi si propozim i Këshillit të Lartë të Drejtësisë. Emri i tretë, por që ngjalli edhe më shumë debat, ishte ai i Arben Ristanit që u votua në Kuvend nga shumica e djathtë teksa pretendohej se i takonte si anëtar së majtës. Pas krijimit të kësaj situate dhe bllokimit të Kuvendit për një kohë të gjatë, u realizua ndërhyrja në Kushtetutë. Aty u sanksionua shtimi i Komisionit Qendror të Zgjedhjeve edhe me dy anëtarë të rinj që do të votoheshin nga Parlamenti. Konkretisht ata ishin Genti Shala, i propozuar nga Lëvizja Socialiste për Integrim, dhe Shkëlqim Hysi nga Partia Demokristiane. Çlirim Gjata, Dëshira Subashi, Klemend Zguri dhe Dodë Prenga janë anëtarët më të vjetër që janë zgjedhur disa vite më parë në këto funksione.

Artikullin origjinal mund ta lexoni ketu

lajme.parajsa.com