Kryeministri propozon gjeneral Maksim Malajn për postin e shefit të Shtabit të Përgjithshëm

20.07.2008 18:05 Politike - Burimi: Metropol Politike

Dekreti pret firmën e Presidentit Topi

Malaj ka karrierë të gjatë në FA dhe është trajnuar në vendet anëtare të NATO-s

Gjeneral-brigade Maksim Malaj është propozuar nga Kryeministri Sali Berisha për postin e shefit të Shtabit të Përgjithshëm të Forcave të Armatosura të Shqipërisë. Propozimi i është dërguar dje Presidentit Bamir Topi, i cili ka të drejtën ligjore për të vendosur nëse Malaj do të drejtojë ose jo Forcat e Armatosura. Propozimi për emrin e ri të shefit të Shtabit të Përgjithshëm të FA-së është bërë mbi një muaj, pasi Presidenti Topi firmosi largimin e gjenerallejtënant Luan Hoxha nga ky post.

Propozimi

Në bazë të nenit 169, pika 3 të Kushtetutës dhe në mbështetje të ligjit “Për pushtetet dhe autoritetet e komandimit e të drejtimit strategjik të Forcave të Armatosura të Republikës së Shqipërisë”, Kryeministri Berisha i propozon Presidentit Topi emërimin në detyrën e shefit të Shtabit të Përgjithshëm të FA-ve gjeneralbrigade Maksim Malaj. Ky i fundit është dekretuar me këtë gradë më 10 qershor 2008 pas propozimit që iu bë kreut të shtetit nga ministri i Mbrojtjes Gazmend Oketa. Burime pranë Kryeministrit bëjnë të ditur për “Metropol” se Kryeministri Berisha ka përzgjedhur emrin e Maksim Malajt mes disa emrave të ushtarakëve të lartë, të cilët ishin kandidatë për postin e shefit të Shtabit të Përgjithshëm. Burimet shprehen se kandidatura e gjeneralbrigade Maksim Malaj është përzgjedhur për shkak të karrierës së tij të gjatë në Forcat e Armatosura si dhe trajnimeve të tij në disa prej vendeve anëtare të NATO-s. Burimet shprehen se gjithashtu gjeneral-brigade Maksim Malaj është një nga emrat që gëzon mbështetjen edhe të Presidentit Topi, çka do të bëjë që dekretimi i emërimit të tij në postin e shefit të Përgjithshëm të Shtabit do të jetë i shpejtë dhe pa kontestime. Ndërkohë Presidenca nuk pranon të bëjë komente zyrtare në lidhje me propozimin e bërë nga Kryeministri, ndërsa burimet shprehen se kreu i shtetit do të shqyrtojë propozimin sipas afateve kohore.

Reformimi i Shtabit

Pas tragjedisë së ndodhur në Gërdec më 15 mars 2008, Shtabi i Përgjithshëm i FA-së u përfshi nga një sërë ndryshimesh, ku ushtarakët më të lartë u shkarkuan nga detyrat me propozim të Kryeministrit dhe ministrit të Mbrojtjes. Shtabi i Përgjithshëm u vu nën akuza të ashpra nga ish-ministri Fatmir Mediu për shkak se nuk kishte përmbushur detyrat qoftë në procesin e transferimit të municioneve nga depo të ndryshme ushtarake në drejtim të fabrikës së demontimit të armëve në Gërdec, ashtu edhe për sa i takon sigurisë teknike në këtë fabrikë. Në bazë të rregullores mbi të cilën funksionon Shtabi, i gjithë procesi duhej të monitorohej nga ushtarakët shqiptarë, ndërsa në realitet transporti i municioneve si dhe demontimi nuk ishin nën vëzhgimin e drejtuesve të FA-ve. Por në debatin e hapur pas tragjedisë Shtabi i Përgjithshëm akuzoi ish-ministrin Mediu se kishte shmangur nga vendimmarrja ushtarakët e lartë. Por pas analizave të bëra, qoftë në mbledhjet e Sigurimit Kombëtar, ashtu dhe në strukturat e larta të Ministrisë së Mbrojtjes, kreut të shtetit iu propozua nga Kryeministri shkarkimi i gjenerallejtënant Luan Hoxha. Ky i fundit u largua zyrtarisht nga kjo detyrë më datën 16 qershor, megjithëse kërkesa për shkarkimin e tij kishte më shumë se dy muaj që ndodhej në tryezën e Presidentit. Në valën e shkarkimeve në strukturat drejtues të Shtabit të Përgjithshëm u përfshinë edhe disa ushtarakë të tjerë të lartë, përfshi këtu edhe drejtorin e Shërbimit Informativ Ushtarak.

Kolonel Maksim Malaj

Curriculum Vitae

Emri Maksim

Mbiemri Malaj

Datëlindja 13.12.1958

Vendlindja Vlorë

Grada Kolonel

Kombësia Shqiptare

Kualifikimet

1978-1981 Akademia Ushtarake “Skënderbej”, Këmbësori, Tiranë

1990-1992 Akademia e Mbrojtjes, Tiranë

1999 Kursi i oficerit të Shtabit, Holandë, qershor 2001 Kurs për armë-kontrollin, Kroaci,

Nëntor Kurs trajnimi për vrojtimin ajror, Bullgari

Korrik 2003 Kur për ndikimin e fatkeqësive në mjedisin e sigurisë, Kroaci

Maj 2004 Kurs trajnimi (organizimi i një vizite vlerësuese në kuadër të Dokumentit të Vjenës 1999), Angli

Korrik 2005 Seminar: Inspektimi i përgjithshëm i ushtrisë amerikane, Gjermani

Mars 2006 Kurs “Shtabi i Forcave të Bashkuara Operacionale”, Holandë

Shtator-dhjetor 2007 Kurs “Studime të strategjisë së mbrojtjes”, Gjermani

Eksperienca në punë

1981-1982 Instruktor i përgatitjes së zjarrit në Shkollën e Instruksionit Zall-Herr

1982-1987 Instruktor stërvitje në rep. usht. nr. 2103, Tiranë

1987-1988 Instruktor në degën e stërvitjes në D8K, Tiranë

1988-1989 Komandant i batalionit në rep. usht. nr. 1946, Tiranë

1989-1990 Komandant i batalionit territorial, Vorë, Tiranë

1992-1993 Instruktor në degën e operacioneve në D8K

1993-1994 Shef operativ në rep. usht. nr. 1105, Tiranë

1994-1997 Instruktor në degën e operacioneve DK, Tiranë

1997-2005 Inspektor në Drejtorinë e Inspektimit të Përgjithshëm në MM

Maj-dhjetor 2001 Përfaqësues në Qendrën e Armë-Kontrollit, Kroaci

2005-2007 Shefi i Shtabit të BrRSH-së

2007- Komandat i BrRSH-së

Gjuhët e huaja

Anglisht Niveli 3-3-2-2

Italisht Njohuri bazë

Ecuria në gradë

1991 Kapiten

1994 Major

1997 N/kolonel

2002 Kolonel

2008 Gjeneral-brigade

Njohuritë në kompjuter

Wndows 98, Word 200, XP, Microsoft Power Point, Microsoft Excel, Internet.

Artikullin origjinal mund ta lexoni ketu

lajme.parajsa.com