LSI: KLSH të hetojë KESH-in për abuzimet me furnizimin me drita

17.08.2008 07:17 Politike - Burimi: SHQIP Politike

Partia e dytë e opozitës i kërkoi dje publikisht Kontrollit të Lartë të Shtetit të aktivizohet për të hedhur dritë mbi aferat e dyshimta të KESH-it. Nënkryetarja e Lëvizjes Socialiste për Integrim, Filloreta Kodra, vlerësoi se qytetarët e Tiranës dhe të së gjithë Shqipërisë e kuptuan qartë dhe hapur se të ashtuquajturat riparime në rrjet nuk janë gjë tjetër veçse shitje abuzive. "Shitje në masë të energjisë elektrike dhe mashtrim i hapur i qytetarëve e lënie e tyre në errësire në këto ditë të nxehta vere", insistoi ajo. Teksa shtoi se edhe më e rëndë bëhet situata mbasi problemi ka arritur atje ku s‘mban më, drejtuesi i OST-së pranoi publikisht se shqiptarët duhet të rrinë në errësirë, sepse qeveria e Berishës për qëllime përfitimi duhet të shesë energji. "LSI kishte denoncuar me forcë edhe më parë këtë mashtrim të vazhdueshëm, që binte në kurrizin jo vetëm të qytetarëve, por edhe të bizneseve të tyre", kujtoi Kodra. Duke theksuar se qeveria shqiptare, ashtu siç ka bërë vazhdimisht në këto vjet, gënjeu dhe nuk pranoi këtë mashtrim që po u bënte qytetarëve shqiptarë. Nënkryetarja e LSI-së nënvizoi se ndonëse vetë qeveria dhe KESH-i pranuan se gjashtëmujori i parë i këtij viti konsiderohet si një nga më të mirët për gjendjen hidrike dhe baseneve të hidrocentraleve, prodhimi i energjisë elektrike në të kundërt ishte nën nivelin e viteve ku ka pasur krizë hidrike, sipas të dhënave të raportuara nga vetë qeveria. Kjo, sqaroi Kodra, provon haptazi abuzimin e vazhdueshëm me energjinë elektrike në kurriz të qytetarëve. LSI-ja mendon se, me gjithë rritjet shumë të mëdha të çmimit të energjisë elektrike në kurriz të qytetarëve të varfër shqiptarë dhe biznesit, situata ekonomike dhe KESH-i është përkeqësuar. Kjo e ka bërë të pamundur edhe procesin e privatizimit të OST-së, duke provuar qartë se abuzimi është i përmasave të mëdha. "Po rrënon ekonomikisht korporatën dhe po ul në mënyrë drastike vlerën ekonomike të saj", vijoi Kodra. Duke analizuar aspektin ekonomik, ajo këmbënguli se qytetarët shqiptarë, vetëm për humbjet në rrjet nga abuzimet, janë të detyruar të paguajnë rreth 600 lekë të reja në muaj. Kjo është e barabartë me shtesën e pensioneve e pagave të bëra nga qeveria, pra shqiptarët janë të detyruar të paguajnë edhe vjedhjet e punonjësve të KESH-it. LSI-ja i kërkon KLSH-së që të aktivizohet për të hedhur dritë mbi këto afera të dyshimta të shitjes së energjisë, kur qytetarët rrinë në errësirë dhe të bëjnë publike rezultatet e këtij kontrolli. Ndërsa i bën thirrje qeverisë shqiptare të ndërpresë urgjentisht vazhdimin e operacioneve të tilla, të furnizojë me energji qytetarët dhe të ndalë ndëshkimin masiv që po u bën atyre. "Ndëshkim që ka thelluar varfërinë, si dhe ka cenuar në mënyrë të frikshme cilësinë e jetës së shqiptarëve, duke u a bërë të pamundur jetesën në vendin e tyre", theksoi Kodra.

KESH

Hetimi parlamentar, komisioni mbeti në harresë

Saktësisht një vit më parë, Lëvizja Socialiste për Integrim denoncoi me të madhe korrupsionin që, sipas saj, po realizohej në Korporatën Elektroenergjetike Shqiptare. Drejtuesit e lartë të kësaj partie nuk hezituan të ngrenë zërin për ato që i quajtën abuzime të frikshme me fondet publike. Në këtë kuadër u angazhuan për ngritjen e një komisioni hetimor parlamentar për të hetuar abuzimet që janë bërë në Korporatën Elektroenergjetike. Ky investigim përfshinte të gjithë periudhën e krizës energjetike, por edhe kohën kur ky institucion drejtohej nga Andi Beli. Teksa kërkuan që në një moment të tillë kritik ministri Genc Ruli dhe drejtori i korporatës të jepnin menjëherë dorëheqjen e të merrnin përgjegjësitë mbi vete. LSI-ja nuk hezitoi që t‘i kërkojë edhe Kryeministrit të vendit të shpjegohet publikisht përpara shqiptarëve për këtë situatë skandaloze, në kundërshtim të plotë me përbetimet dhe premtimet e tij elektorale dhe qeverisëse. Partia e drejtuar nga ish-kryeministri Ilir Meta, paralelisht me hetimin parlamentar, bëri thirrje për hartimin e një plani emergjent masash konkrete për daljen nga situata. Por teksa socialistët diskutuan numrin e komisioneve hetimore që kishin përgatitur të ngrihen në fundvitin 2007, çështjen e hetimin mbi Korporatën Elektroenergjetike ia lanë Lëvizjes Socialiste për Integrim. Nuk u arrit të kuptohej nëse kjo e fundit e konkretizoi propozimin në Kuvend apo jo. Duket qartë se, pas një viti, hetimi parlamentar nuk është realizuar dhe kërkohet një investigim prej Kontrollit të Lartë të Shtetit.

Artikullin origjinal mund ta lexoni ketu

lajme.parajsa.com