Ndërsa republikanët shprehen për koalicion të përbërë, PDR e PDK në pritje të ofertave

TIRANË- Ndërsa republikanët shprehen të gatshëm për një koalicion të përbërë, reformatorët e shohin në një prizëm tjetër bashkëpunimin me PD-në. Kjo për arsyen se në muajin Shtator, atëherë kur pritet të fillojnë edhe negociatat intensive me drejtues të PD-së, drejtuesit e lartë të PDR-së, Genc Pollo dhe Tritan Shehu pritet që të përfshihen sërish në strukturat e Partisë Demokratike. Edhe pse drejtues të kësaj partie shprehen se ky është një rikthim i logjikshëm, faktet flasin krejt ndryshe. Pamundësia për të pasur një elektorat përfaqësues për t’i bërë ballë edhe ndryshimit të sistemit të ri zgjedhor, ka bërë të mundur që përfaqësues të kësaj partie të shohin me seriozitet ftesën e PD-së, ose më saktë të kryeministrit Sali Berisha për t’u përfshirë në strukturat e Partisë Demokratike. Ndërkohë,krah tyre, vite më parë u largua edhe demokristiani, Nard Ndoka, i cili dy ditë më parë deklaroi se në PD nuk ka ndryshuar asgjë për të cilën ata u larguan vite më parë dhe se kjo parti në sajë të politikave të saj kishte arritur të krijonte më shumë viktima sesa politikanë. Megjithatë, demokristianët nuk japin një përgjigje konkrete mbi qëndrimin që do të mbajnë në lidhje me PD-në, kjo edhe për shkak të qëndrimit që PD do të mbajë ndaj tyre. Kryetari i PDK-së, Nard Ndoka, deklaroi dje se qëndrimi i partisë që ai drejton do të varet nga Kodi i ri Zgjedhor dhe negociatat me Partinë Demokratike. Ndërsa nuk janë pozicionuar ende me qëndrimet e tyre PAA dhe PBDNJ, dy parti të cilat u përfshinë në koalicionin qeverisës në sajë të një marrëveshje të nënshkruar tre vite më parë me PD-në.