PDS: Nuk pranojmë arnimet e kabinetit

19.07.2008 18:30 Politike - Burimi: Metropol Politike

Duçkallari kërkon largimin e qeverisë “Berisha”

Partia Demokracia Sociale u shpreh dje se qeveria e kryesuar nga Kryeministri Sali Berisha duhet të largohet, pasi ka dështuar në të gjitha drejtimet. Sekretari politik i PDS-së Artur Duçkallari theksoi se me përpjekjet e fundit për të retushuar qeverinë e tij të dështuar Berisha po kërkon dhe synon të manipulojë dhe t’u hedhë sërish hi syve shqiptarëve, vetëm një vit larg zgjedhjeve parlamentare. “Të bezdisur nga paaftësia e ministrave të Berishës, shqiptarët kërkojnë sot largimin e kësaj qeverie dhe jo lëvizje emrash për të kënaqur orekset politike dhe ekonomike të lobeve të ndryshme brenda PD-së apo maxhorancës, që me sa duket kanë kohë që po kërkojnë të dalin nga diktati kryeministror”, - tha Duçkallari. Sipas tij, PDS-ja vlerëson se vetëm katër muaj pas tragjedisë më të rëndë nën sundimin e kësaj qeverie asaj të Gërdecit, ky makijazh qeveritar është një sforco e dështuar. “Duam t’i kujtojmë këtij kryeministri se në Gërdec humbën 26 jetë njerëzish të pafajshëm dhe përgjegjëse për këtë është qeveria e tij. Premtimet dhe përbetimet e tij elektorale për luftë me zero tolerancë ndaj korrupsionit apo dhe heqjes dorë vullnetarisht nga imuniteti nga ana e deputetëve të maxhorancës së tij përballë akuzave të prokurorisë kanë rezultuar se për të s’përbëjnë gjë tjetër veç një pjesë e monologut të tij të vjetër demagogjik”, - tha ai. Më tej sekretari politik i PDS-së theksoi se konstatojnë me keqardhje se koalicioni qeveritar i kësaj maxhorance sot është kthyer në një aleancë për të shfrytëzuar pushtetin dhe jo për të ndërtuar shtetin. “Fati i një ministri që largohet dhe i një tjetri që vjen, apo rokadat mes tyre për të kënaqur tekat e ndonjë partneri brenda koalicionit, apo forcuar pozitat klanore dhe siguruar linjat monopoliste të kryeministrit, për shqiptarët nuk ndryshojnë më asgjë”, - tha Duçkallari.

Artikullin origjinal mund ta lexoni ketu

lajme.parajsa.com