Kryetari i LSI, Ilir Meta, tha dje se partia e tij nuk ka frikë nga bashkëpunimi mes Berishës dhe Ramës. “Ne nuk i druhemi asnjë lloj bashkëpunimi ndërmjet Berishës dhe lidershipit të PS, pasi jemi të përgatitur dhe jemi të qartë për të gjitha mundësitë që mund të prodhojë një bashkëpunim i tillë, i degraduar dhe i degjeneruar deri tani, që degjeneroi Kushtetutën e shqiptarëve dhe sakrificat e tyre për të patur një Kushtetutë demokratike dhe evropiane dhe që synon të degjenerojë edhe votën e shqiptarëve përmes kulisave që kanë zhvilluar lidershipet e tyre dhe përfaqësuesit e tyre deri tani”, - tha Meta. Kryetari i LSI doli në konferencë për shtyp për të komentuar rezultatet e shtatëmujorit të qeverisjes. “Berisha dhe qeverisja e tij, sponsorizuar fort nga kasta korruptive dhe autokratike që ka ndërtuar gjatë këtyre tre viteve, shkatërruan edhe sistemin institucional në vend me atentatin që i bënë Kushtetutës dhe institucioneve, duke lënë përfundimisht në kalendar e matrica ato reforma që ka kërkuar prej kohësh përparimi dhe integrimi i mëtejshëm i vendit në NATO dhe në BE. Edhe partnerët tanë ndërkombëtarë po i bien fort kambanave dhe prej kohësh e paralajmërojnë Berishën dhe të gjithë shqiptarët për rrezikimin e integrimit të vendit, por, siç e dini, ai ka futur kokën si struci dhe vazhdon të jetojë me delirin e tij jashtë këtij realiteti tepër problematik dhe shqetësues. E si të mos mjaftonte e gjithë kjo panoramë dështimesh dhe shqetësimesh, duke e paraqitur qeverisjen e tij si sukses, Sali Berisha ka pafytyrësinë e papërgjegjshmërinë të gënjejë për reforma të pakryera në vend apo qoftë edhe për reformën zgjedhore, e cila gjoja do të përfundonte përpara Samitit të NATO-s në Bukuresht, apo për kartat e identitetit që do të shpërndaheshin deri në fund të vitit të parë të qeverisjes së tij, por që duket qartë se nuk do të jenë gati as për zgjedhjet e ardhshme dhe në këtë mënyrë të vërë në një pikëpyetje të madhe edhe procesin e zgjedhjeve të ardhshme, legjitimitetin dhe integritetin e votës së shqiptarëve, duke rrezikuar realisht riciklimin e krizave të mëparshme në vend. Megjithatë, për fat të mirë po hyjmë në vitin e fundit të kësaj qeverisjeje dhe vota e shqiptarëve i ka të gjitha mundësitë që ta ndëshkojë përfundimisht Sali Berishën për vuajtjet që i ka shtuar popullit shqiptar”, - tha Meta.

Ai u pyet në lidhje me një deklaratë të Xhafës në emër të PS, i cili ka rikonfirmuar edhe njëherë vullnetin e Partisë Socialiste për ta bërë reformën zgjedhore me Partinë Demokratike.

“Ne kemi vetëm shqetësimin e votës së shqiptarëve dhe kemi shqetësimin që asnjë votë e opozitës të mos shkojë dëm. Por, nëse përfaqësuesit e Partisë Socialiste vazhdojnë të ecin në drejtim të gabuar, ne nuk mund t’i ndalojmë për momentin, por padyshim që do t’ua bëjmë të qartë të gjithë shqiptarëve rolin e tyre si nënkontraktorë të Sali Berishës për të dëmtuar interesat e opozitës, interesat e demokracisë, për të degjeneruar votën e shqiptarëve. Jam i bindur që do të kemi përkrahjen dhe miratimin edhe të shumicës së elektoratit të tyre, për t’i ndëshkuar këta njerëz të kapur nga Sali Berisha”, - tha Meta.

PS: Meta lëpin atë që ka pështyrë për interesa personale

Kanë reaguar menjëherë zyrtarët e Partisë Socialiste pas deklaratës së kryetarit të LSI se Rama është i kapur nga Berisha. Zëdhënësja e PS, Mimi Kodheli, tha se Meta nuk mund të quajë të degjeneruar një bashkëpunim që kërkohej prej partnerëve ndërkombëtarë.

Ajo e akuzoi Metën se shpif dhe fyen, ndërsa është i zhytur vetë në politikën e batakut të interesave personale. “Në qoftë se ka një bashkëpunim të degjeneruar në politikën shqiptare, janë pazaret e ulëta mes udhëheqësish që shahen për interesa krejt personale e pastaj lëpijnë atë që kanë pështyrë për hir të pushtetit personal”, - tha Kodheli. “Ilir Meta quan të degjeneruar një bashkëpunim parlamentar që kërkohej tash e 17 vjet për reformat e integrimit në NATO e BE, kurse ne degjenerim quajmë politikën e batakut të shpifjeve e të fyerjeve dhe të pazareve mes atyre që kanë 17 vjet që ndahen si armiq e pajtohen si miq për kokë, thjesht dhe vetëm për interesa personale”, - vijoi zëdhënësja e PS.