Ratifikoni sa më shpejt Protokollin e Zgjerimit të Aleancës

19.07.2008 18:30 Politike - Burimi: Metropol Politike

Jozefina Topalli dhe Lula Bibiç u shkruajnë 26 parlamenteve të vendeve të NATO-s

Kryetarja e Kuvendit të Shqipërisë, Jozefina Topalli, dhe homologu i saj kroat Luka Bebiç kanë ndërmarrë një lëvizje të mirëfilltë politike, e cila ka për qëllim përshpejtimin e ratifikimit nga ana e parlamenteve dhe senateve të vendeve anëtare të NATO-s të Protokollit për Zgjerimin e Aleancës. Në këtë letër dy drejtuesit e parlamenteve theksojnë se Shqipëria dhe Kroacia dëshirojnë të bëhen anëtarë të NATO-s në Samitin në Strasburg dhe Kehl në pranverën e vitit të ardhshëm. Por për të mundësuar këtë dëshirë nevojitet përfundimi në kohë i procesit të ratifikimit. Kjo letër u drejtohet gjithë drejtuesve të parlamenteve dhe senateve të 26 vendeve anëtare të Organizatës së Traktatit të Atlantikut të Veriut. “Roli juaj drejtues, së bashku edhe me rolin aktiv dhe mbështetës të parlamentarëve të vendit tuaj në stimulimin, vazhdimin dhe finalizimin e procesit të ratifikimit sipas procedurave kombëtare është i një rëndësie shumë të veçantë. Kjo letër është një shprehje e vullnetit tonë për t’ju siguruar se të dy vendet tona kanë ndërmarrë, janë duke kryer dhe do të bëjnë gjithçka për të justifikuar çdo masë, çdo përpjekje tuajën për të konfirmuar Shqipërinë dhe Kroacinë si anëtarë të rinj të Aleancës”, - thuhet në letër. Topalli dhe Bebiç shprehen se ceremonia e nënshkrimit të Protokollit të Zgjerimit zhvilluar në Bruksel është kapitulli i fundit i një rruge të gjatë për Kroacinë dhe Shqipërinë, të cilat kanë ndërmarrë reforma gjithëpërfshirëse të forcave të armatosura, mbrojtjes dhe sigurisë, të sistemit gjyqësor dhe atij politik. E thënë ndryshe, të të gjithë shtetit dhe shoqërisë. “Kombet tona janë gati për një fillim të ri, janë gati për t’u bashkuar me Aleancën si aleatë të zotë, të besueshëm dhe të sigurt, për të mbrojtur vlerat dhe interesat e përbashkëta dhe për të kontribuar fuqishëm në sigurinë e të gjithë aleatëve dhe të mbarë botës, për çdo kërcënim që mund të hasim. Është një privilegj i veçantë për brezin tonë të kemi mundësi për të siguruar një të ardhme më të sigurt për fëmijët tanë dhe për brezat e ardhshëm”, - thuhet në letër. Dy drejtuesit e parlamenteve deklarojnë se gjatë kësaj faze të fundit të rrugëtimit drejt NATO-s dhe pas anëtarësimit në të Shqipëria dhe Kroacia do të vazhdojnë me më tepër vendosmëri të gjitha reformat. “Ne jemi të bindur se pranimi ynë në NATO do të kontribuojë në sigurinë e Evropës Juglindore në veçanti dhe të rajonit euroatlantik në përgjithësi. Gjithashtu do të shërbejë si një shembull i shkëlqyer, duke hapur një perspektivë premtuese për të gjitha vendet evropiane që dëshirojnë t’i bashkohen Aleancës”, - shkruajnë Topalli dhe Bibiç. Ata shpresojnë që dyert e Aleancës, që po hapen për dy vendet, do të mbeten të hapura për çdo shtet evropian me të cilin ndajmë të njëjtat vlera dhe që është i gatshëm për t’u bashkuar. “Nga ana jonë dëshirojmë t’ju sigurojmë se vendet tona janë të vendosura për të luajtur sa më mirë rolin si vende anëtare të NATO-s me të drejta të plota”, - shkruan Topalli dhe Bibiç në këtë letër të përbashkët. Ata mendojnë se roli i parlamenteve kombëtare në pranimin e anëtarëve të rinj të Aleancës është me të vërtetë i rëndësishëm, ashtu siç duhet të jetë në një komunitet të demokracive, kur bëhet fjalë për një vendim të rëndësishëm.

Artikullin origjinal mund ta lexoni ketu

lajme.parajsa.com