Ekonomistët duhet ta modifikojnë teorinë e tyre se një shtet i pasur duket që nga rrogat e shtetarëve të tij. Kjo teori e tyre bie poshtë po të shikosh rrogat e shtatë presidentëve të Ballkanit. Në "top-listën" e presidentëve më të paguar në rajon qëndrojnë presidenti kroat, Stipe Mesiç, i cili e ka rrogën mujore 3600 euro në muaj. Pas tij renditet menjëherë presidenti i Kosovës, Fatmir Sejdiu, me vetëm 200 euro më pak se Mesiç. I treti në listë është është presidenti rumun, Trajan Basesku, me 2500 euro; kurse presidenti ynë, Bamir Topi, merr një rrogë mujore prej 2100 eurosh në muaj.
Lista
Agjencia ballkanike e lajmeve "BIRN" në një raport të saj të botuar para dy ditësh kishte stiluar edhe renditjen e presidentëve më të paguar. Në krye të listës qëndronte presidenti kroat, Mesiç, i ndjekur nga homologu i tij kosovar, Fatmir Sejdiu. Kurse paga mujore e presidentit rumun, Trajan Basesku, është 2500 euro edhe pse GDP-ja e Rumanisë është pesë herë më e madhe nga ajo e Kosovës, ndërsa buxheti vjetor është 170 herë më i madh në krahasim me atë kosovar. Vendin e katërt, sipas pagës, e merr presidenti shqiptar, Bamir Topi, me 2100 euro, duke lënë pas presidentin serb, Boris Tadiç, me rreth 1900 euro. Kurse në vend të gjashtë qëndron presidenti i Malit të Zi, Filip Vujanoviç, i cili merr në muaj 1300 euro. Presidenti i varfër i rajonit, sipas kësaj liste, është ai maqedonas. Branko Cërvenkovski ka një pagë mujore prej rreth 1200 eurosh.
Debatet
Paga e majme e presidentit kosovar, Fatmir Sejdiu, në krahasim me buxhetin e saj, ka hapur debate në Kosovë. Disa shoqata i kanë kërkuar Sejdiut që ai të ketë pagën e tij në bazë të buxhetit të shtetit. Megjithatë, veç rrogës, presidenti kosovar Sejdiu nuk merr të ardhura të tjera shtesa nga fondi i shtetit. Para hyrjes në fuqi të Kushtetutës së Kosovës, Sejdiu merrte një rrogë mujore prej 2612 eurosh, por me hyrjen e kësaj Kushtetute në fuqi, më 15 gusht të këtij viti, edhe rroga e Sejdiut u rrit. Por edhe me këtë shumën e mëparshme Sejdiu ka marrë një pagë të madhe krahasuar me buxhetin mujor të Kosovës. Ndërsa, presidenti shqiptar, Bamir Topi, i cili renditet në vend të katërt, krahasuar me presidentët e tjerë duket se ka një pagë mesatare. Ndërkohë që rrogat e deputetëve shqiptarë krahasuar me ata evropianë janë disa herë më të larta.

Stipe Mesiç
President i Kroacisë
Rroga mujore: 3600 euro

Fatmir Sejdiu
President i Kosovës
Rroga mujore: 3400 euro

Trajan Basesku
President i Rumanisë
Rroga mujore: 2500 euro

Bamir Topi
President i Shqipërisë
Rroga mujore: 2100 euro

Boris Tadiç
President i Serbisë
Rroga mujore: 1900 euro

Filip Vujanoviç
President i Mali të Zi
Rroga mujore: 1300 euro

Branko Cërvenkovski
President i Maqedonisë
Rroga mujore: 1200 euro