Spiunët, nesër shqyrtimi tek Ligjet

02.09.2008 12:02 Politike - Burimi: Metropol Politike

Hapja e dosjeve dhe statusi për minatorët, çelin axhendën e punimeve të Kuvendit

I vlerësuar si një prioritet i Kuvendit për këtë sesion të saponisur parlamentar, Komisioni parlamentar i Ligjeve do të nisë punimet e tij, pikërisht aty ku e la sesionin e kaluar; në diskutimin dhe miratimin e ligjit për pastërtinë e figurave. Sekretari i këtij komisioni, Sali Shehu, u shpreh për gazetën se komisioni do të vijojë në mbledhjen e së mërkurës me debatin për projektligjin “Për pastërtinë e figurës së funksionarëve të lartë të administratë publike të të zgjedhurve”. Drafti i paraqitur në komision nga Partia Demokratike është kontestuar nga opozita, e cila ka vlerësuar se projekti është ilustrativ dhe se nuk respekton rezolutën e Këshillit të Evropës. Mazhoranca ka miratuar vetëm dy nenet e para të projektit dhe është pritje edhe të konsensusit të opozitës për nenet e tjera, në të kundërt siç ka paralajmëruar ajo, do ta miratojë projektin edhe pa votat e opozitës. Nëse mazhoranca do të vendosë të mos marrë parasysh votat e opozitës, atëherë është e detyruar të ndryshojë të paktën projektin, konkretisht në nenin që flitet për përbërjen e Autoritetit të Kontrollit të Figurave, i cili në përbërjen e tij prej 5 vetësh ka edhe dy anëtarë nga opozita. Në projektin e demokratëve ngritja e këtij autoriteti propozohet për zbatimin e ligjit në fjalë, në përbërje të të cilit janë dy nga mazhoranca, dy nga opozita dhe një i zgjedhur me konsensus. Ky autoritet fillon procedurën për subjektet e ligjit, me kërkesë të titullarit të institucionit të emërtesës dhe me kërkesë të vetë subjektit. Procesit të verifikimit i nënshtrohen edhe kandidatët për emërimin në postet që i nënshtrohen sipas këtij ligji verifikimit. Kur subjekti i verifikuar ka figurë jo të pastër morale, sipas kuptimit të këtij ligji, atëherë ai duhet të paraqesë dorëheqjen nga detyra. Në këtë rast materialet verifikuese mbeten konfidenciale. Nëse ai refuzon të dorëhiqet nga funksioni, marrëdhëniet e tij të punës përfundojnë me motivacionin “padenjësi e figurës së funksionarit”. Autoriteti publik bën publike në faqen e vet zyrtare identitetin e të gjithë zyrtarëve të kualifikuar si të papajtueshëm për të vazhduar detyrën. Veprimtaria e këtij Autoriteti vazhdon deri më 31 dhjetor të vitit 2014. Po të mërkurën, Komisioni parlamentar për Shëndetësinë, Punët dhe Çështjet Sociale planifikoi gjatë mbledhjes së djeshme futjen në procedura të komisionit të shqyrtimit të projektligjit “Për statusin e minatorit” të propozuar nga Lëvizja Socialiste për Integrim. Projekti në fjalë sipas zyrtarëve të kësaj lëvizjeje, është hartuar nga Sindikata e Minatorëve të Shqipërisë dhe trajton problemin e statusit të minatorit në detaje. Ai detyron Qeverinë të ulet me minatorët, të diskutojë për situatën dhe të punojë për t’i dhënë statusin e minatorit kësaj shtrese shoqërore.

Spiunët

Komisioni i Ligjeve do të vijojë në mbledhjen e të mërkurës debatet për projektligjin “Për pastërtinë e figurës së funksionarëve të lartë të administratë publike të të zgjedhurve”. Debate të forta pritet të zhvillohen në këtë komision, duke iu referuar pikëpamjeve krejt të kundërta që opozita dhe mazhoranca kanë për këtë projekt.

Statuti i minatorit

Kuvendi pasi rrëzoi disa amendamentet për statutin e minatorit, të propozuar nga një grup deputetësh të Partisë Socialiste, do të nisë nga shqyrtimi i projektligjit “Për statutin minatorit” të propozuar nga LSI-ja. Ai parashikon të gjitha të drejtat dhe detyrimet që shteti duhet të ketë parasysh për trajtimin e kësaj shtrese shoqërore në vend.

Artikullin origjinal mund ta lexoni ketu

lajme.parajsa.com