Shfaqja e këtij dokumentari homazh për mijëra shqiptarët që u eliminuan në gjyqe politike apo pa gjyq fare ishte vendi i duhur që kryetarja e Parlamentit, Jozefina Topalli, një nga të paktët drejtues të Partisë Demokratike, që i përket kësaj shtrese, të përsëriste edhe njëherë kërkesën e saj që të hapen dosjet e "spiunëve". E ndërsa kryeparlamentarja ishte mjaft e ashpër në deklaratat e saj, kreu i shtetit duke refuzuar të bëjë komente për emrat e rinj të anëtarëve të Gjykatës së Lartë, ka preferuar të këmbëngulë në dënimin e krimeve të komunizmit.
Qëllimi i ligjit
Por shfaqja e këtij filmi dokumentar në nderim të të pushkatuarve dhe të të persekutuarve të regjimit komunist ka zbuluar edhe një nga qëllimet e ligjit për "spiunët". Pengimin e tyre për të qenë në nivele të larta drejtuese të politikes dhe drejtësisë. "Ligji do të pengojë që në nivele të larta të shtetit të emërohen kandidatura që kanë probleme të tilla. Duhet të hapen arkivat e diktaturës", theksoi Topalli. "Ne nuk mund të lejojmë më, që, në institucionet kryesore të shtetit shqiptar, në Prokurori, në Presidencë, në Parlament, në Qeveri, në Gjykatë të Lartë, në Gjykatë Kushtetuese dhe në institucione të tjera, të kemi njerëz të cilët kanë marrë pjesë në gjyqe politike dhe që kanë kontribuar në atë që ka qenë gjëja më e tmerrshme, që ishte Sigurimi i Shtetit, i drejtuar nga Enver Hoxha. Shoqëria shqiptare duhet t'i drejtohet pajtimit dhe pajtimi bëhet vetëm duke dënuar këto krime. Pajtimi bëhet vetëm duke hapur të gjitha arkivat. Qytetarët shqiptarë duhet të dinë se çfarë ka ndodhur", tha Topalli. Në përfundim të veprimtarisë, kreu i shtetit duke lënë mënjanë çështjen e dekreteve të Gjykatës së Lartë, kërkoi ashtu si Topalli që krimet e komunizmit të marrin dënimin e duhur. "Në mënyrë simbolike, unë kam një grua këtu pranë, është nusja e dajës tim që ka qenë pikërisht në ata të përndjekur që u pasqyruan këtu, por që është vetëm një nga të gjithë ata të persekutuar, të cilët realisht duhet të flasin shumë, por edhe ata që pikërisht flasin në emër të tyre dhe po i konsumojnë edhe kartën morale të fundit këtij problemi që pas gati njëzetë vjet demokraci ka shumë demagogji dhe për fat të keq nuk ka veprime konkrete", deklaroi Topi.
Dokumentari
Filmit dokumentar: "Genocidi mbi elitën e kombit shqiptar nën terrorin komunist", ishte një realizim nga Shoqata e të Përndjekurve Politikë Antikomunistë, Televizioni Publik Shqiptar dhe Drejtoria e Përgjithshme e Burgjeve. Filmi dokumentar, me regji të Esat Telitit, skenar të Esat Telitit dhe Tomorr Alikos, me operator Gavrosh Haxhihyseni, hedh dritë mbi jetët e tjetërsuara në mënyrë çnjerëzore në kalvarin e burgjeve dhe internimit në vitet '44-'51, periudhë kur u eliminua truri i kombit, patriotë e intelektualë, juristë, mjekë, oficerë. Gra e klerikë me gjyqe speciale dhe ushtarake nga ferri komunist.

Bamir Topi
"Në pasazhet e fundit të këtij filmi mjaft interesant ishte shprehja "për një çast të heshtim ne dhe të flasin ata". Në mënyrë simbolike, unë kam një grua këtu pranë, është nusja e dajës tim që ka qenë pikërisht në ata të përndjekur që u pasqyruan këtu, por që është vetëm një nga të gjithë ata të persekutuar, të cilët realisht duhet të flasin shumë, por edhe ata që pikërisht flasin në emër të tyre dhe po i konsumojnë edhe kartën morale të fundit këtij problemi që pas gati njëzetë vjet demokraci ka shumë demagogji dhe për fat të keq nuk ka veprime konkrete".

Jozefina Topalli
"Ne nuk mund të lejojmë më, që, në institucionet kryesore të shtetit shqiptar, në Prokurori, në Presidencë, në Parlament, në Qeveri, në Gjykatë të Lartë, në Gjykatë kushtetuese dhe në institucione të tjera të kemi njerëz të cilët kanë marrë pjesë në gjyqe politike dhe që kanë kontribuar në atë që ka qenë gjëja më e tmerrshme, që ishte Sigurimi i Shtetit, i drejtuar nga Enver Hoxha. Shoqëria shqiptare duhet t'i drejtohet pajtimit dhe pajtimi bëhet vetëm duke dënuar këto krime. Pajtimi bëhet vetëm duke hapur të gjitha arkivat. Qytetarët shqiptarë duhet të dinë se çfarë ka ndodhur".