Parlamenti zviceran është i gatshëm për të ndryshuar ligjin e këtij vendi për të mundësuar hetimin për Henry Tomey-n, trafikantin e armëve nga ky vend, i përfshirë në skandalin e shitjes së armëve kompanisë AEY.

Njoftimi është bërë i ditur të mërkurën që shkoi, ndërsa si shtysë për këtë nismë ka shërbyer një emision i televizionit zviceran, që u botua dhe në gazetën “TemA”. Përfaqësues të partisë Socialdemokrate të Zvicrës kanë paraqitur nismën dhe qeveria ka rënë dakord me të fillimisht.

Në emisionin e ‘TZ’, theksohej fakti se në SHBA dhe në Shqipëri po hetohet në lidhje me Henry Tomey-n, po Zvicra nuk po bën asnjë veprim, për shkak se pengohet nga principi i territorialitetit. Kështu, ai mund të jetë një person që jeton dhe ka aktivitetet në Zvicër, por, nëse aferat dhe kontratat e dyshimta i ka nënshkruar jashtë vendit, atëherë ndaj tij nuk mund të ketë hetim.

Por, falë nismës së re, të nxitur për shkak të këtij skandali, principi i territorialitetit nuk do jetë më vendimtar. Sipas ligjvënësve që kanë propozuar nismën, është e rëndësishme që njësoj si vendi ku kryhet aktiviteti i dyshimtë, të ketë rëndësi dhe pasaporta e personit që kryen këtë veprim.

Kështu, pritet të nisë një hetim ndaj një personi kyç në aferën e shitjes së armëve në Afganistan. Emri i Tomey-t shfaqet disa herë gjatë kësaj ngjarjeje. Ai është personi që shërben si ndërmjetës për dyfishimin e çmimit të municioneve nga shteti shqiptar për kompaninë AEY. Firma e tij mban emrin ‘Evdin’ dhe e ka qendrën në Qipro, ku ka vetëm një zyrë dhe një punonjës që nuk kupton asnjë gjë nga këto çështje.

Në reportazhin e televizionit zviceran theksohet fakti që Tomey, një person që nuk ka asnjë foto dhe asnjë pamje publike, është në listën e zezë të Shteteve të Bashkuara si trafikant armësh, ndërkohë që në Zvicër ai jeton i paprekur fare.

Politikanët socialdemokratë të Zvicrës shprehin habi për një gjë të tillë, ndërsa vetë Tomey refuzon të flasë për gazetarët, të cilëve iu dërgon thjesht një e-mail, ku u shkruan se emri i tij nuk është i përzier në afera të tilla.

Në periferi të Bernës, ai jeton në një shtëpi luksoze, ndërsa ka një firmë më se të rregullt në Zvicër.

Informacionet për të janë të rezervuara, ndërsa thuhet se vetëm shërbimet sekrete amerikane mund të dinë më tepër.

Një nga personat e intervistuar nga ky televizion është dhe Kosta Trebicka, biznesmeni që do realizonte dhe ripaketimin e municioneve me destinacion Afganistanin. Ai e përshkruan Tomey-n si një nga trafikantët më të mëdhenj të armëve në Evropën Juglindore, ndërsa shton se ky treg është tepër i madh dhe fitimprurës.

Skandali i shitjes së armëve dhe ngjarja e Gërdecit kanë zgjuar interesin e shumë mediave të huaja që tentojnë të gërmojnë në këtë ngjarje.

Rasti i ‘TZ’ tregon se raportimi në këtë media ka lëvizur mekanizmat shtetërorë për të hetuar në detaje. Deri përpara se të publikoheshin këto informacione nga televizioni zviceran, asnjë lëvizje nuk ishte ndërmarrë nga ky shtet për Henry Tomey-n, i skeduar si një nga trafikantët më të mëdhenj të armëve, aq sa të kontaktuar nga televizioni, zyrtarët përgjegjës për hetimet në këtë vend, theksonin se mos ndoshta emri i tij ngatërrohet me emrin e ndonjë personi tjetër.

Tashmë, me heqjen e kësaj korace ligjore, mund të zbardhen të tjera detaje në lidhje me këtë person, që duket se ka realizuar kontaktet direkte me zyrtarët shqiptarë.