Presidenti, LSI "ndahet"� nga PD

Çka nuk duhet shitur   

"Kosova Sot': Cilat janë, sipas jush, interesat kryesore të Kosovës  
Adem Demaçi: Kosova ka dhe duhet të  ketë shumë interesa, mirëpo disa prej tyre janë më  të rëndësishme. Do të përpiqem që të rreshtoj ata më të rëndësishmet. Interesi i parë është ai që ata që merren me politikë e ata që janë në pushtet dhe ata që mundohen që të vijnë në pushtet, në praninë e medieve, të takohen  dhe të përcaktojnë interesat më të rëndësishme të shtetit të ri të Kosovës, nga të cilët askush prej tyre nuk do të guxonte të hiqte dorë dhe me të cilët askush nuk do të guxonte që të bënte tregti me askënd, me qëllim që të vihet në pushtet, ose me qëllim që të mbetet në pushtet. Ky takim do të ishte vetëm hapi i parë i domosdoshëm për t'ia bërë të qartë dhe për ta bindur këtë popull hjeka-keq e martir se ata që sot, në skenën tonë politike,  janë duke luftuar për pushtet, janë në rend të parë bij e bija të këtij populli dhe se me të vërtetë e duan këtë popull dhe se në synimet e tyre politike kanë dhe do ta kenë parasysh në rend të parë interesin e përgjithshëm e pastaj interesat e tyre grupore e individuale. Këta politikanë duhet të na japin prova konkrete se jo vetëm e duan popullin e vet, por edhe se midis tyre nuk janë armiq, por janë vetëm konkurrentë që përpiqen që si e si e sa më shpejt ta ndihmojnë popullin e vet që të dalë nga prapambetja në të gjitha fushat. Hapi tjetër do të ishte që këta zotërinj e zonja, të të gjitha partive politike, të merreshin vesh midis tyre dhe të përcaktonin se cilat janë pasuritë e këtij populli që duhet të ruhen bashkërisht dhe të cilat nuk guxojnë, në asnjë mënyrë, të tjetërsohen a t'u shiten të huajve, qofshin ata edhe miqtë tanë më të mëdhenj.  Pra, konkretisht, cilat janë këto pasuri a interesa nga të cilat, jam i bindur se nuk duhet hequr dorë assesi Këto  janë:
1. Ajri, uji e toka jonë, pa të cilat nuk mund të jetohet. E, lidhur me këtë, a duhet të ruajmë pastërtinë e ajrit, ujit e tokës sonë Padyshim e me çdo çmim! Pra, po del përfundimi se energjetikën tonë duhet ta zhvillojmë duke shfrytëzuar ajrin, ujin e diellin e jo, kurrsesi, kryesisht, linjitin që është ndotësi më i madh i ajrit, ujit e tokës sonë. Nëse na duhet të hyjmë borxh për energjetikë, atëherë le të hyjmë borxh e le të aktivizojmë kapacitetet ujore që ka Shqipëria në interesin e ndërsjellë. 
2. Pasuri jona, a interes yni është  PTK-ja, e cila po punon mirë dhe me fitim. Mirëpo, kush janë  ata që na i kanë vënë gjunjët në bark e po na detyrojnë që të shesim firmën e cila, në  këtë thatësirë të tmerrshme ekonomike, po na sjell fitime Kush është ai i shkretë që shet pulën që bën ve Vetëm ai të cilit i ka ardhur shpirti në fyt! A janë miq tanët ata që na detyrojnë të shesim kapacitetin që na sjell fitime A kështu mendojnë ata që të ndihmojnë zhvillimin e Kosovës
3. Pasuri jona e interes yni është e duhet të jetë Aeroporti i Prishtinës, i cili gjithashtu po punon mirë dhe me fitime. Duhet të jemi të gatshëm që të bashkëpunojmë me botën në të gjitha mënyrat, por jo të shesim kapacitetet që ne na sjellin fitime, sepse me ato fitime ne, mund dhe duhet ta zhvillojmë ekonominë tonë dhe jo vetëm me kredi, qofshin ato edhe më të butat, sepse nuk duhet harruar se kredia nënkupton edhe pagesën e kamatave.
4. Pasuri tonat e interes yni janë  tokat bujqësore, malet e kullosat. Pra, interesi ynë duhet të jetë shfrytëzimi i çdo pëllëmbe të tokave tona e jo të na ndodhë si po na ndodh e të bëhemi importuesit më  mëdhenj të prodhimeve ushqimore në rajon! Interesi ynë duhet të jetë mbrojtja e bujqësisë, blegtorisë, kopshtarisë, vreshtarisë, pemëtarisë, peshkatarisë, bletarisë e gjahtarisë.
5. Pasuri jona e interes yni janë  e duhet të jenë paratë e kursyera të mërgatës sonë, e cila është e shpërndarë anekënd botës. Interesi ynë, pra, duhet të jetë gjetja e formave e mundësive të  aktivizimit të kësaj pasurie në interes të Kosovës e të bashkatdhetarëve tanë, të cilët për fajin e korrupsionit e të kriminalitetit që po mbretëron tek ne kanë humbur entuziazmin dhe interesin për të investuar në vendlindjen e tyre. Nuk duhet harruar kurrë që shumë prej tyre nuk u kursyen as me gjak, as me para për të mirën e Kosovës.
6. Interes yni duhet të jetë  mbrojtja shëndetësore e popullit tonë. Kështu si deri më tash, po shihet se nuk po shkon dhe se nuk duhet të shkojë.
7. Interes yni është e duhet të jetë shkollimi e edukimi i tërë popullit tonë. Shkollat e të gjitha institucionet arsimore e edukative duhet të lirohen nga çdo lloj politizimi. Kuadri arsimor e edukativ duhet të ketë vetëm orientim kombëtarë dhe duhet të jetë jashtë ndikimeve partiake e ideologjike të kohës.
8. Interes yni është e duhet të jenë kultura e mediet. Edhe këto duhet të jenë  të lira nga çdo ndikim i brendshëm ose i jashtëm. Duhet të  jenë të lira nga kopjimi i verbër i skemave e programeve të jashtëm të cilët janë të sajuar për vendet e rrethanat përkatëse e jo për vendin e rrethanat tona konkrete.     
"Kosova Sot': Kohëve të fundit është ngritur pluhur rreth bisedimeve EULEX - Beograd. Qeveria thotë nuk ka qenë në dijeni, ndërsa Piter Fejt tha se lidershipi ka qenë në dijeni. Sipas jush, çfarë ka prapa gjithë kësaj  
Adem Demaçi: Prapa kësaj nuk ka asgjë. EULEX-i i di të gjitha, kurse tanët dinë vetëm aq sa u tregon EULEX-i. 

"Kosova Sot': Me zhvillimin e bisedimeve me Beogradin,  a po e vazhdon EULEX-i punën aty ku ka mbetur UNMIK-u   
Adem Demaçi: Po. 

"Kosova Sot': Kosova është përjashtuar nga liberalizimi i vizave. Kush është, sipas jush, më shumë fajtor lidhur me këtë qëndrim, Kosova që nuk i ka përmbushur kriteret, apo Komisioni Evropian po i diskriminon  disa nga vendet e Ballkanit   
Adem Demaçi: Komisioni Evropian nuk mund ta trajtojë beben si gocën e rritur. 

"Kosova Sot': Kur do të hiqen, sipas jush, vizat për Kosovën  
Adem Demaçi: Kur të rritet e të zhvillohet bebja. 

"Kosova Sot': Serbia po vazhdon me retorikën e saj të ashpër kundër pavarësisë së Kosovës. Kur do të mbushet mend Beogradi njëherë e përgjithmonë ndaj Kosovës   
Adem Demaçi: Kur të mbushen mend shtetet më të mëdha perëndimore e ta kuptojnë  se këta që janë, sot, në pushtet në Serbi, thelbësisht janë vazhduesit më besnik të Milosheviqit dhe se këta nuk mund të ndryshojnë e të përmirësohen duke u bërë lëshime e përkëdhelje në llogari të viktimave shqiptare, por me një qëndrim konsekuent e të vendosur siç meritojnë të gjithë kriminelët e botës. 

Serbia, pararojë e
hegjemonizmit rus 

"Kosova Sot': Serbia është kundër daljes së serbëve në zgjedhje pasi, sipas saj, nuk ka kushte për një gjë të tillë. Me këtë, a po përzihet Serbia në punët e brendshme të Kosovës dhe cili duhet të jetë reagimi i diplomacisë kosovare  

Adem Demaçi: Diplomacia kosovare nuk mund ta ndalë Serbinë që të shkaktojë  e të vazhdojë me krizën politike në këto hapësira. Këtë mund ta bëjnë miqtë tanë të perëndimit, të cilët në mënyrë të programuar e të qëllimshme e mbajnë Kosovën të dobët, kurse Serbinë e lejojnë që të forcohet ushtarakisht. Kjo mos barazi forcash regjimin serb e mban në pushtet, ndërsa këta e mbajnë në mashtrim popullin e gjorë serb se përsëri mund të kthehet në gëzhojë zogu që përgjithmonë ka dalë nga gëzhoja. Derisa shtetet kryesore të Evropës perëndimore me njëqind mënyra ia bëjnë me dije Serbisë se duan që, - me çdo kusht - ta kenë Serbinë në NATO e në BE, regjimi serb do ta shantazhojë Evropën me kushtin e Kosovës. Evropa perëndimore e pjesërisht edhe Amerika, me lëshimet e veta të gjata e joparimore që i bënë hegjemonizmit serb, e pollën Milosheviqin. Falë kryengritjes së popullit tonë dhe intervenimit të Amerikës e të shteteve evropiane, Milosheviqi u hoq, por tash me lëshimet e përkëdheljet në vazhdim që po i bëhen Serbisë aktualisht, përsëri po vazhdohet milosheviqizmi pa Milloshin. Zotërinjtë e nderuar të Evropës duhet të pushojnë të përsërisin gabimet e Çemberlenit, sepse Serbia e sotme është vetëm një pararojë në Ballkan e hegjemonizmit rus i cili po rri gati që porsa të bindet se perëndimi nuk  është sa duhet i vendosur, të lëshohet në aventurën e rrezikshme të rikthimit të shteteve që dikur i kishte nën tutelën e vet.   
 

Po përgatis fjalët që po i mungojnë himnit të Kosovës 

"Kosova Sot': Kur jemi te diplomacia, zotëri Demaçi, a ka Kosova diplomaci të fortë  
Adem Demaçi: Diplomacia është  derivat, ose të themi me një fjalë të bukur shqipe, rrjedhojë e forcës së shtetit përkatës. Izraeli është i fortë përbrenda dhe forca e tij reflektohet edhe jashtë. Prandaj, Izraeli ka edhe diplomaci të fortë.  

"Kosova Sot': Çfarë po bën zotëri Demaçi kohëve të fundit  
Adem Demaçi: Po përgatis fjalët që po i mungojnë himnit të flamurit të Kosovës që të na shërbejë për intervalin kohor derisa të  bashkohemi me Shqipërinë. 

"Kosova Sot': Planet tuaja për të ardhmen  
Adem Demaçi: Të kompensoj kohën time të kaluar burgjeve duke përkujtuar të kaluarën me shkrime, duke analizuar të sotmen e duke parashikuar të ardhmen e kombit tonë dhe të të gjithë njerëzimit. 

"Kosova Sot': Ku do t'i kaloni pushimet verore, nëse nuk i keni kryer ende  
Adem Demaçi: Të gjithë  e dinë se e kam një banesë në Sarandën e bukur, të cilën ma ka pas blerë miku im i madh Hetem Ramadani. Porsa të kalojë kulmi i sezonit turistik, do të shkoj të punoj e të pushoj atje. 
Intervistoi: R. Bala