Rregullorja e re e Kuvendit, jo para vjeshtës

Institucionet e Kosovës nuk e konsiderojnë ndonjë sfidë ritmin e hartimit dhe miratimit të ligjeve në përafrimin me standardet e BE-së, ndonëse vendet që kanë kaluar procesin e integrimit, së paku nga 300 ligje në vit kanë shqyrtuar deri në anëtarësimin e tyre të plotë në BE. Gjatë këtij viti, Qeveria ka planifikuar nxjerrjen e 123 projektligjeve, por që, sipas deputetëve, një nga sfidat mbetet zbatimi i tyre në praktikë. Një nga deputetët më të zëshëm në Kuvend, Riza Smaka, thotë se është vështirë për akëcilin deputet të thotë nëse është numër i mjaftueshëm apo i pamjaftueshëm në kuptimin kuantitativ. "Gjithsesi, është fjala për rregullimin e sferave shoqërore të pambuluara ose të parregulluara qartë dhe që janë në kolezion me normat juridike të BE-së"�, thotë ai. Një nga vërejtjet e tij është se shumë akte ligjore miratohen, por numri i madh i tyre ka defekte sidomos në përkthime. "Ka akte ligjore që më shumë bëhen amendamente sesa ka nene. Problem është se nuk përgatiten në aspektin teknik si duhet projektligjet, të cilat i servohen Kuvendit"�, tha ai. Smaka konsideron se ka mundësi që një numër ligjesh, që janë në aplikim, të mos hartohen përsëri nëse nuk janë në kundërshtim me parimet ndërkombëtare. "Ka shumë akte ligjore shumë serioze dhe në harmoni me të drejtën ndërkombëtare që mund të aplikohen pa kurrfarë pengese. Vetëm do të duhej të bëheshin plotësime, ndryshim të caktuara dhe jo të bëjmë akte ligjore komplet tjetër fare për nga përmbajtja dhe shkel e shko.

Hyseni: Kuvendi
në rrugë të mbarë
Kryetari i Komisionit për Legjislacion, Bahri Hyseni, konsideron se Kuvendi është në rrugë të mbarë për të plotësuar agjendën legjislative dhe për këtë ka një plan për afatet kohore kur do të shqyrtohen në komisione. "Për çdo ligj kemi paraparë edhe dëgjime publike, me qëllim që të angazhojmë edhe ekspertë dhe shoqërinë civile, që të jenë më afër projektligjeve"�, tha Hyseni. Ai konsideron se është pak vështirë që brenda dy viteve të mund të plotësohet e gjithë infrastruktura ligjore, të cilën e kanë shtetet me një traditë dhe me një demokraci parlamentare me vite të tëra. "Nëse Kuvendi i Kosovës arrin që vetëm për vitin 2010 të jetë në përfundim të agjendës legjislative që e ka paraparë, konsideroj që jemi në rrugë të mbarë për ta plotësuar legjislacionin në Kosovë"�, tha Hyseni.

Gashi: Zbatimi
i ligjeve - alarmant
Ndryshe nga aprovimi i legjislacionit dhe përafrimi me standardet e BE-së, pjesa që Kosovën e mban larg BE-së, sipas deputetit Ibrahim Gashi, ka të bëjë me mbikëqyrjen parlamentare të zbatimit të ligjshmërisë në Kosovë. "Kjo është pjesa ku Kuvendi duhet të dëshmojë, sepse vetëm në këtë mënyrë Kosova mund ta rrisë efikasitetin e institucioneve. Kryesisht fjala është për institucionin e gjyqësisë, prokurorisë dhe institucionet e pavarura që janë ngritur nga parlamenti e që duhet të jenë më aktive, në mënyrë që të funksionalizohet ajo që është standard bazik i BE-së. "Ky është vit kur Kuvendi duhet të mbikëqyrë më tepër zbatueshmërinë e ligjshmërisë se sa aprovimin e ligjeve, i cili për nga numri nuk dallon nga viti i kaluar. Funksionimi i shtetit ligjor është parakusht esencial që e ndërrojnë perceptimin e BE-së dhe KE-së për Kosovë"�, tha Gashi. Për të është mjaft i rëndësishëm zbatimi i ligjeve, i cili reflektohet në raportet e progresit.
I. KRASNIQI