HAGE- Ish zëdhënësja e gjykatës së Hagës është akuzuar për nxjerrje të informacionit konfidencial dhe do të gjykohet. Akuza ndaj Floren Hartman, me shtetësi franceze ka  lidhje pikërisht me gjyqin ndaj ish liderit serb Slobodan Milosheviç. Ajo me dijeni dhe me vullnet të plotë ka zbuliar informacionin konfidencial duke shkelur rregullat e gjykatës, thuhej në një deklaratë të Gjykatës së krimeve të luftës në Jugosllavi. Hartman është thirrur të paraqitet në Gjykatë më 15 shtator. Dhe mund të përballet me gjobë 100 000 euro nëse shpallet e fajshme. Hartman ishte zëdhënëse e gjykatës në kohën kur kryeprokurore ishte Karla Del Ponte. Të dhënat në fjalë Hartman i ka nxjerrë në një libër të botuar prej saj të quajtur “Paqja dhe Ndëshkimi”, i publikuar në shtator 2007, si dhe një artikulli për institutin boshnjak në janar 2008. në librin e saj Hartman shkruante se Rusia kishte mbrojtur ish liderin e serbëve të Bosnjes Radovan Karaxhiç nga arrestimi me 1997. Karaxhiç që u arrestua muajin e shkuar në Beograd, pritet të dalë para gjykatës për herë të dytë të premten, kur skadon dhe afati kur ai duhet të deklarohet  i fajshëm apo i pafajshëm për akuzat ndaj tij.
(a.r/balkanweb)