ATHINË - Kryeministri grek Kostas Karamanlis, ka deklaruar se vendi i tij, për momentin, nuk do ta ndryshojë qëndrimin lidhur me njohjen e pavarësisë e Kosovës. I pyetur nga BBC, ai ka përsëritur qëndrimin tashmë të njohur se Greqia. Kryeministri grek përsëriti edhe një herë qëndrimin se vendimi për njohjen do të shqyrtohet në bazë të interesave të veta kombëtare. “I peshojmë të gjitha mundësitë. Aktualisht, nuk ka asnjë arsye që të ndryshojmë qëndrimin tonë për çështjen e Kosovës”, ka deklaruar kryeministri grek gjatë konferencës vjetore për shtyp që jep për gazetarët vendas e të huaj.
Siç sugjerojnë disa analistë grekë, njohja e pavarësisë së Kosovës nga ana e Greqisë do të mund të ndikonte në shpërbërjen e mjegullës së pafavorshme për Athinën në hapësirat e banuara nga shqiptarët në Ballkan.
Gjithashtu kryeministri grek ka përsëritur mbështetjen e Athinës ndaj perspektivës europiane të vendeve të rajonit, duke theksuar se respektimi nga ana e tyre i vlerave, parimeve dhe kërkesave që shtron Bashkimi Europian, do të thotë dhe integrim i plotë i këtyre vendeve në familjen europiane.
(a.s/BBC/Balkanweb)