ATHINE- Athina zbulon rrënjët greke të kryeministrit maqedonas. Ndërsa të dy vendet janë përfshirë në një konflikt të ashpër për çështjen e emrit të Maqedonisë, gazetarët grekë zbuluan së fundmi prejardhjen e shefit të qeverisë së Shkupit, Nikolla Gruevski, një zbulim, që sipas tyre mbështet pretendimin për emrin e fqinjit "kokëfortë". Një grup gazetarësh të gazetës elektronike të përditshme "Zougla.gr", kanë mbërritur deri në fshatin e lindjes së gjyshit të Nikolla Gruevskit, Ahladhas të Follorinës. Pikërisht hulumtimet në këtë fshat i kanë bindur ata se gjyshi i Gruevskit, Nikolas Gruios, ka lindur në fshat. Ai u plagos rëndë në malet e Shqipërisë gjatë luftës italo-greke dhe vdiq më 11 dhjetor 1940 në spitalin ushtarak të Follorinës. Si dokument të këtij zbulimi me rëndësi të madhe, tashmë historike dhe politike, gazetarët siguruan edhe pamje televizive si dhe fotografike nga lapidari i fshatit në të cilin përveç emrave të të rënëve të tjerë në luftërat në Greqi, ndodhet i shkruar edhe emri i gjyshit të kryeministrit të sotëm maqedonas, Nikola Gruevski.
Historia
Të dhënat e zbuluara së fundmi tregojnë se pas mbarimit të luftës civile në Greqi në vitin 1949, vejusha e gjyshit të tij, Nikolas Gruios, e la fshatin Ahladhas bashkë me tre fëmijët e saj, midis tyre edhe babai i Gruevskit, duke ndjekur luftëtarët komunistë në territorin e ish-Jugosllavisë. Gjatë gjithë jetës së saj në Maqedoni, gjyshja e Gruevskit merrte pension nga qeveria greke, si vejushë e një të rëni në luftë, thekson gazeta elektronike.
Gazetarët grekë kanë përfituar nga ky "zbulim" për të shprehur indinjatën e tyre ndaj qëndrimit të Gruevskit për çështjen e emrit të Maqedonisë. "Të vijë këtu Gruevski e të shohë emrin e gjyshit të tij, në lapidarin e fshatit. Ai luftoi dhe vdiq për Greqinë dhe jo për Maqedoninë", deklarojnë banorët e fshatit, sipas gazetës. Ata kanë reaguar edhe ndaj letrës së kryeministrit grek, Kostas Karamanlis, disa ditë më parë, për ekzistencën e minoritetit "maqedonas" në zonën perëndimorë të Maqedonisë. "Jemi grekë, dëshmojnë ata, i pëlqen apo jo Gruevskit". Ata që deklarojnë se janë "maqedonas" numërohen me gisht, theksojnë ata.
Akuzat
Ngecur në kurthin e një konflikti shumëvjeçar për çështjen e emrit, liderët maqedonas janë angazhuar së fundmi në një "letërkëmbim" të ashpër, që i ka hapur rrugë shkëmbimit të akuzave dhe kundër-akuzave mes tyre lidhur me bllokimin e zgjidhjes së konfliktit si dhe praninë e minoritarëve maqedonas në Greqi. Kryeministri Gruevski i kërkoi shefit të qeverisë së Athinës njohjen e këtij minoriteti si dhe rikthimin e pasurive të të ikurve në ish-Jugosllavi pas luftës civile në vitin 1949. Por, Karamanlis ka deklaruar se një minoritet nuk ekziston në Greqi dhe se Shkupi do të bënte mirë të gjente një zgjidhje për emrin, në vend që të formulonte pretendime të tilla të paarsyeshme.

(s.g/GazetaShqiptare/Balkanweb)