Para disa javësh, kryeministri maqedonas, Nikolla Gruevski e informoi sekretarin e përgjithshëm të Kombeve të Bashkuara, Ban Ki Moon se qeveria e tij është e interesuar që në bisedimet greko-maqedonase rreth emrit kushtetues të Maqedonisë, të përfshihet edhe pozita e pakicës maqedonase në Greqi.

Në letrën e sekretarit të përgjithsëm të OKB-së, Ban Ki Moon, e cila u publiku të martën në Shkup, thuhet se ndërmjetësi në këto bisedime, Metju Nimic do të vazhdojë me përpjekjet e tij për gjetjen e zgjidhjes rreth mosmarrëveshjes për çështjen e emrit.

“Jam i vetëdijshëm se ekzistojnë edhe çështje tjera, të cilat vlerësoni se duhet të jenë objekt diskutimi ndërmjet Shkupit dhe Athinës. Shpresoj se me zgjidhjen e çështjes së emrit do të hapet rruga për marrëdhënie më të mira, të cilat do të kontribuojnë për t'u ballafaquar me këto çështje dhe zgjidhjen e tyre,” thuhet në këtë letër.

Sekretari, Ban Ki Moon, njëherit e përkujton kryeministrin, Nikolla Grusvki se qeveria e tij duhet të “vazhdojë me realizimin e reformave ekonomike dhe institucionale si dhe ta forcojë bashkëpunimin me vendet e rajonit.”

Letra kthyese e sekretarit Moon, erdhi dy ditë para se Shkupin ta vizitojë i autorizuari i Kombeve të Bashkuara për ndërmjetësimin në bisedimet greko-maqedonase, Metju Nimic.

Në prag të kësaj vizite, kreu më i lartë shtetëror dhe qeveritar maqedonas, ka ndërtuar qëndrim të unifikuar me të cilin do të prezantohet para diplomatit Nimic.

Në një njoftim të lëshuar nga kabineti i presidentit, Branko Cërvenkovski thuhet se kreu i shtetit i ka harmonizuar pozicinet e veta në lidhje me idetë e fundit të ndërmjetësit Metju Nimic.

Por kabineti i presidentit nuk jep hollësi se cilat janë idetë e diplomatit Nimic dhe sa ato janë të pranueshme për palën maqedonase.

Nuk dihet nëse Metju Nimic pas Shkupit do të vizitojë edhe Athinën, por mediat pohojnë se qëndrimi i Mejtu Nimic në rajon bëhet nën presionin e Shteteve të Bashkuara të Amerikës të cilat janë të interesuara që Maqedonia sa më parë të bëhet anëtare e NATO-s.

Ky konstatim ndërlidhet edhe me situatën më të re në Kaukaz pas shpërthimit të konfliktit midis Rusisë dhe Gjeorgjisë.