Ai ka vlerësuar se autoritetet në Prishtinë dhe serbët kanë sfiduar punën e UNMIK-ut pas shpalljes së pavarësisë dhe hyrjes në fuqi të Kushtetutës së Kosovës.

Zoti Ban pritet që më 25 korrik të paraqesë raportin e tij tremujor për Kosovën para ambasadorëve të Këshillit të Sigurimit.

Raporti përfshinë periudhën prej fillimit të marsit të këtij viti deri në fund të qershorit dhe ai flet për sfidat me të cilat është përballur Misioni i OKB-së në ushtrimin e mandatit sipas Rezolutës 1244 e Këshillit të Sigurimit.

Sekretari i Përgjithshëm i Kombeve të Bashkuara thotë në raport se autoritetet kosovare kanë ndërmarrë masa përmes së cilave i kanë marrë UNMIK-ut pushtetin në mënyrë efikase.

"Më e rëndësishmja, Kosova ka futur në fuqi Kushtetutën e cila nuk i jep një rol real UNMIK-ut pas 15 qershorit, edhe përkundër asaj se liderët e Kosovës kanë mirëpritur praninë e vazhdueshme të OKB-së në Kosovë për një kohë të gjatë", thuhet në raportin e zotit Ban.

Më tej, kreu i OKB-së përkujton se pas shpalljes së pavarësisë, Kuvendi i Kosovës ka miratuar një numër ligjesh, qëllimi i të cilave ka qenë marrja e kontrollit legal dhe përgjegjësive në fushat të cilat kanë qenë të rezervuara për UNMIK-un.

Po ashtu përmendet edhe miratimi i simboleve shtetërore dhe vendimi për hapjen e ambasadave të Kosovës në 9 shtete.

Sa u përket serbëve të Kosovës, raporti thotë se "ata kanë hedhur poshtë Kushtetutën e Kosovës dhe legjislacionin kosovar dhe me mbështetjen e Beogradit kanë zgjeruar bojkotin ndaj institucioneve të Kosovës si dhe kanë thelluar strukturat e tyre paralele veçanërisht në veri të vendit".

Kreu i OKB-së thekson se serbët e Kosovës, kanë përdorur mjete të dhunshme për të shprehur kundërshtimin e tyre ndaj autoriteteve kosovare, ndërsa Qeveria e Serbisë është munduar ta mbajë autoritetin e vet në vendbanimet me shumicë serbe në Kosovë, veçanërisht në veri, nëpërmjet operacioneve serbe në hekurudhat dhe gjykatat atje.

Këto zhvillime, sipas Sekretarit të Përgjithshëm të OKB-së, kanë ndikuar në krijimin e një realiteti të ri, në të cilin, siç ka thënë zoti Ban, "UNMIK më nuk mund të funksionojë në mënyrë efektive sikur në të kaluarën".

Për këtë arsye, Sekretari i Përgjithshëm, thotë se ka vendosur të bëjë rikonfigurimin e UNMIK-u, në interes të ruajtjes së paqes dhe stabilitetit në Kosovë dhe rajon.

Misioni i Bashkimit Evropian, siç thuhet në raportin e zotit Ban, do të marrë një rol të rritur operacional në Kosovë në fushën e sundimit të ligjit dhe do të veprojë nën ombrellën e OKB-së.