BRUKSEL- Zëvendëskryeministri për eurointegrimin i Maqedonisë, Ivica Boçevski deklaroi në Bruksel se skenari i Gjeorgjisë mund të trimërojë qarqet ekstremiste në Maqedoni.
Boçevski këtë e deklaroi gjatë një seminari për çështjen e Ballkanit të zhvilluar në Ballkan. Sipas tij, deri tek kjo gjendje mund të vijë nëse shumë shpejt nuk do të zhbllokohet procesi i anëtarësimit të Maqedonisë në NATO dhe BE.
Zëvendëskryeministri për evrointegrime, Ivica Boçevski tërhoqi vërejtjen në diskutimin e tij se vazhdimi i shtyerjes së procesit të anëtarësimit të Maqedonisë në BE dhe NATO mund të trimërojë forcat margjinale në vend dhe rajon.
“Është e nevojshme që të hapen bisedimet për anëtarësim në BE. Duhet patjetër që të shohim se ky proces ka filluar dhe duhet të shohim se ky proces po zhvillohet”, deklaroi Boçevski.
Ai ka kritikuar Greqinë duke nënvizuar se ky vend fqinj po shfrytëzon kontestin e emrit për të bllokuar Maqedoninë në përparimin e saj në proceset evroatlantike. Zëvendëskryeministri Bocevski tha se ka ardhur koha që ky proces duhet të zgjidhet. Maqedonia në vitin 2005 mori statusin e kandidatit për anëtarësim në BE, por Brukseli zyrtar akoma nuk i ka caktuar datën për fillimin e bisedimeve për anëtarësim. Komisioni Evropian paralajmëroi se në mars të vitit të ardhshëm planifikon që të rekomandojë hapjen e bisedimeve me Maqedoninë.

(a.r/ina/balkanweb)