SHKUP- Ndërmjetësi i OKB-së, Metju Nimic mund të tërhiqet nga detyra e tij për shkak të dështimit të negociatave për zgjidhjen e çështjes së emrit të Maqedonisë midis Athinës dhe Shkupit.

Lajmi bëhet i ditur nga televizionet maqedonase, që citojnë burime diplomatike në Nju Jork. “Mundësia më e madhe është që ndërmjetësi i OKB-së të tërhiqet nga detyra e nëse deri në fund të tetorit nuk do të ketë përparime për gjetjen e zgjidhjes për emrin e Maqedonisë. Ai këtë e konsideron si humbjen më të madhe në karrierën e tij të pasur diplomatike”, nënvizojnë mediat maqedonase.

Siç bëhet e ditur, ndërmjetësi i OKB-së ka qenë i shqetësuar nga negociatat e fundit me palën maqedonase, e cila është e ndarë për çështjen e emrit të vendit dhe qëndrimeve shumë të largëta për gjetjen e kompromisit.

Metju Nimic ka paralajmëruar se negociatat për çështjen e emrit kanë hyrë në një fazë kritike dhe nuk ka kohë për të humbur me çështje që nuk janë pjesë e mandatit të tij për zgjidhjen e kontestit të emrit të Maqedonisë.

(s.g/Balkanweb)