HAGË

Karaxhiç: Nuk flas në gjykatën e NATO-s 

Ora 17:10 - Ish-lideri i serbëve të Bosnjes, Radovan Karaxhiç në seancën e dytë gjyqësore ndaj tij në Hagë, ka zgjedhur heshtjen duke refuzuar të deklarohet fajtor ose jo për 11 akuzat e ngritura ndaj tij. Karaxhiç në pamje i qetë para gjyqtareve të Hagës ka thënë se Gjykata e Krimeve të Luftës në ish-Jugosllavi është gjykatë e NATO-s, e cila ka pasur gjithnjë qëllim likuidimin e tij. Duke mos pranuar të thotë asnjë fjalë për akuzat ndaj tij për gjenocid dhe krime kundër njerëzimit, Karaxhiç madje ka përdorur ironinë në këtë seance gjyqësore. “Unë nuk po përdor me emrin fals dhe mendoj se të gjithë palët e tjera duhet ta bëjnë këtë”, ka thënë Karaxhiç.
Kur gjyqtari i çështjes, Ian Bonomi nisi leximin e akuzës së parë për gjenocid, Karaxhiç u shpreh: “Nuk do deklarohem për asnjë akuzë në këtë gjykatë”.
Dy ditë më parë Karaxhiç kishte dërguar një ankesë në këtë gjykatë ku shkruante se nuk shpresonte kurrë se do kishte një gjykim të drejtë ndaj tij dhe e konsideronte të gjithë procesin si komplot ndaj tij.
Ish lideri i serbeve të Bosnjës u  arrestua në Beograd në muajin korrik, pas 13 viteve në arrati. Ai akuzohet kryesisht për orkestrimin e masakrës së Sebrenicës ku gjetën vdekjen 8000 burra e djem myslimanë. Seanca e radhës së gjyqit të Karaxhiç u caktua për në 17 shtator.

Nis seanca ndaj Karaxhiç në Hagë

Ora 14:34 -  Ka nisur rreth orës 14:20 procesi gjyqësor në ngarkim të të akuzuarit për krime lufte Radovan Karraxhiç. Për të dytën herë ish-lideri politik i serbëve të Bosnjes është paraqitur para trupit gjykues të Hagës për të deklaruar në lidhje me akuzat. Karaxhiç do ti kërkohet të përgjigjet nëse e deklaron veten fajtor apo të pafajshëm në lidhje me 11 akuzat të cilat janë ngritur mbi të.
I akuzuari Karaxhiç ka thënë se do të vetëmbrohet në lidhje me akuzat ndërkohë që tashmë pritet vetëm fjala e tij në gjykatë.
Karaxhiç është ekstraduar në Hagë, pas 13 viteve në arrati. Ai ka thënë se "demonizimi" i tij në media, përjashton mundësinë e një gjykimi korrekt.
Karaxhiç u arrestua në Beograd në muajin korrik pasi i kishte shpëtuar drejtësisë për mbi një dhjetëvjeçar.
11 akuzat ndaj tij përfshijnë krime kundër myslimanëve dhe kroatëve boshnjakë në kohën e Rrethimit e Sarajevës dhe Masakrës së Srebrenicës.
(a.s/Balkanweb)