SHKUP- Në Maqedoni, Partia Demokratike Shqiptare (PDSH) e cilësoi si joligjore dhe në kundërshtim me interesat e shqiptarëve, rregulloren e Parlamentit maqedonas. Sipas nënkryetarit të PDSH, Besim Dogani: “Rregullorja është jo legjitime, psai nuk lejon përdorimin e gjuhës shqipe” dhe paralajmëroi se PDSH në asnjë rast nuk do të pranojë këtë rregullore që siç thuhet është në kundërshtim me interesat e shqiptarëve.

Dogani shtoi se rregullorja u miratua me procedure jo legjitime, pa konsensus politik dhe vlerëson si akt antishqiptar votën pro që deputetët e BDI-së së Ali Ahmetit dhanë për miratimin e rregullores së Parlamentit. “Duke votuar rregulloren e re të Parlamentit, BDI ka shkelur mbi interesat kombëtare të shqiptareve” thotë Dogani. Ai shton se "Ky veprim paraljmëron se periudha në vijim do të jetë përplot poshtërim të shqipëtarëve dhe kërkesave tona. Ju përkujtojmë se para më pak se një vit po për këtë rregullore ku përdorimi i gjuhës ishte shumë më i avancuar, BDI dorëzoi mbi 2500 amandamente për të penguar miratimin e saj”

Sipas nënkryetarit Dogani, PDSH gjatë qeverisjes së saj kishte në prag të miratimit rregullore që avanconte më shumë përdorimin e gjuhës shqipe, por sipas tij ajo u bllokua nga BDI. Rregullorja e re e Parlamentit ndalon përdorimin e gjuhës shqipe nga ana e kryetarë të komisioneve parlamentare që janë nga partitë shqiptare. Poashtu ndalohet përdorimi i gjuhës shqipe nëse seanca udhëhiqet nga nënkryetari shqiptar i Parlamentit.

Parlamenti i Maqedonisë miratoi të premten me shumicë votash rregulloren e re të punës së Parlamentit duke u mbështetur edhe nga BDI-ja.

(s.g/Ina/Balkanweb)