SHKUP- Maqedonia ka filluar aplikimin e të ashtuquajturit “sigurim shëndetësor” për shtetasit e huaj që hyjnë në këtë republikë. Çdo shtetas i huaj që dëshiron të hyjë në Maqedoni është i detyruar të paguajë 5 euro sigurim për vetëm 5 dit. Ky regjim i qarkullimit vlen edhe për shtetasit e Kosovës. Çdo shtetas i Kosovës duhet të posedojë sigurimin shëndetësor të udhëtimit për të hyrë në Maqedoni. Ky regjim ka filluar të zbatohet së pari në vendkalimet kufitare të Maqedonisë me Shqipërinë, ndërsa gjatë ditëve në vijim parashihet të aplikohet edhe në vendkalimet kufitare me Kosovën. Zëdhënësi i Ministrisë së Brendshme të Maqedonisë, Ivo Kotevski, ka thënë se ky regjim i qarkullimit zbatohet në pajtim me ndryshimet e fundit të Ligjit për qëndrim të shtetasve të huaj. Ai ka thënë se ai nuk vlen vetëm për kosovarët, por për të gjithë shtetasit e huaj që hyjnë në Maqedoni apo kalojnë nëpër Maqedoni. Kotevski ka thënë se policët maqedonas kanë të drejtë t'i kthejnë prapa udhëtarët që nuk e kanë këtë sigurim. (a.r/qik/balkanweb)