SHKUP – Çështja e emrit të Maqedonisë pritet të marrë zgjidhje në muajin shtator. Sipas mediave maqedonase në fillim të muajit shtator bisedimet për emrin pritet të hyjnë në fazën finale të tyre. Lajmi është bërë i ditur nga televizioni “A1” në Shkup i cili i është referuar burimeve diplomatike të Kombeve të Bashkuara dhe përfaqësuesve ndërkombëtarë në New York.
Pas dështimeve të vazhdueshme të negociatave mes Greqisë dhe Maqedonisë, në datën 10 shtator do të jetë raundi i radhës. Edhe ky raund do të ketë përfaqësues të Greqisë, Maqedonisë dhe ndërmjetësi i OKB-së Metju Nimiç duke shpresuar në gjetjen e një zgjidhjeje të përbashkët.
Sipas deklaratave mësohet se qëllimi i këtij raundi të ri është zgjidhja e emrit para Kuvendit të Përgjithshëm të OKB-së e cila fillon në datën 23 shtator.
Burimet bëjnë të ditur se negociatat për emrin e Maqedonisë hyjnë në fazën finale dhe pritet që të arrihet një kompromis për emrin para përfundimit të administratës së presidentit amerikan Xhorxh W. Bush. Po ashtu nënvizohet se kërkesa e Moskës zyrtare për njohjen e pavarësisë së dy provincave, Osetisë Jugore dhe Abhazisë nga Maqedonia është një përpjekje e re Ruse që t’i jap Maqedonisë përkrahjen për emrin në Kombet e Bashkuara.
(a.s/Balkanweb/INA)