Disa rajone të Shqipërisë u përfshinë nga zjarre të fuqishme duke rrezikuar jetën e banorëve, por edhe pasuritë e tyre. Më serioze situata ka qënë në Malësine e Madhe, Gjirokastër, Delvinë dhe Himarë.

Sipas bilanceve paraprake, janë djegur disa shtëpi, plantacione me ullinj dhe pyje. Autoritetet kanë ndërhyrë në mënyrë energjike për shuarjen e flakëve dhe mënjanimin e pasojave.

Megjithë situatën e krijuar, sipas drejtorit të përgjithshëm të emergjencave civile, Fredi Olli, gjithçka është nën kontroll dhe gjendja nuk mund të krahasohet me atë të vitit të kaluar, kur u vlerësua si emergjente.

Sipas zotit Olli, ndonëse nuk është bërë një bilanc përfundimtar i situatës nga zjarret e kësaj vere, do të jetë qeveria shqiptare ajo që do të përballojë shpenzimet. Drejtori i përgjithshëm i emergjencave civile, Fredi Olli, tha se një marrëveshje me Bankën Botërore me vlerën tetë milionë dollarë, do të përdoret për sistemin e emergjencave në Shqipëri.