SHKUP- Ndërmjetësi i OKB-së, Metju Nimic do të mbërrijë sot në kryeqytetin maqedonas, për t’u takuar me presidentin Branko Cërvenkovski dhe kryeminstrin, Nikolla Gruevski. Në këtë takim, Nimici dhe autoritetet maqedonase do të shqyrtojnë mundësinë e një progresi për zgjidhjen e kontestit të emrit deri në muajin shtator.

Pas vizitës në Shkup, Nimic të premten do ta vizitojë edhe Greqinë, ku në qytetin e Selanikut do të takohet me përfaqësuesit grekë.

Pas këtij raundi të bisedimeve pritet që në fillim të muajit shtator, ndërmjetësuesi i OKB-së të paraqes propozim të ri për ndryshimin e emrit kushtetues të Maqedonisë. Nimici, sipas burimeve, në konsultimet e fundit me përfaqësuesit e Shkupit dhe Athinës propozoi emrin "Maqedonia Veriore" në pesë variante.

Raund i ri i negociatave që do të mbahen sot dhe nesër, vjen nën presionin e fuqishëm të Uashingtonit, i cili pret zgjdhje të shpejtë për emrin dhe vendim për pranimin e Maqedonisë në NATO.

(s.g/Balkanweb)