SHKUP- Ndërmjetësi i OKB-së Metju Nimic udhëton sot drejt Athinës. Atje Nimic pritet të takohet me ndërmjetësin grek në këto bisedime, ambasadorin Vasilakis.

Një ditë më parë Nimic ishte në Shkup ku u takua me presidentin Cërvenkovski dhe kryeministrin Gruevski. Republika e Maqedonisë e Veriut apo Republika e Maqedonisë e Epërme është propozimi të cilin ndërmjetësi ndërkombëtar në bisedimet midis Athinës dhe Shkupit, Metju Nimic ka bërë në Shkup. Propozimi i Nimic as është pohuar, por as është mohuar nga palët në bisedime.
“Nuk është fshehtësi se po kërkojmë formulim që do t’i kënaq të dyja palët në negociata. Ky emër është përmendur edhe në shtyp këtyre ditëve. Nuk do ta mohoj as vërtetoj”- tha Nimic i cili refuzoi të flas për një emër konkret.

Ndërkohë qeveria e Maqedonisë përmes një njoftimi për shtyp sqaroi se në takimin me ndërmjetësin e OKB-së, nuk është biseduar për ndonjë emër konkret, por për disa detaje të ideve të paraqitura nga Nimic.

"Çështja e emrit nuk rrezikon identitetin kombëtar të popullit maqedonas," ka thënë Metju Nimci në Shkup, duke shtuar se ai ka mandat që të bisedojë për çështjen e emrit, ndërsa çështjet tjera të hapura sipas tij duhet të zgjidhen në vazhdim. Nimic synon që cështja e emrit të zgjidhet deri në muajin shtator.

Nga ana tjetër, kryeministri maqedonas Nikolla Gruevski haptas shprehu pesimizmin e tij për zgjidhjen e shpejtë të mosmarrëveshjes midis vendit të tij dhe Greqisë. Ai tha se Greqia nuk dëshiron që ta zgjidhë këtë çështje.

"Të gjitha sinjalet flasin se Greqia nuk dëshiron që ta zgjidhë problemin me emrin, së paku deri nga mesi i vitit të ardhshëm kur pritet që të mbahen zgjedhjet në Parlamentin europian. Dhe ajo sipas vlerësimit tim do të bëjë çmos që procesi i shtatorit të dështojë dhe njëherësh për këtë dështim fajtore të jetë Republika e Maqedonisë, pasi në qarqet diplomatike është shumë me rëndësi se kush është fajtori, " tha kryeministri Nikolla Gruevski para takimit me diplomatin Metju Nimic.

Gruevski tha se nëse Greqia pengon integrimet euroatlantike, atëherë qeveria do të përqëndrohet në zhvillimin e fuqishëm dhe serioz të shtetit.

(s.g/Balkanweb)