PRISHTINË – Kreu i PDSH në Maqedoni Menduh Thaçi ka nënshkruar një memorandum bashkëpunimi me kreun e Aleancës për Ardhmërinë e Kosovës, Ramush Haradinaj.
Synimet e memorandumit janë të mos harrohen përkushtimet e përbashkëta për idetë dhe idealet e lirisë, demokracisë dhe zhvillimin mbarëkombëtar. “Besojmë se nëpërmjet këtij memorandumi do të arrihet realizimi i aspiratave të popullit shqiptar për integrim të gjithanshëm në dobi të avancimit të proceseve integruese euro-atlantike në të dy anët e kufirit”, tha Haradinaj.
Ndërsa Thaçi këtë bashkëpunim e ka quajtur mënyrë më të mirë për afirmimin dhe zhvillimin shoqëror dhe ekonomik të popullit shqiptar. “Do t’u ofrojmë bashkëpunim të gjitha partive shqiptare, kudo që janë”, tha Thaçi.
Në këtë takim kreu i PDSH në Maqedoni, ka konsideruar zhvillimet e fundit brenda partisë së tij si një procese demokratike të cilat u kanë ndodhur edhe shumë partive të tjera. “Është punë e demokracisë!”, komentoi Thaçi.
(a.s/Balkanweb/INA)